Төрийн ажилтныг зодсон “Эрэл”-ийн Б.Эрдэнэбатыг даваа гарагт шүүнэ

Нэгэн цагт УИХ-ын гишүүн,Түлш эрчим хүчний сайд явсан “Эрэл”компанийн захирал Б.Эрдэнэбат шүүхээс ял сонсох нь тодорхой болжээ. Юуны учир гэвээс, тэрээр Хөгжлийн банкаар дамжуулан “Чингис”,”Самурай” бондоос зээл авчихаад үр ашиггүй зарцуулж, завшсан аж. Иймээс АТГ-аас шалгасан. Тухайн үед АТГ-ын мөрдөн байцаагчид түүний гэрт үзлэг шалгалт хийсэн байна.

Гэтэл Б.Эрдэнэбат авлигатай тэмцэгчдийг эсэргүүцэн уурлаж,комиссарыг нь алгадаж зодсоныг тухайн үед хэвлэлээр мэдээлж байсан. Уг хэргийг Хан-Уул дүүргийн цагдаагийн хэлтсээс эрүү үүсгэн шалгаж,прокурор яллах дүгнэлт үйлдэн шүүхэд шилжүүлжээ.

Ирэх даваа гаригт Б.Эрдэнбатыг шүүх хурал болно. Түүнд Эрүүгийн хуулийн 230.1-д заасны дагуу “Төрийн албан хаагчийг хуулиар хүлээсэн үүргээ биелүүлэх явцад хүч хэрэглэн эсэргүүцсэн” гэх үндэслэлээр эрүүгийн хэрэг үүсгэн шалгасан бөгөөд хэрэв буруутай нь нотлогдвол 1-1.6 жилийн хорих ял оногдуулах аж.

Хуулийг “талх” мэт хэрэглэдэг ардчилсан нийгэмд хуулийн дагуу ажиллаж явсан төрийн ажилтныг хэний хэнбугай ч барьж аваад ”гөвөөд” хаячихаж болохгүй нь угаасаа тодорхой. Гэтэл Б.Эрдэнэбат “Манайхыг хамаагүй нэгжлээ. Нүдэн дээр хамаг эд зүйлсийг онгичиж доромжиллоо” хэмээн байцаагчийг “хашраажээ”. Юутай ч шүүх буруу зөвийг шүүн тунгаах цаг болжээ. Түүнээс гадна Б.Эрдэнэбаттай холбоотой бас нэг хэргийг АТГ шалгаж буй. Тэрээр 23 сая ам.долларын зээлээ төлөхгүй “луу унжиж” яваа гэх.

Үүсгэн байгуулсан “Эрэл” компаниараа овоглодог Б.Эрдэнэбатад хэдэн жилийн өмнө бизнесийн бараг бүх салбарт нэр нь мандаж явсан үе бий. Цаг цагаараа байдаггүй болохоор унаж босох нь хаана ч байх. Хэрэв бизнесээ өөд татах гэж зээл авсан бол төлөх нь гарцаагүй. Харамсалтай нь,тэрээр эргэн төлөлтөө мартжээ.

Баттай эх сурвалжийн мэдээллээс үзвэл, Б.Эрдэнэбат Хөгжлийн банкнаас ямар ч барьцаагүйгээр 23 сая ам.долларын зээл авчихаад төлөөгүй өдий хүрчээ. Эхлээд 14, дараа нь 9 сая ам.долларыг зээлсэн аж.

Дашрамд дуулгахад,Хөгжлийн банкны захирал асан Н.Мөнхбат,Эдийн засаг,хөгжлийн сайд асан Н.Батбаяр нарыг “Чингис”,”Самурай” бондын мөнгийг үр ашиггүй зарцуулж,завшин улсад 1.3 их наяд төгрөгийн хохирол учруулсан хэргээр ЦЕГ,АТГ,УЕПГ,ЭЦГ-аас хамтран шалгаж байгаа. Шалгалтаар “Шинэ төмөр зам” төслийн ажлын төсөв гүйцэтгэлийн хүрээнд хуулийн зөвлөх үйлчилгээнд 3.2 сая, техникийн зөвлөх үйлчилгээнд 3.0 сая,санхүүгийн зөвлөх үйлчилгээнд 1.6 сая ам.доллар зарсныг тогтоосон байна.

Түүнчлэн“Хаан”банкны зээл хүүгийн төлбөрт 6.5 сая ам доллар гаргажээ. Таван толгойн цахилгаан станц төслийн техникийн зөвлөх үйлчилгээнд 729 мянган ам.доллар,хуулийн зөвлөх үйлчилгээнд 1 сая 414 мянган ам.доллар гэх зэрэг арай дэндүү үнэтэй зардал гаргасныг шалгаж байгаа юм.

Н.Намуун