Морин хуур минь дэлхийн хөгжим боллоо

Монгол Улсын иргэн Б.Санжаажав гэх эрхэм залуу үндэсний морин хуур хөгжмийн ангийг Австри улсын Вена хотноо орших Франц Шуберт-ын нэрэмжит нарийн мэргэжлийн хөгжмийн консерваторид нээх болсон тухай сайхан мэдээ түглээ.

Тэрээр олон жил монгол үндэстний сонгодог хөгжмийн зэмсэг болох морин хуур хөгжмийг Франц Шуберт-ын нэрэмжит нарийн мэргэжлийн хөгжмийн консерваторийн сургалтын системд нэвтрүүлэх тухай хөтөлбөр, төслийг боловсруулан тус сургуулийн захиргаанд санал оруулсан байна. Консерваторийн сургалтын алба болон удирдах зөвлөл нэг сарын турш түүний саналыг хэлэлцсэний үр дүнд дэлхийд алдартай консерваторид албан ёсоор морин хуурын ангийг нээх шийдвэрийг гаргасан байна.

Ийнхүү Б.Санжаажав тус сургуулийн сургалтын албатай хамтран бэлтгэсэн морин хуур хөгжмийн 4 жилийн бакалаврын зэргийн сургалтын хөтөлбөр, төлөвлөгөөг тус сургуулийн сургалтын хөтөлбөртэй нийцүүлэн илүү боловсронгуй болгохоор шамджээ. 2017 оны 2дугаар сард тус сургуулийн захирал, хатагтай Даниела Эгг морин хуурын ангийн бакалаврын зэргийн 4 жилийн сургалтын хөтөлбөр төлөвлөгөөг албан ёсоор баталсан байна.

Ингэснээр Франц Шуберт-ын нэрэмжит нарийн мэргэжлийн хөгжмийн консерваторид албан ёсоор “Морин хуур”-ын анги нээгдэж байгааг Санжаажав монгол түмэндээ баяртайгаар мэдэгдлээ. Ийнхүү Монгол Улс төдийгүй дэлхийн өнцөг булан бүрээс Монголын болон гадаадын оюутнууд Франц Шубертын нэрэмжит консерваторид нарийн мэргэжлийн хөгжмийн боловсрол эзэмшээд зогсохгүй морин хуур хөгжмөөр бакалаврын зэргийг хамгаалан төгсөх бүрэн боломжтой болов.

Монгол үндэстний морин хуур хөгжмийн зэмсэг маань олон улсад мэргэжлийн хөгжмийн их дээд сургуулийн сургалтын системд нэвтэрч байгаа нь өнөөдрийг хүртэл Монгол Улсын соёл, урлагийн түүхэнд үндэсний урлагаа олон улсад дэлгэрүүлэн сурталчилж байгаа анхны тохиолдол болж байна. Цөөхөн монголчууд бидний агуу их өв соёл, монгол морин хуурын эгшиг аялгуу дэлхий дахинаа цууриатаж,морин хуур хөгжим маань дэлхийн сонгодог хөгжимтэй хөл нийлүүлэн эгшиглэх цаг ирлээ хэмээн Б.Санжаажав сэтгэл дүүрэн баяртай байна.