Долдугаар сарын 1-ний хэрэгт улстөрийн дүгнэлт гаргахыг хохирогчдын ар гэрийнхэн шаардлаа

2008 оны долдугаар сарын 1-ний улс төрийн үймээнд хэлмэгдэн амь насаа алдсан, бие эрхтнээрээ хохирсон иргэдийн ар гэрийнхэн өнөөдөр /06.29/  мэдэгдэл хийлээ.  Тухайн үед хэрэгт холбогдуулан 275 хүнийг баривчилж, нэг жилийн дараа өршөөлийн хуулиар сулласан байдаг. Хохирогчдын ар гэрээс энэ хэргийг эрүүгийн хэрэг үүсгэн хүчээр хоморголон баривчилсан, гэм зэмгүй иргэдийн эрхэнд халдсан хэмээн үзэж байгаа юм.

Хохирогчдын холбооны тэргүүн Х.Оюунцэцэг “ Бид  2018 оны тавдугаар сарын 3-нд Ерөнхийлөгч Х.Баттулга, Улс төрийн зөвлөх Н.Алтанхуяг нарт хүсэлт илгээсэн.  2008 оны улс төрийн үймээнд ард түмний эсрэг галт зэвсэг хэрэглэсэн хорт үйлдэлд улс төрийн дүгнэлт гаргахыг хүссэн. Энэ хүсэлтэд тухайн үед хоморголон баривчилж, эрүүгийн хуулийн дагуу  ял өгсөн иргэдийг цагаатгах, Үндэсний аюулгүй байдлын зөвлөл болон Тагнуулын газраас хэргийн талаар нууцын зэрэглэлд байсан материалуудыг ил болгох, тухайн өдөр галт зэвсэгт өртөж  насан туршийн хөгжлийн бэрхшээлтэй болсон 15 настай Энхтөр, 16 настай Батзаяа нарын цаашдын амьдралд С.Баяр, Ц.Мөнх-оргил нарт хариуцлага тооцох гэсэн асуудлуудыг тусгасан. 10 жилийн хугацаанд гэм хорын хохирлыг барагдуулаагүй, улс төрийн дүгнэлт гаргаагүйд бид бухимдалтай байна” гэлээ.

Хохирогч Ц.Энхбаяр “ Долдугаар сарын 1-ний явдлаас Монголын төр сургамж аван ард түмэн, газар шороо, Монгол гэсэн бүхий л тодотголтой зүйлсийг төр өөр дээрээ авах байсан. Гэвч төр үүнээс сургамж авсангүй. Сүүлийн үед хүний санаанд багтамгүй хэргүүд гарч бяцхан үрс маань хохирсон. Монголчуудын амь үнэ цэнэгүй байхад яагаад дарга нарын амь үнэ цэнэтэй юм бэ? Долоон сарын 1 шиг үйл явдлууд өдөр болгон нийгэмд тохиолдож байна.  Үүнд төр засаг яагаад урьдчилан сэргийлж чадахгүй, хүний амийн үнэгүйдүүлж байна вэ?” гэсэн юм.

Хохирогч А.Оюунбилэг “Бид өнөөдөр долоон сарын 1-ний үйл явдлыг зүгээр нэг хүний амь эрсэдсэн, жагсаал цуглаан хийсэн гэх мэтээр хэлж байгаа юм биш. Бид 10 жил Монгол хүний амь үнэ цэнэтэй болохыг хүлээлээ. Гэтэл зүгээр гудманд явж байсан хүн, гадаа тоглож байсан хүүхдүүд амь эрсдэж байна. Өөрсдийнхөө төлөө гаргасан хуулиараа ард түмнээ хохироож байгаатай бид тооцоо хийх болно” гэсэн юм. Монгол хүн, Монгол хүндээ тусалъя ТББ-ын тэргүүн Ч.Мөнхбаяр “Долдолдугаар сарын 1-ний үймээнтэй холбоотой хэргүүд 10 жилийн хугацаанд шийдэгдсэнгүй. Гэтэл гэмт этгээдүүдтэй хариуцлага тооцъё гэхэд ямар ч боломжгүй байна.  УИХ-ын гишүүн Нямдорж тэргүүтэй хүмүүс захиргааны хуульд өөрчлөлт оруулж Засгийн газрыг хяналтгүй болгох гэж  байна. Долоон сарын нэгнээс Манангийн бүрэн засаглал тогтсон бол түүнээс хойш, бидэнд ийм бэлэг барьж байна. Үүний эсрэг бид тэмцэх цаг нь болсон” гэв. Ийнхүү хохирогчдын ар гэрийнхэн долдугаар сарын 1-ний үймээнээс хойш 10 жил өнгөрөхөд  хэргийн учир зангилаа, гэм буруутай этгээдүүдийн талаар улс төрийн ямар нэгэн дүгнэлт гараагүй, галт зэвсэгт өртсөн гэм зэмгүй  иргэдийн эрх ашгийг хамгаалахгүй байгаад бухимдалтай байгаагаа илэрхийллээ.