СХД-ийн МАН-ынхан хууль бусаар томилгоо хийжээ

СХД-ийн  32 хороонд  Иргэдийн нийтийн хурлыг  тамгагүй, нууцаар хуралдуулсан талаар тус дүүргийн Сонгогч, сонгогчдын эрх ашгийг хамгаалах түр хорооноос мэдээлэл хийлээ. МАН-аас томилогдсон ИТХ-ын дарга Б. Мөнхцэцэг өнгөрсөн оны арваннэгдүгээр сард 32 хорооны хурлын тамгыг баталгаажуулах нэрээр хураан авчээ. Энэ нь Монгол Улсын үндсэн хууль болон бусад хуулийг ноцтой зөрчиж байна хэмээн түр хорооныхон үзэж байна.  Мөн энэ сарын 15-ны өдөр СХД-ийн МАН-ын үүрийн хурал нэрээр ИНХ-ыг хийж ИНХ-ын дарга, тэргүүлэгч, хорооны Засаг даргыг хууль бусаар томилсон байна. Сонгогч, сонгогчдын эрх ашгийг хамгаалах түр хорооны дарга М. Ганболд  “Өнгөрсөн оны арваннэгдүгээр сард 32 хорооны тамгыг баталгаажуулах нэрээр хурааж авсан. Тамгаа авах хүсэлтээ гаргасан ч тамгыг өгөөгүй. Энэ сарын 15-ны өглөөний 08:00 цагт  МАН-ын үүрийн хурал нэрээр ИНХ-ыг хуралдуулж ИНХ-ын дарга, тэргүүлэгч, хорооны Засаг даргыг хууль бусаар томиллоо. Тиймээс 32 хорооныхоо тамгыг авч, ИНХ-аа хуулийн дагуу хийх хүсэлттэй байна ” хэмээв.  Мөн энэ нь иргэдийн хуулиар олгогдсон эрхийг зөрчиж байна хэмээн хорооны иргэд үзэж байгаа юм байна. СХД-ын хоёрдугаар хорооны иргэн Р. Ганбат “МАН-ын гишүүдийн дунд нууцаар ИНХ-ыг хуралдуулж иргэдийн эрхийг ноцтой зөрчиж байна ” гэв.