“Оргио” тахиа Монголынх мөн үү,биш үү

УИХ-ын гишүүн О.Содбилэгийн эхнэр Э.Туулын “Ажигана” ХХК-ийн “бараа” хил дээр саатуулагдсан тухай мэдээллийг сэтгүүлч Л.Мөнхбаясгалан сошиалаар түгээсэн. Тус компани нь монголчуудын амтархан иддэг “Оргио” тахианы аж ахуйг эрхлэн, жинхэнэ монгол тахианы мах зах зээлд нийлүүлдэг гэж олон даяараа итгэдэг байсныг эргэлзэхэд хүргэсэн. Шувууны ханиад дэлгэрсэн хориотой бүс нутгаас тус компани олон тооны дэгдээхэй оруулж ирснийг  буруутган бичсэн сэтгүүлч  Л.Мөнхбаясгалангийн мэдээллийн хариуд  “Ажигана” ХХК мэдэгдэл хийсэн байна.

Уг мэдэгдэлд “Ажигана” ХХК нь 2012 оны 9 дүгээр  сард Үндэсний хөрөнгө оруулалтаар махны чиглэлийн тахианы аж ахуйг байгуулж, 2013 оны 9 сараас эхлэн “Оргио” нэрийн зургаан төрлийн бүтээгдэхүүнийг зах зээлд гаргаж байсан бөгөөд одоо зах зээлд нийт 10 төрлийн бүтээгдэхүүн нийлүүлж байна.

Эх орны хөрсөнд ургасан химийн найрлагагүй үр тариаг боловсруулан “Оргио”-гийн тэжээлийн үйлдвэрт тахианы тэжээлээ бэлтгэж,  эрүүл мах үйлдвэрлэн хэрэглэгчдэд хүргэж байгаа бөгөөд “Хүнсний аюулгүй байдлын тухай хууль”, “Хөдөлмөрийн аюулгүй байдал, эрүүл ахуйн тухай хууль”, Олон Улсын ISO, HACCP стандартыг ханган үйлдвэрлэл, тээвэрлэлтийг хийж зах зээлд нэвтрүүлсэн юм. “Ажигана” ХХК нь дэлхийд цөөн байдаг, Монголдоо анхны, хангамжийн бүрэн нэгдсэн бүтэцтэй тахианы махны цогцолбор аж ахуйг бий болгон ажиллаж байна. Энэхүү бүтцийн давуу тал нь тахианы махны үндсэн түүхий эд болох үр тариа, махны чиглэлийн өндөгнөөс мах бэлтгэх хүртэлх бүх үе шатыг цогцолбор аж ахуйнхаа хүрээнд бий болгодог нь түүхий эдийн чанарт хяналт тавьж, хэрэглэгчдийг эрүүл, итгэлтэй хүнсээр хангах боломжийг олгодог” гэдгийг онцолсон байна.