Гадна агаарын хэмийн хүйтрэлтэй холбогдуулан дулааны температурыг нэмэгдүүлж байна

Долоо хоног бүрийн даваа гарагт болдог Эрчим хүчний яамны шуурхай зөвлөгөөн 2018.12.03-ны өдөр хуралдлаа. Зөвлөгөөний үеэр Диспитчерийн Үндэсний төвийн захирал гүйцэтгэх захирал Г.Балжинням системийн хэмжээнд эрчим хүчний үйлдвэрлэл, хэрэглээний талаар товч мэдээлэв.

Төвийн бүсийн хувьд 2018 оны 11-р сарын 28-ны өдрийн оргил ачаалал 1059 МВт хүрсэн. Энэ нь өнгөрсөн оны мөн үеийн их ачааллын утгаас 54МВт-аар өссөн үзүүлэлтэй байна. Хоногт дунджаар 1 сая кВт цаг орчим  нэмэгдээд байна.

Төвийн бүсийн нэгдсэн сүлжээний 2018-2019 оны өвлийн их ачааллын үед Улаанбаатар, Дархан, Эрдэнэт хотуудад хүйтний эрч чангарч байгаатай холбогдуулан сүлжээний усны халуун, сүлжээний усны даралтын горим, сүлжээний усны зарцуулалтыг өвлийн их ачааллын батлагдсан горимын дагуу барьж ажиллаж байна.

Улаанбаатар хотын дулаан хангамжийн систем нь өвлийн горим ажиллагааны схемд бүрэн шилжин ажиллаж байгаа бөгөөд 14 магистраль шугамаар дамжуулан 4 эх үүсвэрээс, даралт өргөх 5 насос станцаар дамжуулан хэрэглэгчдэд дулааны эрчим хүчээр ханган ажиллаж байна.

12-р сарын 3-ний өдрийн байдлаар гадна агаарын температур Улаанбаатар хотод шөнөдөө -24⁰С хүртэл хүйтэрч сүлжээний усны халууныг 116/59⁰С, Дархан хотод -22⁰С хүртэл хүйтэрч сүлжээний усны халууныг 100/57⁰С, Эрдэнэт хотод -24⁰С хүртэл хүйтэрч сүлжээний усыг 120/60⁰С тус тус эх үүсвэрт халаах горимыг төлөвлөж хэрэжилтэд хяналт тавин ажиллалаа.

Ойрын өдрүүдэд хүйтний эрч чангарч -30⁰С…32⁰С хүртэл хүйтрэх төлөв бүхий байгаа тул гадна агаарын хэмийн хүйтрэлтэй холбогдуулан тооцож, сүлжээний усны халууныг батлагдсан температурын графикийн дагуу өгч хэрэглэгчдийг дулааны эрчим хүчээр тасралтгүй найдвартай хангаж ажиллахаар горимын даалгаврыг төлөвлөж, бэлтгэл ажлыг ханган ажиллаж байна.