Эмгэнэл

Монгол Улсын Соёлын гавьяат зүтгэлтэн, цагдаагийн бэлтгэл хурандаа Лэгдэнсүрэнгийн Гаваасүрэн нь 2021 оны 12 дугаар сарын 27-ны өдөр хүнд өвчний улмаас таалал төгсөж, бид бүхэнд нөхөж баршгүй хүнд гарз тохиолоо.

Тэрээр 1953 онд Завхан аймгийн Отгон суманд Лэгдэнсүрэнгийн хоёр дахь хүү болон мэндэлж, 1959-1963 онд Завхан аймгийн Отгон сумын дунд сургууль, 1983-1986 онд Улс төрийн дээд сургууль, 1991-1995 онд Цагдаагийн дээд сургуульд тус тус суралцаж төгсжээ.

1973-1987 онд Улаанбаатар хотын Цагдан сэргийлэх газрын Эргүүл ротод эргүүлийн цагдаагаас улс төрийн орлогч, 1988-1990 онд Сүхбаатар дүүргийн цагдаагийн хэлтэст сэргийлэн хамгаалах ахлах байцаагч, 1990-1998 онд Цагдаагийн ерөнхий газрын Эргүүлийн тусгай тасагт тасгийн орлогч дарга, сургалт, соёл хүмүүжил, боловсон хүчин эрхэлсэн дэд дарга, 1998-2008 онд Иргэний бүртгэл мэдээллийн улсын төвд Тамгын хэлтсийн болон Бүртгэл мэдээллийн хэлтсийн дарга, 2008-2013 онд Цагдаа, олон нийтийн сургалт, соёлын төвийн дарга, 2013-2015 онд Олон нийт-цагдаагийн хамтын ажиллагааны төвийн зөвлөх багш, 2017-2020 онд Цагдаагийн ерөнхий газрын Сүлд чуулгын даргаар тус тус ажилласан.

Монголын цагдаагийн байгууллагад Эргүүлийн тусгай тасаг, Эргүүл хамгаалалтын хороо, “Сүлд чуулга”-ыг шинээр эмхлэн зохион байгуулах, бие бүрэлдэхүүнийг нь шилж сонгох, сургаж төлөвшүүлэх ажлыг хийж гүйцэтгэсэн төдийгүй Иргэний бүртгэл мэдээллийн улсын төвд мэргэжлийн хэлтсийн даргаар томилогдон зогсонги байдалд орсон иргэний үнэмлэхжүүлэх ажлыг шуурхай зохион байгуулж байсан.

Цагдаагийн бэлтгэл хурандаа Л.Гаваасүрэн нь төр, ард түмнийхээ өмнө өргөсөн тангарагтаа үнэнч байж, цагдаагийн байгууллагын алба хаагч, ажилтнуудыг соён гэгээрүүлэх үйлсэд өөрийн мэдлэг, оюун ухаанаа харамгүй зориулж ирсэн оюуны их цараатай, ухааны их бядтай, удирдахуйн их авьяастай цагдаагийн байгууллагын бахархал болсон манай туршлагатай удирдах ажилтнуудын нэг байсан билээ.

Үүний зэрэгцээ уран зохиол, яруу найраг сонирхон өөрийн авьяасыг хөгжүүлж, “Цагдаагийн гэргий”, “Цагдаагийн ээж”, “Эрүүгийн цагдаа”, “Мөрдөн байцаагчийн үйлс”, “Монгол минь амгалан байг”, “Бид мартахгүй”, “Эх үрийн элбэрэл”, “Ханийн дуу”, “Аав минь дээ”, “Эр хүн шиг эр хүн дээ”, “Ханьсахын жаргал”, “Ижий минь бодогдоно”, “Зүүдэнд уяатай аав” зэрэг 200 гаруй дууны шүлэг бичиж, 10 удаа тайлан тоглолт хийж, 6 ном товхимол, уран сайхны 2, баримтат 4 кино бүтээн, нийтийн хүртээл болгосон авьяаслаг гэр бүлийн өрхийн тэргүүн байлаа.

Түүний гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах, соёл урлагийг хөгжүүлэх үйлсэд оруулсан хувь нэмэр, төрийн албанд зүтгэсэн хөдөлмөр, зүтгэлийг төр засгаас өндрөөр үнэлж, Монгол Улсын Соёлын гавьяат зүтгэлтэн, Хөдөлмөрийн гавьяаны улаан тугийн одон, Цэргийн гавьяаны улаан тугийн одон, Цэргийн гавьяаны одон, Цэргийн хүндэт медаль, ойн медалиуд, Соёлын тэргүүний ажилтан, Цагдаагийн алдар, Цагдаагийн гавьяа, Монголын зохиолчдын эвлэлийн шагналаар тус тус шагнажээ.

Талийгаачийн авьяас билэг, дахин давтагдашгүй гайхамшигт бүтээлүүд, эелдэг даруу, нөхөрсөг, шударга, зарчимч, хүнлэг энэрэнгүй зан чанар цагдаа, дотоодын цэргийн байгууллагын алба хаагч бидний сэтгэл зүрхэнд үүрд мөнхөд дурсагдан үлдэх болно.

Та минь эх орныхоо ариун газар, шороонд тайван нойрсдоо.

Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.