Төрөөс төрсөн тэрбумтнууд авлигаар хөлжсөнийг одоо л баримтаар дэлгэх нь

Мэргэжлийн хяналтын газрын газар,хэлтсийн дарга,ажилтнууд авлига авч байгаад үйлдэл дээрээ баригдсан тухай мэдээ хуурай өвсний түймэр шиг тарж байна. Тодруулбал, МХЕГ-ын экспорт, импорт, хилийн хорио цээрийн хяналтын газрын дарга Б.Аззаяа, хэлтсийн дарга Т.Баярсайхан нарыг өнгөрсөн пүрэв гаригт АТГ-ынхан ажлын өрөөнөөс нь баривчилж Цагдан хорих төвд хорьсон. Тухайн үед дарга нарыг 200 сая төгрөг авлигаар авсан гэж дуулдаж байсан. Харин энэ тоо нэмэгдэн өөрчлөгдсөн байна.
Хэвлэл мэдээллийн хэрэгслүүдэд дурдсаныг харвал, Т.Баярсайхан нь бусдаас хахуульд 30 сая төгрөгтэй тэнцэх валют авч байсан аж. АТГ-ын Мөрдөн шалгах хэлтсийнхэн тэр шөнөдөө тэдний албан өрөө, гэрт нь нэгжлэг хийхэд Б.Аззаяагийн гэрээс хахуульд авсан байж болзошгүй 60 сая, Т.Баярсайханыхаас 400 сая төгрөг бэлнээр хураан авсан байна.

Дээрх хоёр хүнээс гадна тус газрын 10-аад байцаагчийг АТГ-т байцааж эхэлсэн байна. Олон жилийн турш мэргэжлийн хяналтынхан болон гааль,татвар,шүүх, прокурорынхан шат шатандаа авлига авдаг гэсэн яриа гардаг ч тэгсхийгээд намждаг байсан. Харин одоо түрүүчээсээ “зэс,гууль” нь цухуйж эхлэв бололтой. Мэргэжлийн хяналтын газрын саарал байшингийнхан үүрээ хөндүүлсэн шоргоолж шиг хэдэн өдөр бужигнав. Төр түмэн нүдтэй гэдэг хойно ээдрээтэй утасны үзүүрээс атгасан авлигатай тэмцэгчид цааш нь лавхан атгавал Монголын авлигачдын багийг хуулж хаяна,авлигын “аалзны тор”-ыг хөвнө гэдэгт олон түмэн найдаж буй. Төрийн өчүүхэн цалингаар амьдардаг гэж барим тавин ярьдаг ч төрийн ажилтнууд дээрээсээ доош хүртэл бултаараа авлигаар хагартлаа баяждагийг хүн бүр мэдэж байгаа. Одоо л төрөөс төрсөн тэрбумтнуудын үнэн нүүр царайг илчлэх болов уу гэсэн яриа амнаас ам дамжин сонсдож байна. Харж л байя.
Н.Дөл