“Эрдэнэт үйлдвэр” ТӨҮГ чадамжид суурилсан сургалтын хөтөлбөр боловсруулна

 “Эрдэнэт үйлдвэр” ТӨҮГ нь Монгол Улсын хэмжээнд Хөдөлмөрийн аюулгүй байдал, эрүүл ахуйн удирдлагын тогтолцооны MNS ISO 45001:2018 стандартын гэрчилгээ эзэмшигч 16 дахь аж ахуйн нэгж болсон. Үүний хүрээнд ХАБЭА-н мэдлэг олгох 11 төрлийн сургалтаа чадамж, хандлагыг хослуулан шинэчлэх шаардлага тулгараад байна. Сургалтын хөтөлбөр боловсруулахын тулд ХАБЭА-н сургалтын багш нар болон,  “Эрдэнэт цогцолбор” дээд сургуулийн 30 гаруй багш нар, үйлдвэрийн ХАБЭА-н  инженерүүд танхим цахим хосолсон онол арга зүйн 3 өдрийн сургалтанд хамрагдлаа. Сургалтын үеэр олж авсан мэдлэгээ ашиглан сургагч багш нар хамтран 1 сарын хугацаанд чадамжид суурилсан сургалтын хөтөлбөр шинээр боловсруулах юм.

Коронавирусын тархалтаас шалтгаалан Эрдэнэт үйлдвэрийн ажилтнуудад ХАБЭА-н сургалтуудыг цахим хэлбэрт шилжүүлэн мэдлэг олгох E-learn цэсийг дотоод сүлжээнд байрлуулан ажилчдад нээлттэй байдлаар түгээж байна. Мөн E-test цэсээр орж хүссэн цагтаа мэдлэгээ дээшлүүлж, шалгуулах боломжийг бүрдүүлсэн юм. Эрдэнэт үйлдвэрийн ХАБЭА-н сургалтуудаар ажилтнуудад 10%-ийн мэдлэг олгодог байсан бол чадамжид суурилсан сургалтын шинэ хөтөлбөр хэрэгжсэнээр ажилтны олж авах мэдлэг 80% болж өснө гэсэн урьдчилсан тооцооллыг хөтөлбөр боловсруулах ажлын хэсгээс гаргажээ.

Э.Мөнх-Уянга