Э.Цэндбаатар Улсын аварга боллоо

ХХ зууны манлай, Гавьяат дасгалжуулагч Вандуйн Батбаярын нэрэмжит сонирхогчдын боксын насанд хүрэгчдийн Улсын аварга шалгаруулах тэмцээн зургаан өдрийн турш үргэлжилсний эцэст өнөөдөр өндөрлөлөө.

Спортын төв ордонд болсон УАШТ-д 39 багийн нийт 201 тамирчин эрэгтэй ес, эмэгтэй найман жинд өрсөлдөж, аваргуудаа тодрууллаа. Энэ жилийн улсын аваргад эрэгтэйчүүдийн 60 кг-ын тулаанууд хамгийн их анхаарал татаж байсан юм. Учир нь энэ жинд “Рио 2016” олимпийн наадмын хүрэл медальт, Гавьяат тамирчин Д.Отгондалай, “Рио 2016” олимпийн наадмын шагналт V байрын эзэн Э.Цэндбаатар нарын шилдэг тамирчид багтсан юм.

Тэдний хувьд учраа бүрээ ялсаар шигшээ тулаанд шалгараад байсан бөгөөд өнөөдөр болсон шийдвэрлэх тоглолтод шүүгчдийн саналаар Э.Цэндбаатар 3:2 онооны харьцаагаар ялалт байгуулж, улсын аварга цолыг хүртлээ.

Тоглолтын үеэр тамирчдын хөмсөг задарснаар эмчийн тусламжийг 4-5 удаа авсан юм.

С.Атарцэцэг