Техникийн саатлын улмаас саатсан онгоцны зорчигчдыг өнөө өглөө Улаанбаатарт авчирчээ

Өчигдөр 15:35 цагт Ховд Улаанбаатар чиглэлийн  МИАТ ХК-ийн ОМ7056 нислэгт техникийн ноцтой доголдол гарч, зорчигчдыг түгшээжээ. Энэ талаар тус онгоцонд сууж явсан нэгэн зорчигч “МИАТ ХК-ийн Боинг онгоц Ховдын нисэх буудлаас хөөрөхөөр хурдаа авах явцдаа дугуй нь салж, нислэгийн зурвасаас гарсан. Энэ үед онгоц эрчээрээ шороон зам руу орж, онгоцонд тоосжилт үүссэнээс юу ч харагдахгүй болсон. Зорчигчид хашгиралдан, маш их сандарцгаасан. Азаар ямар нэгэн юм мөргөөгүй, зогсч зорчигчдыг нэн даруй буулгаад байна. Хурдаа авах явцад нэг талынх нь дугуй мултарчихсан юм билээ. Үүнтэй холбоотойгоор нислэгийг тодорхойгүй хугацаагаар хойшлуулсан. Хэзээ нисэх нь тодорхойгүй байна” гэлээ.

Бид энэ талаар тус компанийн фэйсбүүк хуудаснаа “Нислэг саатлын мэдээлэл. 5-р сарын 3-ны өдрийн Ховд-Улаанбаатар чиглэлийн ОМ7056 аялал хөөрөлтийн өмнөх гүйлтийн техникийн саатал гарсан тул үзлэг хийх шаардлагатай боллоо. Иймд тус аялал тодорхойгүй хугацаагаар хойшилж байна. Бид уг нислэгээр саатсан зорчигчдыг Улаанбаатар хотод өөр агаарын хөлгөөр тээвэрлэн ирүүлэхээр ажиллаж байна” гэсэн.мэдээллийг өгч байсан .ТэгвэлОМ7056 дугаар аялал саатсантай холбогдуулан зорчигчдыг Улаанбаатар хотод Аэромонголиа ХХК-ийн агаарын хөлгөөр тээвэрлэн ирүүлэх ажлыг шуурхай зохион байгууллаа.Эхний 47 зорчигчид 5 дугаар сарын 4 буюу өнөө өглөө 5:45 цагт, дараагийн 48 зорчигч 8:39 цагт Улаанбаатар хотод ирсэн байна.

Ховд – Улаанбаатар чиглэлийн 2016 оны 5 дугаар сарын 3-ны өдрийн ОМ7056 дугаарт аяллын саатлын шалтгааныг нарийвчлан тогтоохоор ажиллаж байгаа бөгөөд уг сааталтай холбоотой мэдээллийг тухай бүр мэдээлэх болно хэмээн MИAT хк өөрийн цахим хуудсаараа дамжуулан мэдээлсэн байна