Хоёр нялх хүүхэдтэй бүсгүйг сайн санаат хүмүүс ивээлдээ авчээ

Эмнэлэгт хэвтсэн эхнэрээ гараад ирэхэд нь гэрээ ачаад нүүгээд явсан залуугийн хүн чанаргүйг сошиалаар шуугисныг бичих нь илүүц биз ээ.Тэр хуншгүй эр нүүхдээ эхнэрийнхээ хувцсыг гялгар уутанд хийгээд гэрийнхээ буурин дээр орхихоо бас мартсангүй.

Тэр нөхөр бүсгүйг өрөвдсөнгүй. Бие муутай бүсгүй нялх хүүхдээ тэврээд зовж явахад сайн санаат хүмүүс түүн рүү гар сунгажээ. “Хужирт Эко гэр” компанийхан Цагаандарьд таван ханатай шинэ гэр бэлэглэсэн байна. Иргэний нисэхийн ерөнхий газрынхан бүсгүйд эхний ээлжинд гэрээ авчирч бариад байгууллагын манаачаар ажиллахыг санал болгожээ.

ИНЕГ – ын дарга Л.Бямбасүрэнгийн санаачилгаар Цагаандарийг 650 мянган төгрөгөөр цалинжуулах болсон байна. Мөн сар бүр цалин дээр нь 20 хувийн нэмэгдэл олгохоор болсон бөгөөд хожим хүүхдүүд нь том болоод цэцэрлэг,сургуульд хамрагдах үеэр Цагаандарь бүсгүй мэргэжлээ дээшлүүлэн албан тушаал ахин ажиллах боломжтой болох юм.

Түүнд туслаж,бүх талаар дэмжиж байгаа мянга мянган хүмүүст чин сэтгэлийн талархал илэрхийлье. Сайн сэтгэлийн үзүүрт шар тос гэдэг билээ. Цагаандарийн хашаа байшин, гэрийг энэ сарын 20-ны 10:00 цагт албан ёсоор хүлээлгэн өгөх даруухан ёслол болно.

Хоёр хүүхдээ үүрч амьдралын төлөө тэмцэж яваа бүсгүйд гэр олгосон “Хужирт Эко гэр” компани,ажилтай орлоготой болгосон ИНЕГ, гэрийг тааруулан тохируулан барьж өгсөн залуус болон сайн санаат бүх хүний буян заяа ядарсан бүсгүйг ивээх болтугай.

Н.Намуун