Сүхбаатар дүүрэг гамшигт үзэгдлийн үед ажиллах бэлэн байдлаа шалгууллаа

Нийслэлийн Онцгой комиссын орлогч даргын баталсан удирдамжийн дагуу дүүргүүдийн Онцгой комисс, алба, мэргэжлийн ангийн гамшгаас хамгаалах бэлтгэл бэлэн байдлыг шалгаж байгаа. Энэ дагуу өчигдөр нийслэлийн Онцгой байдлын газрын дэд дарга Б.Мягмардоржоор ахлуулсан Ажлын хэсэг Сүхбаатар дүүрэгт ажиллав. Ажлын хэсэг дүүргийн хэмжээнд цагийн байдал зарлаж, дүүргийн Онцгой комиссын Үер усны аюул, ослоос урьдчилан сэргийлэх алба, мэргэжлийн анги, албан хаагчдын бэлтгэл, бэлэн байдалд үзлэг шалгалт хийлээ. Дээрх цагийн байдалтай холбогдуулан дүүргийн Онцгой комисс хуралдан бэлэн байдлын зэрэгт шилжин ажиллаж, үер усны аюул, ослын үед иргэдийг нүүлгэн шилжүүлэх 23 машин, техник хэрэгсэл, мэргэжлийн ангийн 168 албан хаагчийг Ажлын хэсгийн заасан хугацаанд дүүргийн 18 хорооны нутаг дэвсгэр Бэлх захын хашаанд бэлэн байлгасан юм.

Мөн үзлэг шалгалт, дадлага, сургуулилтын үеэр эмнэлгийн тусламж үзүүлэх, ариутгал халдваргүйжүүлэлт хийх болон хүний гоц халдварт өвчин дэгдэхээс урьдчилан сэргийлах арга хэмжээг авч хэрэгжүүлэх, үерийн голомтонд ажиллах хүн, хүчийг хоол хүнсээр хангах зэрэг Мэргэжлийн албад, хойшлуулашгүй арга хэмжээний хүрээнд шаардагдах зардлыг тооцоог гарган ажиллалаа.

Үзлэг, дадлагын төгсгөлд Ажлын хэсгийн ахлагч, нийслэлийн Онцгой байдлын газрын дэд дарга Б.Мягмардорж “Болзошгүй үерийн үед хүн бүр бэлэн байх ёстой. Цагийн байдлын дагуу шалгахад Сүхбаатар дүүргийн Онцгой комисс, алба, мэргэжлийн ангиуд бэлэн байдлын зэрэгт шилжин ажиллаж, хүн хүч, техник хэрэгслийг маш сайн бэлтгэсэн байна” гэлээ.