Элэг шилжүүлэх мэс заслын багийнханд www.ontslokh.mn сайтынхан баяр хүргэж байна

Хавдар судлалын үндэсний төвийн элэг шилжүүлэн суулгах хагалгааны багийнханд манай www.ontslokh.mn сайтын хамт олон баяр хүргэж байна. Бас цаашдын ажилд нь амжилт хүсье. Монголд анх удаа элэг шилжүүлэх мэс заслыг амжилттай гүйцэтгэсэн талаар  хагалгааны багийнхан хэвлэлийн хурал хийж мэдээлэл өглөө.  ХСҮТ-ийн захирал Ж.Чинбүрэн “Анхны хагалгааг 42 настай эрэгтэйд хийлээ.  Түүний 20 настай дүү донор боллоо. Хагалгаа гурван шатыг хамарсан нэлээд хүнд хэлбэрийн хагалгаа байсан тул хагалгааны багт 40 гаруй эмч оролцлоо. Хагалгаанд Солонгосын “Самсунг” эмнэлгээс эмч нар ирж хамт оролцсон. Хагалгаа долоон цагийн турш үргэлжилж, амжилттай дууссан. Харин донорын хагалгаа буюу элгээ өгч байгаа залуугийн хагалгаа таван цаг үргэлжилсэн. Хагалгааны явцад цус алдаагүй, цус юүлээгүй, хагалгаа хуурай хийгдсэн байгаа юм. Элэг шилжүүлэн суулгасан 42 настай эрэгтэй гурван жил манай хяналтад байсан. Түүний хавдар өнгөрсөн оны 11 дүгээр сараас идэвхжсэн. Бид “Самсунг” эрүүл мэндийн багтай хамтран 11 дүгээр  сараас хойш хагалгаа хийхээр төлөвлөсөн. Өнөөдрийн байдлаар өвчтөний биеийн байдал тогтвортой, шинжилгээний үзүүлэлт хэвийн байгаа. Донор нь ердийн тасагт шилжсэн байна. Засгийн газрын 100 хоногийн ажлын тайлан гарч буй энэ үед элэг шилжүүлэн суулгах хагалгаа үнэ төлбөргүй хийгдсэн. Засгийн газраас улсын нэгдүгээр төв эмнэлэг, Хавдар судлалын үндэсний төвд төсвийг суулгасан. Бид энэ төсвөөр хагалгааг үнэгүй хийсэн”  гэдгийг онцоллоо.