М.Энхболд: Наурыз бол зөвхөн бидний биш, хүн төрөлхтний баяр юм

Тусгаар тогтносон, бүрэн эрхт Монгол Улсын нийт казах иргэд ээ,

Хаврын баяр буюу Нарны баяр, Наурызыг тохиолдуулан халуун элгэн нутгийнхаа  дөрвөн зүг, найман зовхист аж төрж, амьдран суугаа Та бүхэндээ энэ сайхан баярын өдрийн мэндчилгээг гүн хүндэтгэлтэйгээр өргөн дэвшүүлье.

Баярын мэндчилгээгээ казах түмний төлөөлөл болсон эрхэм хүмүүстэй хамтран дэвшүүлж байгаадаа би баяртай байна.

Наурызын баяр өнө эртний түүхтэй. Хүн төрөлхтөн бичиг үсэгт тайлагдахаас өмнө  наурызыг тэмдэглэж байсан гэсэн эх сурвалж байдаг юм билээ. Тэгэхээр Наурыз бол зөвхөн бидний биш, хүн төрөлхтний баяр юм.

Наурызыг 2009 онд ЮНЕСКО хүн төрөлхтний биет бус соёлын өвийн жагсаалтад бүртгэж, Нэгдсэн Үндэстний Байгууллага 2010 онд болсон Ерөнхий Ассамблейн 64-р чуулганаараа “Олон улсын наурызын өдөр”-ийг тунхагласан билээ.

Дэлхийн 40 гаруй  улс оронд амьдарч, аж төрж буй казахуудын дотроос хэл, соёл, ёс заншлаа цэвэр ариунаар нь хадгалж үлдсэн нь Монголын казахууд гэдгийг дэлхий нийтээр хүлээн зөвшөөрдөг. Энэ бол Таны, Таны гэр бүлийн, Таны өвөг дээдсийн, Монголын төр, засгийн дэлхийн соёлын өвд оруулсан үнэт хувь нэмэр мөн гэж бодож байна. Монголын төр казах иргэдийнхээ үндэсний соёл, зан заншил, шашин шүтлэгт хүндэтгэлтэй хандан, онцлог өвөрмөц байдлыг хойч үеийнхэнд нь уламжлуулан үлдээхийн төлөө цаг ямагт анхаарлаа хандуулсаар байдаг билээ.

УИХ-ын даргын хувиар миний бие саяхан Баян-Өлгий аймагт очиж, Та бүхнийхээ санал бодлыг сонссон. Ажилгүйдлийг багасгах, дэд бүтэц, үйлдвэрлэлийг хөгжүүлэх, боловсрол, эрүүл мэндийн үйлчилгээ, хүртээмжийг нэмэгдүүлэх зэрэг тулгамдсан асуудлуудыг шийдвэрлэхэд бид онцгойлон анхаарах болно.

Перс хэлнээс үгчлэн орчуулбал наурыз гэдэг үг “Шинэ өдөр” гэсэн утгатай байдаг. Тиймээс шинэ өдөр болгон Та бүхнийг шинэ амжилт, шинэ баяр, шинэ тэмүүллээр угтан тосож байх болтугай.

Наурызыг хэрхэн тэмдэглэхээс ирэх өдрүүдийн өнгө тодорхойлогдоно гэж казах түмэн хэлэлцдэг. Тиймээс хайр энэрлийг түгээн, үржил шимийг тэтгэж, найрамдал нөхөрлөлийг бататгагч, эрхэм баяраа сайхан тэмдэглээрэй.

Та бүхэндээ буян заяа тань тэгш, аз хийморь, цог золбоо дүүрэн, эрүүл энх, жаргал баяраар бялхам байхын ерөөл өргөн дэвшүүлье.

МОНГОЛ УЛСЫН ИХ ХУРЛЫН ДАРГА, МОНГОЛ АРДЫН НАМЫН ДАРГА МИЕЭГОМБЫН ЭНХБОЛД

2017.03.22