ОХУ-д төгсөгчдийг дэмжих клуб байгуулна

 “Монгол-Оросын найрамдал, хамтын ажиллагааны өдрүүд-2020” арга хэмжээний хүрээнд Оросын шинжлэх ухаан, соёлын төв (ОШУСТ буюу РЦНК)-д өчигдөр боллоо. Энэ үеэр Орос/ЗХУ-д төгсөгчдийн чөлөөт уулзалт-ярилцлага болж, төгсөгчдөө дэмжих зорилго бүхий клуб байгуулах тухай мэдээллийг уулзалтанд оролцлогчид талархан хүлээж авлаа. Энэхүү уулзалтыг 60 дахь удаагаа тохиож буй найрамдал, хамтын ажиллагааны өдрүүдийн арга хэмжээний хүрээнд Орос/Зөвлөлтөд сургууль төгсөгчдийн МАВСУЗ холбоо ОШУСТ-тэй хамтран зохион байгуулсан юм.

Тухайн үеийн тэргүүний сэхээтнүүдийн санаачилгаар 48 жилийн тэртээ байгуулагдаж, 40 гаруй мянган төгсөгчдийг эгнээндээ нэгтгэсэн МАВСУЗ холбоо нь төгсөгчдийнхөө мэргэжлийн эрх ашгийг хамгаалах, үүсгэл санаачилгыг нь дэмжин дэлгэрүүлэх, Монгол-Оросын бүх талын харилцаа, хамтын ажиллагааг сурталчлах үүрэг, зорилго бүхий байгууллага болохыг МАВСУЗ холбооны дэд дарга, Монгол Улсын гавьяат багш Д.Цогзолмаа уулзалтын эхэнд танилцуулаад сүүлийн үед тус холбооноос зохион байгуулсан зарим томоохон арга хэмжээ, 2021 онд тохиох Монгол Улс, ОХУ-ын хооронд дипломат харилцаа тогтоосны 100 жилийн түүхт ой угтан явуулж буй үйл ажиллагааныхаа талаар товч дурдлаа.

МАВСУЗ холбооны дэргэд байгуулах Төгсөгчдийг дэмжих клуб нь төгсөгчдийнхөө хөдөлмөр эрхлэлтэнд анхаарч, ажилд ороход нь туслах менторшип хөтөлбөр хэрэгжүүлэх, тэдний тасралтгүй боловсрох орчинг бүрдүүлэх үүднээс сургалт, семинар зохион байгуулах, төгссөн сургуультай нь холбож мэргэжил, мэдлэгийг нь дээшлүүлэхэд туслах, төгсөгчдийн уулзалт үдэшлэг, урлаг спортын арга хэмжээг зохион байгуулах зэрэг чиглэлээр ажиллахаар төлөвлөж байгаагаа ОХУ-аас Монгол Улсад суугаа ЭСЯ-ны зөвлөх, Россотрудничество агентлагийн Монгол Улс дахь төлөөлөгчийн газрын тэргүүн, Улаанбаатар хот дахь ОШУСТ-ийн захирал Амгалан Базархандаев энэ үеэр мэдээлсэн юм.

Уулзалтанд 1970-1980-аад онд ЗХУ-д сургууль төгссөн ахмадуудаас аваад сургууль төгсөөд удаагүй байгаа шинэ үеийнхэн, одоо сурч буй оюутан залуусын төлөөлөл ч оролцсон бөгөөд урьд өмнөх уулзалтуудтай харьцуулахад залуучуудын оролцоо зонхилж байснаараа энэ удаагийн уулзалт онцлог байв.

Уулзалтын үеэр Оросын хамгийн өрсөлдөх чадвар сайтай, нэр хүндтэй сургуулиудын нэг болох Москвагийн Эдийн засгийн дээд сургуулийн (Высшая школа экономики) гадаад оюутны элсэлт хариуцсан менежер Екатерина Синцова, тус сургуулийн оюутан Бумдарь нартай онлайн уулзалт хийж, ОХУ-ын Засгийн газрын болон бусад тэтгэлгээр тус сургуульд суралцах боломжийн талаар хэлэлцлээ.

Арга хэмжээний үеэр бизнесийн салбарт оросуудтай ажил хэрэгч хамтын ажиллагаа өрнүүлэх өргөн боломжийн талаар МҮХАҮТ-ын Оростой хамтран ажиллах ажил хэргийн зөвлөлийн гүйцэтгэх захирал Э.Оюунтэгш, Монголд Оросын инновацыг нэвтрүүлэх чиглэлээр Нийслэлийн шинжлэх ухаан, үйлдвэрлэл, инновацын газрын Шинжлэх ухаан, технологийн хэлтсийн дарга Г.Жаргалмаа нар ярьсан юм. Мөн МАВСУЗ-ын Гүйцэтгэх захирал Ц.Шүрэнчимэг ОХУ-ын боловсролын салбар дахь шилдэг нээлт, инноваци технологийг Монголын боловсролын салбарт, ялангуяа анагаах ухаан, инженер техникийн талбарт нэвтрүүлэх асуудлыг хөндөхийн сацуу шинээр төгссөн залуу үеэ халамжлах нэг гол чиглэл нь Орост төгссөн бизнесийн болон мэргэжлийн олон жилийн туршлага бүхий ментор зөвлөхүүд Монгол дахь Оростой хамтарсан байгууллагуудад ажилд ороход нь залууст зуучлах, зах зээл дэх байр сууриа олж авахад нь зөвлөгөө өгөх менторын үйлчилгээ, менторшип хөтөлбөр хэрэгжүүлэхийн чухлыг онцлон тэмдэглэж байв.

Удахгүй МАВСУЗ холбооны ээлжит бага хурал болох бөгөөд энэ удаагийн уулзалтын үеэр гарсан санаа оноо, оролцогчдоос бичгээр авсан санал асуулгын хариултуудыг цэгцэлж бага хурлын шийдвэрт тусгах, холбооны Удирдах зөвлөлийн бүрэлдэхүүнд шинэ сэргэг, идэвхтэй хүмүүсийг сонгоход энэ удаагийн уулзалт зохих хувь нэмрээ оруулна гэж уулзалт зохион байгуулагчид үзэж байна.