Худаг руу унаж амиа алдсан гурван хүүхэд даанч хайран

Өвөрхангай аймгийн Тарагт сумын Хар адуу гэдэг газарт 3-8 насны гурван хүүхэд худаг руу унаж амиа алдсан харамсалтай хэрэг гарчээ. Нэг айлын ах дүү гурван хүүхэд тоглож байгаад худаг руу унасан нь юунаас болсныг цагдаагийнхан шалгаж байна. Гурвын гурван сайхан үрээ харанхуй худагт алдсан аав ээж, ах дүү, хамаатан садан ямар их уй гашууд автаж байгаа бол. Бодоход ч, аймшигтай. Хүүхэд л болсон хойно гэнэн, томоогүй,болгоомжгүй сониуч зангаасаа болоод аюул осолд өртсөн нь цөөнгүй сонсддог. Томчууд бид тэднийг хараа хяналтаасаа гаргаж болохгүйг мэдсээр атлаа сонор сэрэмж алддаг. Өнгөрсөн сард гэхэд л бага насны дөрвөн хүүхэд ус руу унаж амиа алдсан харамсалтай хэрэг гарсан. Өчигдөрхөн Чингэлтэй дүүргийн 9 дүгээр хорооны нутагт зургаан настай хүү тамхины асаагуураар цаас шатааж тоглож байгаад нүүрсний амбаар шатаасан. Энэ мэтчилэн юмны учир мэдэхгүй, дэггүй дүрсгүй хүүхдүүд хэрэг тариад байна. Хүүхдүүд санамсаргүй болгоомжгүй байдлаар амиа алдах хэрэг нэмэгдсэн гэж цагдаагийн байгууллагаас анхааруулж буй. Учир мэдэхгүй бага насны хүүхэддээ байнга анхаарал тавьж байх ёстойг хүүхдүүдийн тоглоом наадмаасаа шалтгаалан хийж байгаа болчимгүй үйлдэл харуулж байна.

Н.Яруухан