У.Хүрэлсүхийн Засгийн газар түүхий өндөг шиг хэврэг байх эсэх нь яаж тохиролцохоос шалтгаална

Ерөнхий сайдын суудалдаа суугаад хэдхэн хонож буй У.Хүрэлсүх түүний төлөө өмнөх Засгийн газрыг унагаж өгсөн 33 гишүүнийг гомдоож эхэллээ гэсэн “бор шувуу” Төрийн ордноор зөрөлдөн нисэлдэж байна. 29 дэх Ерөнхий сайд Ж.Эрдэнэбатыг хүчээр унагах “тоглоом”-ыг гардан гүйцэтгэсэн 33 нөхрөөсөө нүүр буруулж,М.Энхболдын фракцтай тохирч засгаа бүрдүүлэх гэж байгаа нь яалт ч үгүй үнэн гэж түүнд гомдогчид ярьсан удаатай.

Эх сурвалжуудын таамаглаж буйгаар,У.Хүрэлсүх сайд нараа нэрлэж,танхимаа бүрдүүлэх гэж “шар махтайгаа хатаж” мэднэ гэлцэх. Хэрэв У.Хүрэлсүх санаа нэгт нөхөдтэйгээ хамтран бялуугаа хуваагаад идчихвэл засаг нь хэврэг гэхэд түүхий өндөг шиг  хэврэг болох магадлалтай.

Өөрөөр хэлбэл УИХ дахь МАН-ын хүчний харьцаа 33:32 байгаа болохоор Ж.Эрдэнэбатыг тонгорсон шиг явдал У.Хүрэлсүхэд тохиолдохгүй гэх баталгаа алга. Байгуулсан засгаа урт наслуулахын тулд амттанг хуваалцахыг хүсэгчидтэй тохирохоос өөр зам түүнд байхгүй. Өнөөдөртөө МАН-ын дарга,УИХ-ын дарга байгаа М.Энхболдтой хичнээн арсалдах гээд түүнд шанс байхгүй. Өөрийнхөө багийнхнаар танхимаа бүрдүүлнэ гэж Ж.Эрдэнэбатыг унагаж явахдаа санаа нэгт нөхдөдөө амалж  байсан амлалт арай гоомойдсоныг тэр одоо ойлгож байгаа. Улстөрийн салхи хаашаа ч эргэж мэдэхийг тухайн үед хэн ч таашгүй.

Ямартай ч өнөөдөр У.Хүрэлсүхэд хүний, өөрийн хоёр талаас тулгаж байгаа санал түүнийг нуман тулгуурт оруулж буй. М.Энхболд бол улстөрийн тайзан дээр чадварлаг тоглож сурсан хүчтэй өрсөлдөгч. Түүний зүгээс “Засгийн газрынхаа суудлын 50 хувийг манай талд өг, өгөхгүй бол намын дарга болоход чинь тээг учруулна, АН-ынхантай нийлж байгаад Засгийн газрыг чинь унагаана” гэсэн хэмээн  улстөрчид ярих авай. Магадгүй,маш нарийн тооцоолсон сүрдүүлэг ч гэлцэнэ.   У.Хүрэлсүхийн хувьд хаашаа ч бултах аргагүй ийм саналыг хүлээн зөвшөөрөхөөс өөр замгүй.

Түүнийг Ерөнхий сайд болох сургаар хэн ямар яамыг толгойлох вэ гэсэн таамаг өдрөөр биш цагаар өөрчлөгдөж байсан. У.Хүрэлсүхийг  Ерөнхий сайдаар батлахад  намынх нь хэдэн гишүүн  чуулганд ороогүй, гар өргөөгүй. Гэхдээ нийгэм даяараа түүнд талархалтай хандаж, их зүйл хүсэн хүлээж байгаа. Өчигдөр Төрийн ордноос ниссэн бор шувуу “У.Хүрэлсүх  шийдвэрээ нэгэнт гаргасан. Засгийн газрынхаа 40 хувийг томилох эрхийг М.Энхболдынхонд  өгсөн байна” гэж мэдэмхийрэв. Үнэндээ У.Хүрэлсүх тийм ч амархан тахимаа өгчих хүн биш. Хэрэв тэгсэн бол өөрийнхөө хүмүүсийг “жийсэн” байж таарна. Монголын 30 дахь Ерөнхий сайдын танхим ямар бүрэлдэхүүнтэй байхыг У.Хүрэлсүх биш М.Энхболд мэдэж байгаа гэсэн таамаг үнэний хувьтай гэж бор шувуунууд “шулганалдаад” байна. Уг нь У.Хүрэлсүх танхимдаа өмнөх засгаас хэнийг ч оруулахгүй гэж мэдэгдэж байсан.

Н.Дөл