Эмгэнэл

Төв аймгийн Борнуур сумын уугуул, Монгол Улсын Соёлын Гавьяат зүтгэлтэн, Бурханч лам Ганхүүгийн Пүрэвбат таалал төгсөж Монголын шашин, соёлын салбарт нөхөж баршгүй гарз учирлаа.

Г.Пүрэвбат 1965 онд Төв аймгийн Борнуур суманд мэндэлжээ. 1974-1984 онд ЕБС, 1981-1985 онд Дүрслэх урлагийн сургууль, 1987-1990 онд Монголын Бурхан шашны дээд сургууль, 1990-1993 онд Энэтхэгийн Дарамсалад Түвдийн Бурхан урлалын сургууль төгссөн.

2001 онд Дашчойнпил дацанд номын дамжаа барьж, номын гэвш цол, 2016 онд Улаанбаатар Их Сургуульд “Монголын бурхан шашны урлахуй ухааны тогтолцоо болон хөгжлийн хэтийн төлөв, үнэлэмжийн асуудал” сэдвээр докторын зэрэг хамгаалсан.

1985-1986 онд МҮЭХ-нд бие даасан уран бүтээлч, 1993-2010 онд Гандантэгчилэн хийдийн Монголын уламжлалт урлахуй ухааны дээд сургуулийг үүсгэн байгуулж захирлаар, 1994 онд Их шүтээн Мэгжид Жанрайсэг бурхныг бүтээн залах ажлын шашны зөвлөх, 1995 онд Шашны сургалттай дунд сургуулийн захирал, 1996-2010 онд Монголын уламжлалт урлахуйн ухааны соёлын төвийг үүсгэн байгуулж тэргүүнээр, 2006 оноос Төв аймгийн Борнуур сумын Өлзийбадруулагч хийд Аглаг хийдийн тэргүүн, БСШУСЯ-ны Соёлын бодлого зохицуулалтын газрын мэргэжлийн комиссын гишүүн, 2007 оноос Төр засгийн үйлчилгээг эрхлэх газрын Уран сайхны зөвлөлийн гишүүнээр ажиллаж байжээ.

Монгол Улсын Соёлын Гавьяат зүтгэлтэн, Бурханч лам Г.Пүрэвбат нь Өлзийбадруулагч хийд болон Бурхан багшийн 12 зохионгуйн чулуун сийлбэрт 1 км урт мөргөлийн замтай Бурхан багш болон бодь сэтгэлтэн, хутагт лам дээдсийн ринсэл бүхий 22 м өндөр алтан сүм, өвөрмөц содон зүйлийн үзмэртэй Аглаг бүтээлийн сүм зэрэг сүм хийдийн цогцолбор байгууламжийг бие даан урлаж Монголын шашин, соёлын үнэлж баршгүй өвийг бүтээжээ.

Монгол буддизмын гайхамшиг болсон бурхан шүтээн зурж урлах бүхий л эртний уламжлалт дэг сургуулийг сэргээн судалж, олон шавьдаа сургаж, олон зуун бүтээл, судалгааны номууд туурвиж, Монголын шашин, соёл урлагийн салбарт эгнэгт арилшгүй оюуны бүтээл нь ард түмнийхээ сэтгэлд үүрд хоногшин үлдэх болно.

Түүний гэр бүл, үр хүүхэд, төрөл төрөгсдөд гүн эмгэнэл илэрхийлье.