Индонезид цунами,газар хөдлөлтийн улмаас 2000 гаруй хүн амиа алджээ

Индонез улсад байн байн байгалийн гамшигт үзэгдэл болж олон хүний амь нас сүйдэж байна. Цунами, газар хөдлөлтийн улмаас 2010 хүн амиа алдсан тухай харамсалтай мэдээг  тус улсын Гамшгийн хор уршгийг арилгах Үндэсний газрын албан ёсны төлөөлөгч Сутопо Пурво Нугрохо мэдэгдэв.

 Өмнө нь 1944 хүн амь үрэгдэж, 5 мянга орчим хүн сураггүй алга болсон тухай мэдээлж байсан юм. Гамшигт өртсөн 11 мянган хүн гэмтэж бэртжээ. Одоогийн байдлаар, 67 мянга орчим орон сууцны байшин барилга эвдрэн сүйдсэний улмаас 83 мянга гаруй хүнийг түр хоргодох байруудад байрлуулжээ. Индонез улсад 10 дугаар сарын 11-нийг хүртэлх хугацаанд гамшгийн үеийн онц байдал зарласан байна. Тус улсын эрх баригчид гамшгийн хор уршгийг арилгахад 560 тэрбум рупи буюу 37,6 сая ам.доллар гаргахаар шийдвэрлэжээ.

 Үндэсний хорооноос мэдэгдсэнээр,9 дүгээр сарын 28-нд Индонезийн Сулавеси арлын эргийн орчимд, Палу хотоос холгүй газарт 6,1 баллын хүчтэй газар хөдлөлт болсон ба хэсэг хугацааны дараа тухайн дүүрэгт дахин 7,4 баллын хүчтэй газар хөдлөлт болсон. Гамшгийн улмаас Палу хот ихээхэн хохирол амсчээ.