АСЕМ-ын түнш зочид буудлуудын тогооч нарт сургалт явууллаа

АСЕМ-ын Дээд түвшний уулзалтын Байр, зочид буудлын асуудал хариуцсан ажлын хэсгээс Хөдөлмөрийн яамны харьяа Хөдөлмөр эрхлэлтийн үйлчилгээ, судалгаа, мэдээллийн үндэсний төвтэй хамтран АСЕМ-ын  түнш зочид буудлуудын тогооч нарыг мэргэшүүлэх ээлжит сургалтыг  4-р сарын 23-24-нд Технологийн дээд сургуулийн байранд зохион явууллаа.

Энэ удаагийн сургалтад 100 гаруй тогооч хамрагдаж олон улсын хоол үйлдвэрлэлийн стандарт, дэлхийд алдартай 4-6 нэр төрлийн европ хоол хийх арга,  хүнсний түүхий эд, орц материалын сонголт, хадгалалтаас эхлээд тэжээллэг чанарыг нь нэмэгдүүлэх, харшилтай болон чихрийн шижинтэй хүмүүс, цагаан хоолтнуудад зориулсан зоог бэлтгэх зэрэг арга технологиос суралцлаа.

Сургалт дадлагын болон лабораторийн гэсэн хоёр хэсэгтэй бөгөөд Европийн өндөр зэрэглэлийн ресторануудад ажиллаж байсан мэргэжлийн багш нар удирдан явуулсан юм. Оролцогчид далайн гаралтай хүнсний шинэхэн бүтээгдэхүүнийг хэрхэн цэвэрлэх, бэлтгэх арга технологийг ихээхэн сонирхож байв.  Учир нь Монголд ихэнх далайн бүтээгдэхүүнийг хөлдөөсөн, эсвэл анхан шатны боловсруулалт хийгдсэн байдлаар оруулж ирэх нь түгээмэл бөгөөд уг сургалтаар хавч, загас, наймаалж зэргийг шинээр нь хэрхэн богино хугацаанд технологийн дагуу боловсруулж, хоол хийхийг дадлага, оролцооны аргаар зааснаараа онцлогтой байв.

АСЕМ-ын уулзалтын үеэр дэлхийн олон орноос зочид төлөөлөгч ирэх учир зочид буудлуудын тогооч нарт уламжлалт болон түгээмэл европ хоолнуудаас гадна цагаан хоолтой, чихрийн шижинтэй хүмүүст зориулан тусгайлсан зоог бэлтгэх арга технологиос цувралаар зааж байгаа юм.