Цар тахлын үед өндөржүүлсэн бэлэн байдалд ажиллаж буй алба хаагчдыг түрээслээд өмчлөх орон сууцаар хангах шийдвэрийг Монгол Улсын Засгийн газраас гарган, хэрэгжүүлж байгаа.
Энэ хүрээнд эрсдэлтэй нөхцөлд ажилладаг Ус сувгийн удирдах газрын урьдчилан цэвэрлэх байгууламж, Төв цэвэрлэх байгууламжийн нийт 10 ажилтан өнөөдөр орон сууцны батламжаа гардан авлаа.
Батламжийг гардуулан өгсөн Улаанбаатар хотын Захирагчийн үүрэг гүйцэтгэгч Ж.Батбаясгалан “Эрсдэлтэй нөхцөлд ажилладаг эрэлхэг залуусаараа бахархаж явдаг. Дэлхий даяар дэгдэж буй цар тахлаас гадна Улаанбаатар хотын иргэдийн аюулгүй байдлыг хангахын төлөө өөрийн эрүүл мэндээ үл хайхран ажиллаж байгаа алба хаагчдынхаа нийгмийн асуудлыг шийдвэрлэхэд НЗДТГ, нийслэлийн Захирагчийн Ажлын алба, Ус сувгийн удирдах газар дуу нэгтэйгээр дэмжиж ажилласан. Тарж болохуйц аюулыг цэвэрлэж, байгальд саарал усыг хүргэж буй цэвэрлэх байгууламжийн ажилтнуудын нийгмийн асуудлыг шийдвэрлэхээр Улсын Онцгой комисст тавьсны дүнд өнөөдөр орон сууцны батламжийг өгч байгаадаа баяртай байна” гэлээ гэж Монгол Улсын Шадар сайдын Ажлын албанаас мэдээллээ.