СЗХ-ны 25 жилийн ойд зориулсан эрдэм шинжилгээний хурал амжилттай болж шилдгүүдийг шалгаруулав

Санхүүгийн зохицуулах хорооноос Монгол Улсад санхүүгийн зохицуулагч байгууллага байгуулагдсаны 25 жил, даатгалын салбарын 85 жилийн ойд зориулан судлаачид, оюутнуудын дунд шилдэг бүтээлийн уралдаан зарлаж, нийт 32 бүтээл ирснээс 12 бүтээлийг шалгаруулсан. Сонгогдсон 12 бүтээлээс оюутан, судлаачийн ангилал тус бүрээс шилдэг 3 бүтээлийг шалгаруулах эрдэм шинжилгээний хурал амжилттай боллоо.

Хурлын үеэр СЗХ-ны дарга, доктор С.Даваасүрэн баяр хүргэн үг хэлж, шилдгүүдийн шагналыг гардуулав.

Оролцогчдоос оюутны ангилалд тэргүүн байранд “Хөрөнгийн зах зээлийн тодорхойгүй байдалд “Miles-Ezzell болон Modigliani-Miller”-ийн засварлалтыг ашиглах нь” бүтээлээр МУИС-ийн оюутан Д.Ганбаяр, дэд байранд “Эх орны хишиг 1072 хувьцааг зохистой удирдах замаар хөрөнгийн зах зээлд шинэ бүтээгдэхүүн нэвтрүүлэх боломж” бүтээлээр Мандах их сургуулийн оюутан Г.Бат-Эрдэнэ, Б.Нямтуяа нар,  III байрт “Хувьцааны төвлөрөл болон ашгийн удирдлагын хоорондын хамаарлын шинжилгээ” бүтээлээр Мандах их сургуулийн оюутан Б.Алтанзул шалгарлаа.

Судлаачийн ангилалд тэргүүн байранд “Ноогдол ашиг ба нийлмэл Пуассоны процесс: Хувьцааны үнийн шинэ стохастик загвар” сэдвээр судалгаа хийсэн МУИС-ийн багш Г.Баттулга шалгарч, дэд байранд “Жолоочийн даатгалын итгэлцүүр гурвыг сайжруулах боломж” бүтээлээр МУИС-ийн багш  Ч.Анхбаяр болон “Миг даатгал” ХХК-ийн Т.Шийрэв, III байрт “Давхар даатгалын дизайныг VAR-MIN, CTE-MIN загваруудаар оновчлох” бүтээлээр Монголын Актуарчдын  мэргэжлийн институтын Д.Энхтайван болон Хүмүүнлэгийн ухааны их сургуулийн багш Д.Батсуурь нар тус тус шалгарч өргөмжлөл, мөнгөн шагналын эздээр тодров.