С.Гантогоотой “Гольф & кофе” нэвтрүүлгээр уулзаарай

NTN телевизийн долоо хоног бүр гардаг “Гольф & кофе” нэвтрүүлгийн энэ удаагийн зочноор “Яг түүн шиг” шоу нэвтрүүлгийн оролцогч С.Гантогоо уригджээ. Монгол үзэгчдийг байлдан дагуулж,бүтэн сайны орой бүр телевизийнх нь өмнө “уяж” байгаа шоунд авъяас чадвараараа олныг гайхшруулж буй тэнгэрлэг залуутай сэтгүүлч С.Отгонмөнх ярилцана.

“Яг түүн шиг-2” шоунд оролцож үзэгчдийн хайр талархлыг хүлээж байгаа С.Гантогоо нь олны танил бусад жүжигчин, дуучдыг бодвол Монголд төдийлөн танигдаагүй. Гэхдээ тэрээр Өмнөд Солонгосын хөгжмийн салбарт чамгүй сайн үнэлэгдсэн авъяаслаг нэгэн билээ.

Бусдын адил Солонгос руу явсан түүний зорилго нь ар гэрийнхэндээ санхүүгийн тусламж үзүүлэх, дүү нарынхаа сургалтын төлбөрийг олох, амьдралаа дээшлүүлэхэд байсныг тэрээр нуудаггүй. Тэнд ажиллах гэрээний хугацаа дуусахын өмнөхөн С.Гантогоо “Дуучин шалгаруулж авна” зарын дагуу анкет бөглөж, шалгаруулалтад тэнцсэнээр урглагийн ертөнцөд хүчээ үзэх зам нь нээгджээ. Түүнтэй хийсэн ярилцлага маш сонирхолтой байх болно.

Телевизийн нэр хүндтэй сэтгүүлчдийн нэг С.Отгонмөнхийн хөтөлдөг “Гольф & кофе” нэвтрүүлгийн энэ дугаарыг та 5 дугаар сарын 28-ны 18:30 цагаас хүлээн авч үзээрэй.