Монголчууд хаан сонголтоо хийсэн,хэн ч маргах эрх байхгүй

Монголын ард түмэн улстөрийн сонголтоо хийлээ. Хэн ч ард түмний сонголтыг зөв, буруу гэж шүүмжлэх эрх байхгүй. Энэ бол хаан сонголт. Ардчилсан намын дарга З.Энхболд, Ерөнхий сайд Ч.Сайханбилэг, Р. Гончигдорж, Н.Алтанхуяг,  ЗГХЭГ-ын дарга С.Баярцогт, Ерөнхийлөгчийн Тамгын газрын дарга П.Цагаан, “Фортуна” Н.Батбаяр, УИХ дахь АН-ын бүлгийн дарга Б.Гарамгайбаатар, Л.Гантөмөр, Хууль зүйн сайд асан Х.Тэмүүжин, М.Батчимэг, Л.Эрдэнэчимэг гээд УИХ-ын гишүүд   энэ удаагийн сонгуулиар өвдөг шороодлоо. Эзний алба ээлжтэй,хааны алба халаатай хойно хэн ч юу ч ярих нь илүүц. МАН-ын нэр дэвшигчид 65 тойрогт ялалт байгууллаа. Ард түмэн сонголтоо хийвэл хийсэн шиг хийдэг аж. Энэ удаагийн сонгуулиар Монголын ард түмэн ямар хүмүүсийг төрд сонгов гэвэл, төрийн хүний ёс зүйг дээдлэж, хэлсэндээ хүрдэг, хэлсэн амлалтаа мартдаггүй байнга санаж явдаг тийм л хүмүүст төрд зүтгэх боломж олгохоор шийдэв. Магадгүй, хэн ч гэсэн   өргүй, өлсөхгүй амьдрах эрхтэй шүү гэдгийг сануулсан сонголт ч байж мэднэ. Өнөөдөр ард түмэн үнийн дарамтад сөхөрсөн, хоёр идэхгүй хоосон хонохгүй гэж чардайсан байдалтай байгааг бүгд мэдэж буй.  Эх орны минь эдийн засаг сэхээнд байгаа, маш их “эмчилгээ” хийлгэж байж хөл дээрээ босох байх. МАН-ынхан 22 тэрбум долларын өртөй улс хүлээн авч байгаа.  Ирэх жилээс үйлдвэрүүд бондын зээлээ төлж эхэлнэ. Бодлогын төвшинд нийгэм эдийн засгийн бүх салбарыг босгох хүндхэн даалгавар тэдэнд ногдож байна. МАН-д ард түмнээ өөд нь татах,ядарсан амьдралыг нь босгох  том хариуцлага ирлээ. Харин Ардчилсан намд ардчилсан нам болох том боломж гарч байна. Амжилт хүсье.  АН-аас УИХ-д сонгогдсон  гишүүд болон МАХН-ын С.Баасанхүү,бие даан нэр дэвшиж ялалт байгуулсан С.Жавхлан нар саарыг “хазаарлаж”, сайныг “ташуурдан” дэмжиж байгаасай. Зуны сайхан өдөр монголчуудыг сонгуулийн бурхан тэнгэр ивээлээ,төр эргэлээ. Одоо сонгогдож чадаагүй нь гоморхох, сэтгүүлчдэд элдэв гомдол санал ярих хэрэггүй. Тэгвэл унасан бөхөд шалтаг мундахгүй гэдэгтэй адил болно. Тэр тэгсэн, энэ ингэсэн гэж ярьж байгаа нэр дэвшигчид “өөрөө унасан хүүхэд уйлдаггүй” гэдгийг санаад дуугүй болсон нь дээр. Ялалт, ялагдал аль алиныг хүлээж авч сурах хэрэгтэй. Ард түмний сонголттой маргах эрх хэнд ч байдаггүй билээ.

2016 ОНЫ УИХ-ЫН СОНГУУЛИЙН ДҮН: /Урьдчилсан мэдээ/