“Монгол Улсын хаан Наймдугаар Богд Жавзандамба хутагт” үзэсгэлэн нээгдлээ

ХХ зууны Монголын сэргэн мандалтын эхийг тавьсан Цагаагчин гахай жилийн Үндэсний эрх чөлөөний хувьсгалын удирдагч, Монгол Улсын хаан Наймдугаар Богд Жавзандамба хутагтын түмэн өлзий гийсний тэгш баясгалант 150 жилийн ой энэ жил тохиож байна.

Монгол Улсын Ерөнхийлөгчийн зарлигаар Монгол Улсын хаан Наймдугаар Богд Жавзандамба хутагтын түмэн өлзий гийсний 150 жилийн ойг улс даяар тэмдэглэх ажлын хүрээнд зохион байгуулж буй олон талт арга хэмжээний нэг нь “Монгол Улсын хаан Наймдугаар Богд Жавзандамба хутагт” сэдэвт үзэсгэлэнг толилуулахаар Архивын ерөнхий газар, Монголын үндэсний музей, Монголын бурхан шашинтны төв Гандантэгчлэн хийдийн Эрдэм соёлын хүрээлэнтэй хамтран бэлтгээд байна.

Тус үзэсгэлэнгийн нээлтэд Архивын ерөнхий газрын дарга С.Энхбаатар, ШУ-ны академийн ерөнхийлөгч Д.Рэгдэл, Богд хааны ордон музейн захирлын үүрэг гүйцэтгэгч Ц.Эрдэнэбаатар, Гандантэгчинлэн хийдийн тэргүүн хамба лам Д.Чойжамц нар болон бусад зочид, төлөөлөгч нар оролцсон юм.

Наймдугаар Богд Жавзандамба хутагт нь нийт монголчуудын бурхан шашны тэргүүн, оройн чимэг охь манлай төдийгүй 1911-1915 онд Монгол Улсын шашин төрийг хослон барьсан хаан, 1915-1920 он, 1921 он таван сарын хугацаатай автономит гадаад Монгол Улсын хаан, 1921 оны долдугаар сараас 1924 оны тавдугаар сар хүртэл Монгол Улсын хэмжээт цаазат хаанд өргөмжлөгдсөн төрийн тэргүүн байлаа. Хутагтын амьдрал, үйлс нь Монголын үндэсний тусгаар тогтнолыг сэргээн бататгаж, олон улсаар хүлээн зөвшөөрүүлэх, Шарын шашныг цэвэр ариунаар мандуулан, монголчуудын оюун санааг хиргүй тунгалаг байлгахад зориулагдсан юм.

“Монгол Улсын хаан Наймдугаар Богд Жавзандамба хутагт” сэдэвт үзэсгэлэнд хутагтын эдлэл хэрэглэл, намтар цадиг, бүтээл туурвил, шашин ном, төр ёсны үйлд холбогдох айлтгал, зарлиг лүндэн, захидал, харилцсан бичиг зэрэг баримт бичгүүд, ховор нандин гэрэл зургуудын цуглуулгаас бүрдсэн түүхийн нэн үнэ цэнэтэй нийт 60 гаруй архивын баримт, эд өлгийн зүйлсийг байршууллаа.

Энэхүү үзэсгэлэн 2019 оны 05 дугаар сарын 01-ний өдрөөс 31-ний өдрийг хүртэл Монголын үндэсний музейн үзэсгэлэнгийн танхимд байрлах бөгөөд сонирхсон иргэд үнэ төлбөргүйгээр сонирхож болно.

Та бүхэн таалан болгооно уу.