Аадар бороо, үерийн аюулын улмаас 4 хүний амь үрэгдэж, 772 байгууламж усанд автаад байна

Энэ сарын 16-ны өдрөөс эхлэн БНСУ-ын нийт нутгаар их хэмжээний аадар бороо орсны улмаас 4 хүний амь үрэгдэж, нийтийн өмчийн 496, хувийн өмчийн 276 байгууламж усанд автаж, их хэмжээний хохирол амсаад байна.

Нийт 13 муж, хотуудад 3413 өрх буюу 5192 иргэнийг аюулгүй газарт нүүлгэн шилжүүлээд байгаа бөгөөд 4000 орчим иргэнд төрөөс түр байраар хангаад буй тухай мэдээллийг Дотоод хэрэг, аюулгүй байдлын яамнаас мэдээллэв.

Сөүл-Пусаны хурдны гал тэрэгний 7 шугам, орон нутгийн хурдны зам олноор усанд автаж, замын хөдөлгөөнийг бүрэн хаагаад байна.

БНСУ-ын Засгийн газар өчигдөр буюу 17-ны өдөр “Онц байдал”-ын хамгийн дээд зэрэг буюу 3-р түвшинд хүргэж, байнгын Ажиллагааны шуурхай штабыг байгуулав. Тус штаб-д Ерөнхийлөгч И Жэ Мён үерийн аюулын эрсдэл өндөртэй газруудад далан суваг босгож, иргэдийг аюулгүй газарт шилжүүлэх, муж, хотуудын дэргэдэх мэргэжлийн байгууллагын хүн хүч, техник хэрэгслийн бэлэн байдлыг хангуулах үүргийг тус тус өгчээ.

Цаг уурын байгууллагын мэдээлж буйгаар Өмнөд Чүннам, Жолла мужуудад нэг өдөрт орсон хур тунадаснаас хэмжээ 386 мм-т хүрсэн нь манай улсын нэг жилийн нийлбэр хур тунадасаас илүү хэмжээ юм.

Иймд БНСУ-д оршин суугаа Монгол Улсын иргэд та бүхэн сонор сэрэмжтэй байж болзошгүй үер усны аюулаас урьдчилан сэргийлэхийг хүсье.

Яаралтай асуудлаар ЭСЯ-ны Консулын хэлтсийн шуурхай дугаар (010-9595-3464) болон фэйсбүүк https://www.facebook.com/embassyofmongolia/ цахим хуудсаар холбоо барина уу.

Монгол Улсаас БНСУ-д суугаа ЭСЯ