Сүнсэнд шингэсэн гэмшил

Төрийн соёрхолт, МУСГЗ Цэндийн Доржготовын “Сүнсэнд шингэсэн гэмшил”өгүүллэгийг уншигч танд хүргэж байна.

Сэдваанчиг Сэрээдэнэ хоёр дөрвөн ханатдаа утаа уугиулж дөнгөхөө болив. Нас гэж талийсан хоёр. Аргагүй л ийм болдог хорвоо байж. Эмгэн “Дулаан газар өвөлжинө өө” гээд охиныдоо төвлөж, өвгөн уулын мухрын өвөлжөөнд отгон хүүгийндээ хоцорчээ. “Малын амьсгаа, хөх өтгөнөөсөө хол үхэхгүй” гэж Сэдваанчиг бөглөрөх гэж буй мэнгэртэй цээж хяхтнуулжээ.

Арав дугаар анги дүүргээд сургуулиас завсардсан хоёр ач нь отгон хүү бэр хоёрт нь бүл болохоор тэднийд өвгөнтэй хамт өвөлжив. Хоёр ач отгон хүү бэртэйгээ Сэдваанчигт тун сайхан. Гэхдээ насыг хамт элээсэн эмгэнээ сэмхэн их үгүйлнэ. Тэрсхэн хоёр ач нь дүрсгүйтэх нь ядарсан өвгөнд халгаатай ч “тэсвэрлэе” гэж хатуу шийдсэн учир нүд аньж, эрх эргүүлсээр өдрийг барна. Хааяа амсхийх зуур хоёр ачдаа бөх ярьж, шилээ шөргөөж, цээж ханхалзуулах санаатай. Уг нь мань эр залуудаа бузгай барилдаж, сумын наадамд түрүүлж байсан агаад бяр нь багтахгүй бөх болж харагдахын тулд хоолойгоо шахаж бүдүү дуугарах, их идэх гэж мангарлах, мөн бөхөрхүү алхаа гишгээгээр алцганаж явсан нас түүнд бий. Зөнөг өвөөгөө уйдсан хоёр ач нь ёргионо. Өвгөн янхир араг яс хэрзэгнүүлснээ юм бараг үзэхээ больсон мөндөр шиг хоёр цэхэр нүдээр ач нарынхаа бие бялдрийг шинжин гөлөрч гөлөрч,

-Та муу хоёр золигт уг нь бөхийн удам гарцаагүй байх ёстой сон гэж сөөнгөдөхөд удахгүй нөмрөх үхлээ мартчихав уу гэмээр цоглог хийморь чалхгүй болсон нүүрэнд нь гийсэн авч төдөлгүй архаг мэнгэрийн цэр дүүрсэн цээж нь унтрахын дохио зарлаж, ой гутам хэржигнэснээ нэгэн битүүхэн дорой авиа болон тээр цааш хяхатнасаар завхрав.

Өвгөн гэр дулаацсан хойно яарамгүй өндийнө. Нэг өглөө хоёр ач нь малдаа явахын өмнө дундаа төмпөнтэй мах тавьчихсан идэж сууснаа хоорондоо шивнэлдэж хөхрөлдөөд байх юм. Өвгөн сэм харвал бөхийн удамт нөгөө хоёр чинь үхрийн бадруун сээр хуга шаах гэж буй болтой. Ээлжлээд л нөгөө сээрийг нүцгэн нударгаараа дэлсэх юм. Сээр хугардаггүй ээ. Дахиад л гөвших юм. Өвгөн “Зөв! Дахиад сайн шаа!” гэж дотроо сэм дэмжив. Нөгөө хоёрын гар нь өвдсөн болтой “ёо ёо” хэмээн гараа үлээцгээн, унан тусан хөхрөлдөж хөхрөлдөж, сээрээ хугалж дийлэлгүй гарцгаав. Өвгөн “Эвий нь л олсонгүй дээ. Тэрнээс биш сээр хуга шаадаг л юм гэсэн. Би тэгж сээр хугалж үзээгүй ээ. Хоёр хүү минь эвий нь л олсонгүй. Миний удамд сээр хуга шаах хүү заавал төрөх ёстой сон” гэж хэвтлээ.

Сэдваанчиг босож, бэрийнхээ гарын цайг зооглож, цагаан тос зөөлөн боов шүдгүй амандаа маймарч сууснаа төмпөнтэй мах авч амандаа үмхчихмээр зөөлөн юм эргүүлдэв. Тэгтэл хоёр ачий нь хугалж дийлээгүй, мөлжүүртэйгээ үхрийн сээр нүдэнд тусчээ. Өвгөн сээрийг авч эргүүлж тойруулж үзсэнээ хэрзгэр том ясан гараараа дэлсэж орхитол сээр хуга үсрээд хоёр хэсэг болон төмпөнд тон хийн ойчив.

Гайхсан бэрий нь нүд орой дээрээ гарснаа,

-Аав аа, та яасан мунадаг юм бэ гэж дуу алдахад Сэдваанчиг додигорхон зуумалзсан боловч бярандаа таарсан хариу үг олсонгүй.

Эзгүй ууланд өвөлжингөө уйссан бэр гадаа үхрийн зэл цэвэрлэж буй хоёрт зэлүүд нутагт ховор юмны нэг-хөгжилтэй мэдээ дуулгаж баясгахаар нөгөө хугархай сээрийг нэг нэгээр нь хоёр гартаа олимпийн бамбар мэт мандуулсаар гарч гүйлээ.

Өвгөн их маадгар “хоёр ачийгаа хугарсан сээр үзээд яах бол?” гээд инээмсэглэн хоцров.

Зэлний хүйдэс хамж байсан нөгөө хоёр луу бэргэн гүйж очоод хугархай сээрээ үзүүлж,

-Та муу хоёр үүнийг хар! Намайг харж байхад аав ганцхан шаагаад ингээд хоёр хэсэг болгочихлоо гэвэл нөгөө хоёр үхэтлээ инээж,

-Үгүй ээ! Наад сээрийг чинь бид хоёр өвөөд мэдэгдэлгүй төмрийн жижиг хөрөөгөөр сэм хөрөөдөөд, арай салгалгүй, хөрөөдсөн газраа өөхөөр сайн шаваад тогтоочихсон юм. Харин та өвөөд битгий хэлээрэй! Бид хоёр өвөөгөө үхэхээс нь өмнө ганц сайн баярлуулах гэсэн юм гээд хоёул гэрт уралдан гүйж орлоо.

Тэгээд бөх өвөөдөө,

-Өвөө та ямар мунадаг юм бэ? Та яаж тэр үхрийн сээрийг хуга шааж чадав аа? Бид хоёр таван сарвуугаа бяцартал зөндөөн гөвшөөд хугалж дийлээгүй юм шүү дээ гэвэл өвөө нь баяртайгаар,

-Юманд чинь эв гэж бас нэг байдаг юм. Дан хар бяраар бөх болохгүй шүү гэж сургамжилсан харцаар мялаажээ.

Дүрсгүй уйдсан хоёр ач нь “Өвөө та одоо ийм бяртай байгаа юм чинь залуудаа ёстой аварга бөх байсан байх аа” гээд толгой сэгсрэн магтлаа. Хоёр ачийнхаа магтаалыг Сэдваанчиг сонсоод сэтгэл нь хөөрсөндөө умс шиг хөх нүүрээ үрчийлгэн уйлав. Ач нарын нь хоолой зангирч өвөөгөө дагаад золтой л уйлчихсангүй. Гэсэн хэдий ч “Манай өвөө гартаа ямар аймаар хүчтэй юм бэ” гэж шогширсоор. Өвөө нь хөөрч хэнхэлзсээр. Үндсэндээ тэр гурав ийнхүү наргиж, урт өвлийг барж буй билээ.

Хавар болж, газрын намд бууж, дулаарч, тараг сүү дэлгэрэх үед эмгэн Сэрээдэнэ хөдөөлж, бие биенээ санасан өвгөн эмгэн хоёр дөрвөн ханатаа юуны түрүү овойлгов. Хоёул тусдаа гал голомтоо бадраах нэг л ондоо. Сүүлийн жилүүдэд хоёул яльтай яльгүй юмнаас үг сөрмөлцөж муудалцах тэр ч байтугай хэрэлдэх болсондоо хоёул гэмшиж харамссан гээч. Өвлийн хэдэн сарыг тус тусдаа өнгөрөөсөн хоёр хөгшин бие биедээ их л эелдэг хэд хонов.

Тэгтэл хэрэг бишидлээ: олон ач зээ нараасаа болж тэр хоёрын хэрүүл үүсдэг юм. Бас л тэгжээ. Өвгөн хэнийг  зэмлэж, хэнийг буруутгана, тэр болгоныг эмгэн тас өмөөрнө. Өвгөнд энэ нь их лайтай. Эмгэн ямагт өвгөнийг үгүйсгэж, хүүхдүүдээ зөвтгөнө. Хүүхдүүдээ дэс дараалан зөвтгөж, өвгөн тэр болгонд дэс дараалан буруудна. Үзэлцэж гарлаа.

Хэрүүл дээр санаандгүй орж ирсэн отгон хүү эргэнэг хавиар идэж уух юм хайнгаа бие бие рүүгээ давшлан хэрэлдэж буй зөнөг эцэг эхээ хайхрамжгүй атлаа гайхан нэлээд харж харж,

-Яваад бай, яваад бай. Давшаад бай, давшаад бай гэж ташуур өгч дохуурхаад гарч одов.

Хүүгээ гарсны дараа хоёр хөгшин үнэнхүү давшилтад орлоо. Хэрүүл ч гаарлаа. Эцэст нь өвгөний тэвчээр барагдаж, уур нь оргилж, байх суух газраа олж ядав. Уухилав. Оволзов. Хүүхэд бүрээ зөвтгөж, өвгөнийг буруутгах гэж ухаангүй улайран зүтгэх эмгэндээ хэлэх муу үг олсонгүй. Дэмий л,

-Чи муу Төрийн хутгуур! гэж цоллов.

Хамгийн муу үгээ цээрлэлгүй хэлж, өшөөгөө авч буй нь тэр.

Төрийн хутгуур гэсэн үгний учрыг эмгэн сайн олоогүй ч сүрхий хорсчээ. Хэрүүлд улангасахаараа давахын тулд хамгийн муухай хорон үг олж хэлэх гэж  хорхойсдог эмгэний удмын гажиг сэдэрч,

-Чи өөрийгөө их сүрхий бөх хүн гэж бодож байна уу? Тэр үхрийн сээрийг чинь хоёр ач чинь төмрийн хөрөөгөөр хөрөөдөж, хөрөөдсөн ормоо царцуу өөхөөр шавж тогтоогоод чамайг дамшиглах гэж төмпөнд тавьчихсан юм гэсэн шүү зөнөг толгойт оо! Чи муу хөрөөдсөн сээр хуга шаачаад зөнөгөө мэдэхгүй онгирч хүүхдүүдийнхээ элэг доог болсноо одоо мэдэж ав. Хэлэх үггүй болов уу, хэрүүлч ээ? Ичиг ичиг гэж хорыг нь малтав.

Өвгөн нэг л хачин, сэжигтэй, таг чимээгүй болчихсон гэнэ. Тэр дахиж үг унагасангүй. Хэвтээд өгч.

Удалгүй өвгөний лагшин гэнэт чилээрхэв. Хамгийн аймшигтай нь өвгөн буруу харж хэвчихээд дуугардаггүй. Эмгэн ухаангүй сандарлаа. Эр хүнийг эр чадлаар нь басамжлана гэдэг ийм аюултай ажээ. Сүүлдээ цөхөрсөн эмгэн өвгөндөө “Тэр сээр чинь хөрөөдөөгүй сээр байсан юм. Би уурандаа чамайг дийлэх гэж хөрөөдсөн сээр гэж худал хэлсэн юм” гэж аргадсан боловч Сэдваанчиг бас л дуугарсангүй. Өвгөн нь тиймхэн залинд хууртагдахаар хүн биш гэдгийг Сэрээдэнэ чавганц дэндүү сайн мэдэх тул яаж ч чадахаа болилоо.

Өвгөн дуугарахгүй буруу харж хэвтсэн чигтээ хэд хоноод 90 насандаа амьсгал хураав. Эмгэн орилоод салдаггүй. “Би юунд тийм хэрэг хийв ээ” гэж уйлаад гэртээ хүн ороход дургүйцэж, гав ганцаар мэгшихийг хичээнэ. Хөөрхий тэр чавганц бас удахгүй болтой. Өвгөнөө гомдоогоод явуулчихсан. Өвгөн нь ганц удаа ч эргэж хараагүй. Ганц үг ч хэлээгүй. Ийм их харууслыг өтөл эмгэн даахгүй нь түмэн зөв. Явах гэж морио эмээлчихсэн өвгөнд хөндлөнгийн ялимгүй шалтаг таарвал түүнийг аваад залрах эгзэгтэй мөч отож байсныг эмгэн анзаарсангүй. Өчүүхэн утсанд амь нь дөнгөж торж байсныг мэдсэнгүй. Эмгэний харуусал зүрхтэйгээ цуг бөхдөг бол уу эсвэл сүнсэнд нь шингээд хойт насанд нь буухиалдаг болов уу, яадаг бол?

Денекамп. Голланд. 2008-5-19