“Өмгөөлөгч эмэгтэйчүүд” үйл ажиллагааг амжилттай зохион байгууллаа

“Олон улсын эмэгтэйчүүдийн эрхийг хамгаалах өдөр”-ийг угтан Нийслэлийн Өмгөөлөгчдийн зөвлөл болон Монголын Өмгөөлөгчдийн Холбооны Удирдах зөвлөлийн эмэгтэй гишүүдийн санаачилгаар “ӨМГӨӨЛӨГЧ ЭМЭГТЭЙЧҮҮД” үйл ажиллагааг 2026 оны 03 дугаар сарын 06-ны өдрийн 10:00–14:00 цагийн хооронд Улаанбаатар галлерейд амжилттай зохион байгууллаа.

Үйл ажиллагааг нээж Монголын Өмгөөлөгчдийн Холбооны Ерөнхийлөгч Л.Данзанноров, Удирдах зөвлөлийн дарга Б.Энхзаяа, Улсын Их Хурлын гишүүн Х.Баасанжаргал, Монголын эмэгтэйчүүдийн холбооны ерөнхийлөгч Б.Оюунгэрэл нар нийт эмэгтэй гишүүн, өмгөөлөгчдөдөө болон салбарын үе үеийн төлөөлөл болсон хүндэт зочдодоо “Олон улсын эмэгтэйчүүдийн эрхийг хамгаалах өдөр”-ийн мэндийг дэвшүүлж, эмэгтэй өмгөөлөгчдийн нийгэм, хууль зүйн салбарт оруулж буй үнэтэй хувь нэмрийг онцлон тэмдэглэлээ.
Энэ үеэр өмгөөллийн салбараас төрөн гарсан эмэгтэй гавьяат хуульчдадаа болон үе үеийн ахмад өмгөөлөгчдөдөө хүндэтгэл үзүүлж, дурсгалын бэлэг гардуулан талархал илэрхийлэв.
Мөн эрхэлсэн ажилдаа амжилт гарган, идэвх зүтгэлтэй ажиллаж буй эмэгтэй өмгөөлөгчдийг Хүний эрхийн үндэсний комисс, Монголын Эмэгтэйчүүдийн Холбоо, Монголын Залуучуудын Холбооны шагналаар тус тус шагнаж урамшууллаа.
Хүндэтгэлийн үйл ажиллагааны хүрээнд Монголын Менежментийн Холбооны удирдах зөвлөлийн гишүүн, зөвлөх үйлчилгээний ИМАКО институтийн захирал, үндэсний сургагч багш Р.Лхагвадулам “Эмэгтэй хуульчийн нийгмийн нэр хүнд, имидж бүрдүүлэлт, зарим асуудал” сэдвээр, сэтгэл судлаач, хуульч, өмгөөлөгч А.Баялагмаа “Мэдрэмжээ хүлээн зөвшөөрөх нь” сэдвээр тус тус сургалт орсон юм.
Энэхүү үйл ажиллагаа нь эмэгтэй өмгөөлөгчдийн манлайлал, туршлага солилцоо, хамтын ажиллагааг бэхжүүлэх, мэргэжлийн үнэ цэн, нийгмийн оролцоог нэмэгдүүлэхэд чиглэсэн ач холбогдолтой уулзалт болж, халуун дулаан уур амьсгал дунд амжилттай өрнөж, өндөрлөлөө.