Дэлхийн допингийн эсрэг агентлаг /WADA/ нь ОХУ-ын баг тамирчдыг Рио-де-Жанейро-д болох Олимпийн тоглолтуудад оролцуулах тухай Олон улсын Олимпийн Хороо /ОУОХ/-ны шийдвэрийг эгдүүцсэн байдалтай хүлээн авсан байна. WADA-ын хэвлэлийн албанаас мэдээлснээр, Оросын шигшээ багийг тэмцээнд оролцуулахгүй талаарх тус агентлагийн гүйцэтгэх зөвлөлийн зааварчилгааг ОУОХ мөрдлөг болгосонгүй гэжээ.
Долдугаар сарын 24 буюу өчигдөр ОУОХ-ны гүйцэтгэх зөвлөл хуралдан ОХУ-ын баг тамирчдыг Рио-д болох Олимпод оролцуулах эсэх талаар хэлэлцэн, Оросын талд эерэгээр шийдвэрлэсэн аж. Харин оросуудыг тэмцээнд оролцуулах эсэх шийдвэрийг спортын төрөл тус бүрээр хариуцсан Холбоод нь гаргах юм байна.
Мөн WADA-ын зүгээс 2014 оны Сочигийн Олимпийн үеэрх сэргээшийн үйлдлийг батлах мөрдөн шалгах ажиллагааг дуусгахын тулд Макларены бүрэн эрхийн хугацааг сунгаж байгаа тухай мэдээлжээ. WADA-ын хараат бус комиссын тэргүүн Ричард Макларен долоо хоногийн өмнө тайлангаа тавьсан бөгөөд энэхүү тайлан дээр үндэслэн WADA-ын гүйцэтгэх зөвлөл ОУОХ, ОУПХ, мөн спортын Олон улсын бүхий л Холбоодод ОХУ-ын баг тамирчдыг тэмцээнд оролцуулахгүй байх зөвлөмж хүргүүлсэн аж.