Эх орны төлөө гэж байгаа бол өнөөдөр 1990-ээд он биш гэдгийг АН-ынхан хатуу санагтун

Монгол түмэн хаврын тэргүүн сарынхаа шинийн нэгэнд бэлтгэж зав зайгүй байгаа энэ цаг үед АН-ынхан жагсаал зохион байгуулав. Тэдний тооцоолсноор 10 гаруй мянган хүн цуглах ёстой байсан ч лавтай тал нь ирсэн болов уу. Улстөрийн синдромыг хавар эхэлдэг гэж боддог байсан монголчууд өвлийн жавар буцаагүй байхад анхны жагсаалдаа туг лоозонгоо бариад,өр төлөөсөө үүрээд ирсэн нь энэ. Зохион байгуулалтыг анзаарахад МоАХ,АН-ынхан жагсаж цуглаж сурсан байна. Эхлэх цагтаа эхлээд,цээжинд зангирсан үгээ хэлчихээд дуусах цагтаа тараад одов. Хүйтэнд удаан жагсвал дулаан хувцас хунар муутай оролцогчид дэрийчихэж магадгүйг сайн тооцжээ. Шар нохой жилийн улс төрийн синдром нь Ардчилсан нам “ард түмэнтэйгээ хамтдаа” жагсана гэсэн зорилгоо биелүүллээ. Эх орны эрх ашгийн өмнөөс тэд сөрөг хүчний байр сууриа чангахан дуугарч илэрхийлэв.

2018 оныг тус намынхан УИХ-ын дарга М.Энхболд, Ерөнхий сайд У.Хүрэлсүх нарт хаягласан хугацаатай мэдэгдлээр эхлүүлсэн. Тэр шаардлага агаарын бохирдол, татварын нэмэгдэл, Үндсэн хуулийн асуудлаар гэсэн гурван зүйл заалттай. Энэ мэдэгдлийг хүргүүлснийхээ дараа АН-ын дарга С.Эрдэнэ хэвлэлийнхнийг цуглуулж байгаад “ Хэрэв УИХ-ын чуулган завсарлахаас өмнө, 2018 оны хоёрдугаар сарын 1-ний дотор энэхүү шаардлагын дагуу зохих арга хэмжээ аваагүй тохиолдолд Ардчилсан нам амлалтаасаа ухарсан Засгийн газрыг огцруулж, УИХ-ыг тараах, хариуцлагагүй улс төрчдөд улс төрийн хариуцлага хүлээлгэх тэмцэл өрнүүлэхээ хариуцлагатайгаар мэдэгдэж байна” гэсэн юм. Түүний мэдэгдэл хаврын улс төрийн синдромыг таван есийн хүйтнээр ийнхүү эхлүүлэв бололтой.

АН-ын хувьд улстөрийн сөрөг хүчний үүргээ эх орны эрх ашгийн төлөө ард түмний өмнөөс хүчтэй байр суурь,дуу хоолой гаргаад эхэлбэл ард түмэн тэднийг хурайлан дэмжих байх. Гэхдээ одоо 1990 он биш. Тэр цагийн үеэ элээсэн партизан сэтгэлгээ өнөө цагт олны сэтгэлийг гэгэлзтэл хөдөлгөхгүй,учир нь өнгөрсөн 20 гаруй жилд нийгмийн байдал үндсээрээ өөрчлөгдсөн. Ард түмэн ч эрхэм дээдсүүдэд “хулхидуулсаар” хал үзэж,хашир суусан. Хот хөдөөгүй бүгдээр гэнэн “томоогүй” зангаа орхиж эрийн цээнд хүрсэн. Түүнээс гадна цөөхөн монголчууд бид баян ядуугийн хоёр туйл дээр амьдарч байгаа. Ийм байдлыг хүн толгойтой бүхэн аль хэдийнэ мэдсэн. Эх орноо хуваагаад хүртчихсэн хүмүүсийн дунд АН-ын томчуул ч олноор бий. Ийм байхад нэг их эх оронч,хувьсгалч дүрээр цээж дэлдэн хашгичаад эхэлбэл хол явахгүй байж мэднэ.