Ротаричууд ТҮК-ийн ажилчдад дулаан хувцас бэлэглэлээ

Монголд Ротари хөдөлгөөн үүсэж хөгжсөний 25 жилийн ой 2020 оны хавар тохионо. Дэлхийн 192 орны 1.2 сая гаруй хүнийг нэгтгэсэн Ротари хөдөлгөөн нь “Өөрөөсөө давж бусдад үйлчилье” гэсэн уриатай бөгөөд эх хүүхдийн эрүүл мэнд, саа өвчнөөс урьдчилан сэргийлэх, боловсрол, ус ариун цэврийн байгууламж, орон нутгийн хөгжил, энхтайвны чиглэлээр олон мянган төслийг дэлхий даяар хэрэгжүүлдэг юм.

Монгол дахь Ротари хөдөлгөөнд нэгдсэн 1000 гаруй гишүүд 18 клубт харьяалагдан нийгмийн сайн сайхны төлөө олон төсөл хөтөлбөрийг хэрэгжүүлдэг. Эдгээр төслийн нэг нь “Дулаан хувцас-халуун сэтгэл” аян юм.

Монголын хамгийн анхны Ротари клуб болох “Улаанбаатар Ротари” клуб нь өөрсдийн байнга дэмжиж ирсэн асрамж халамжийн газрын хүүхдүүд,дулаан хувцас шаардлагатай иргэддээ Солонгосоос импортлосон шинэ, хувцсыг энэ аяны хүрээнд түгээж байна. Нийт 51 сая төгрөгний үнэтэй 1460 ширхэг цоо шинэ дулаан хувцсыг тэд энэ удаа ТҮК-ийн ажилчдад бэлэглэсэн юм. Тодруулбал, “Улаанбаатар Ротари” клуб хурлаараа хэлэлцээд Улаанбаатар хотыг цэвэр цэмцгэр байлгахын төлөө өөртөө зориулан дэлгүүр ч хэсэх завгүйгээр цаг наргүй ажилладаг Сүхбаатар дүүргийн тохижилт үйлчилгээний компаний ажилчдад 500 гаруй хувцас бэлэглэх шийдвэр гаргажээ. Ингээд аравдугаар сарын 17-ны өдөр ТҮК-ийн 100 гаруй ажилчдад 548 ширхэг шинэ, дулаан хувцсыг гардуулж өгөв.Олон улсын Ротаригийн 3450 дүүргийн X бүсийн Захирагч бөгөөд Сүхбаатар дүүргийн Иргэдийн Хурлын дарга Э. Ганбат, “Улаанбаатар Ротари” клубын нарийн бичгийн дарга С. Энхтуяа, клубын гишүүн Г.Ундрах нар тус үйл ажиллагаанд оролцов.

Мэдээллийг бэлтгэсэн

Улаанбаатар Ротари клубийн

Нарийн бичгийн дарга

Сүхбаатарын Энхтуяа

Утас: 9900 4924