Бээжин их түйрэнд нэрвэгджээ

БНХАУ-ын нийслэл Бээжин хот шороон шуурганд дарагдаж байна. Монголын говь талын бүсийг хамарсан элс, шороон шуурга Өвөрмонголоор дамжсаар Бээжинд хүрчээ.

Хятадын нийслэлд үзэгдэх орчин хязгаарлагдсан тухай сэрэмжлүүлэх мэдээг тус улсын хэвлэл мэдээллийн хэрэгслүүд цаг тутам мэдээлж байна. Иргэдийн аюулгүй байдлыг хамгаалах үүднээс нислэгийн компаниуд төлөвлөгөөт нислэгүүдээ цуцалжээ.

Хүүхэд, хөгшид, жирэмсэн ээжүүдийг шуурга намжтал гэрээсээ гарахгүй байхыг анхааруулж байна. Өчигдөр орон нутгаар цагаар 11.00 цагт Бээжин дэх агаарын чанар /РМ 2.5/ нэг куб метр тутамд 500 микрограмм байна гэж BBC агентлаг мэдээллээ. Энэ нь Дэлхийн эрүүл мэндийн байгууллагын зарласан хэвийн хэмжээ буюу 25 микрограммыг даруй 20 дахин нэмэгдүүлсэнтэй тэнцэж байгаа юм. Шуурганы улмаас Хятадын иргэний агаарын 50 гаруй нислэг саатсан гэж Синьхуа мэдээлжээ.