УИХ-ын гишүүн М.Оюунчимэг БНСУ дахь Хөдөлмөр, нийгмийн хамгааллын үйлчилгээний төвийн үйл ажиллагаатай танилцлаа

УИХ-ын гишүүн, Нийгмийн бодлогын байнгын хорооны дарга М.Оюунчимэг өнөөдөр /2021.08.10/ БНСУ дахь Хөдөлмөр, нийгмийн хамгааллын үйлчилгээний төвийн үйл ажиллагаатай танилцав.

БНСУ дахь ХНХҮТ-ийн дарга Д.Баярмандах УИХ-ын гишүүн, НББХ-ны дарга М.Оюунчимэгт ХНХҮТ-ийн үйл ажиллагааны талаар болон БНСУ-д хөдөлмөрийн гэрээгээр ажиллаж байгаа иргэдийн нөхцөл байдлын тухай мэдээлэл өгч, санал солилцлоо.

М.Оюунчимэг гишүүн БНСУ-д ажиллаж амьдарч буй 40 гаруй мянган монгол иргэдийнхээ нийгмийн хамгаалалд анхаарч, тусалж дэмжин ажиллаж байгаа төвийн хамт олонд талархлаа илэрхийлээд Ковид-19 цар тахлын энэ амаргүй хүнд хэцүү үед иргэдийнхээ эрүүл мэнд, хүний эрхийг хамгаалах тал дээр онцгойлон анхаарч ажиллахыг зөвлөв.

Мөн 2022 оны 1 дүгээр сарын 1-ээс хэрэгжиж эхлэх Хөдөлмөрийн тухай хуулийн шинэчилсэн найруулгын талаар мэдээлэл өгсөн бөгөөд БНСУ дахь ХНХҮТ-ийн хамт олон УИХ-ын ирэх намрын чуулганаар хэлэлцэгдэх Ажиллах хүч гадаадад гаргах, гадаадаас ажиллах хүч, мэргэжилтэн авах тухай хуулийн шинэчилсэн найруулгын төслийн ажлын хэсгийг ахалж байгаагийнх нь хувьд М.Оюунчимэг гишүүнтэй тус хуулийн төсөлтэй холбоотой асуудлуудаар ярилцаж, санал бодлоо солилцлоо.