Хамтын ажиллагааны шинэлэг хэлбэрийг дэмжицгээе!

“Нийгэмд тустай сайн мэдээ түгээх аян”-ы нээлтийн ажиллагаан дээр МСНЭ-ийн Ерөнхийлөгч Б.Галааридын хэлсэн үг.

Нийгмийн хариуцлагаа хэрэгжүүлэгч “Эрдэнэт” ХХК нь МСНЭ-тэй эртнээс харилцаатай ажиллаж ирсэн уламжлалтай. Гэхдээ энэхүү харилцаа нь нэг талын гуйлт хүсэлтээр нөгөө тал нь хандив, мөнгөн тусламж үзүүлэх төдийгөөр хязгаарлагдаж ирсэн байдаг. “Эрдэнэт” үйлдвэрийн удирдлагууд сүүлчийн удаа солигдсоны дараа хоёр тал энэ асуудлыг хэрхэн үр дүнтэй, илүү бүтээлч харилцаа болгох вэ, хамтын ажиллагаанд хандах хандлагаа хэрхэн өөрчлөх вэ гэдэг тал дээр санал солилцож тохиролцоонд хүрсэн юм. Бидний хамтын ажиллагаа эн тэргүүнд нийгэмд тустай байх ёстой, ил тод нээлттэй байх ёстой, харилцан хариуцлагатай байх ёстой, бусдад санаа өгөхүйц, бусдыг манлайлан дагуулахуйц үлгэр жишээч байх ёстой гэдэг дээр хоёр тал тохиролцсон. Үүнийхээ үндсэн дээр хамтын ажиллагааны үр дүнтэй арга хэлбэрийг эрэлхийлсэн. Энэхүү эрэлхийллийн үр дүнд “Нийгэмд тустай сайн мэдээний аян”-ыг өрнүүлэх санааачлагыг “Эрдэнэт” ХХК гаргаж, МСНЭ уг ажлыг хариуцан зохион байгуулахаар болсон юм.
“Нийгэмд тустай сайн сайхан мэдээлэл түгээх соёлыг хэвшүүлэх, олон нийтийг гэгээрүүлэх үйлсэд манай салбарынхныг идэвхжүүлэх, мэдээллийн олон урсгал дундаас эх орон, хувь хүн, олон нийтэд хэрэгтэй, тустай мэдээллийг илүү чухалчлан, тийм мэдээлэл түгээсэн хэвлэл мэдээллийн хэрэгслийг илүүтэй хүндэтгэдэг хандлагыг төлөвшүүлнэ” гэж энэ аяны гол зорилгыг тодорхойлсонтой та бүхэн танилцсан байгаа.
Манай аяныг дэмжиж нэгдсэн хэвлэл мэдээллийн хэрэгслүүд Монгол даяар болж байгаа сайн үйлс, нийгэмд тустай сайн сайхан мэдээллийг олон нийтэд түгээж, “Эрдэнэт” үйлдвэр тэрхүү мэдээнд нь бичлэгийн шагнал үе шаттай олгоно. МСНЭ аяны үйл явцыг бүхэлд нь зохион байгуулж, удирдаж, мэдээллийг нэгтгэж, бүх талын мэргэжлийн үйлчилгээг үзүүлнэ. Үр дүнд нь “Эрдэнэт” үйлдвэр нийгмийн хариуцлагаа хэрэгжүүлнэ, сэтгүүлзүйн салбарт эерэг сайн мэдээллийг эрхэмлэх соёл бий болно, хэвлэл мэдээлийн хэрэгслүүд хөдөлмөрөө үнэлүүлж, бичлэгийн шагналаа авна, МСНЭ болон ХМХ-үүд хоорондын харилцаа илүү гүнзгийрнэ, нийгэм бүхэлдээ танин мэдүүлсэн, гэгээлэг мэдээллийн үр шимийг хүртэнэ. Бид энэхүү аяныг бүхэлд нь ингэж харж, төсөөлж байна. Ийм байлгахын төлөө сэтгүүлчид, хэвлэл мэдээллийн хэрэгслүүдтэйгээ хамтран зүтгэх болно. Та бүхнийг гэгээлэг сайхан аяндаа идэвхтэй оролцохыг уриалж байна.
Маргааш болох дэлхийн хэвлэлийн эрх чөлөөний өдрийн мэндийг энэ дашрамд та бүхэндээ урьдчилан хүргэе! Ийм чухал өдрийн босгон дээр энэхүү гэгээлэг сайхан ажлыг эхлүүлж байгаадаа баяртай байна. Он солигдохын өмнө дахин цугларч аянаа дүгнэх болно. Тэр хүртэл эрчтэй, идэвхтэй ажиллаарай. Нийгмийн сайн сайхны төлөө ихийг бүтээгээрэй. Та бүхэнд аз жаргал, сайн сайхан бүхнийг хүсье. Баярлалаа.
(2016.05.02-нд “Чингис хаан” зочид буудлын “Тэмүүжин” танхимд болсон “Нийгэмд тустай сайн мэдээний аян”-ы нээлт дээр МСНЭ-ийн Ерөнхийлөгч Б.Галааридын хэлсэн үг)