Солонгос киноны хуулбар “Бүтэн амьдрал”

Бид энэ удаагийн “Монгол кино” буланд кино шүүмжлэгч Д.Нямдаваагийн “Бүтэн амьдрал” киноны шүүмжийг хүргэж байна.

-Сүүлийн үед Монголд кино урлаг эрчимтэйгээр хөгжиж байна. Нэг талаараа магтууштай ч нөгөөтэйгүүр энэ нь хэт нэг талыг барьсан. Солонгосын олон ангит киног дуурайж монгол өв соёл, ёс заншлаа мартагдуулсан үзэгдэл гарах нь олширсон. Шинээр гарч байгаа бүх кино солонгос хуулбараас хэтрэхгүй байна. Үзэгчдийг Монголын олон ангит кинонд дурлуулсан нь “Хэцүү анги”, “Тусгай салаа”, “Өдөр өдрийн нар” кино юм. Энэ кинонуудад монгол зан араншин, ахуй амьдрал бүхэлдээ багтсан байдаг. Харин сүүлийн үед гарч байгаа муухан найруулгатай дутуу дулмаг хийсэн киноноос болж Монголын олон ангит кино уйтгартай санагдаж үзэгчид маань буцаад солонгос киногоо үзэж эхэллээ.

Боловсрол телевиз  “Бүтэн амьдрал” киног гаргаад багагүй хугацаа өнгөрч байна. Энэ кинонд хоёр гэр бүлийн амьдралыг харуулдаг. Гол дүр Номин гэх бүсгүй үр хүүхдээ өнчрүүлэхгүйн тулд нөхрөө гуйж байгаа талаар гарна. Номингийн ээж салаад өөр хүнтэй суугаад явчихсан. Номингийн эмэгтэй дүү найзынхаа нөхөртэй далдуур уулздаг байсан. Нөхрийнх нь явдлыг бүгд мэддэг, эрэгтэй баз нь бас эхнэрээ хуурна энэ талаараа хадам ахтайгаа туршлага солилцоно. Энэ бүгд яг л нэг хоёрхон гэр бүлийн дотор л болж байгаа үйл явц. Хар ухаанаар авч үзвэл хөнгөн буруу зүйлийг сурталчилсан мэт.

Тухайн хоёр гэр бүлийн хүн бүр ямар нэгэн байдлаар гэр бүлээс гадуур харилцаатай байдаг. Энэ нь гэр бүлийн харилцааны үнэлэмжийг бууруулсан бас залууст ийм зүйл байж болох юм гэсэн буруу ойлголтыг төрүүлж байна. Гэр бүл салалт, гэр бүлээс гадуурх харилцааг кино урлагт ингэж үзүүлэх нь хэрээс хэтэрсэн зүйл. Хэрэв гэр бүлийн харилцааг хөндөх гэж байгаа бол манайд “Гарын таван хуруу” гээд сайн кино байдаг. Энэ киног үзэхэд бүгдийг ойлгоно. Киноны зураг авалтыг их цомхон хийсэн мэт санагдсан. Нэг газраа олон зураг авалт хийх гэх мэт. Мөн хадам ээж, хадам дүүгийн байгаа байдлыг солонгос киноноос хуулбарласан гэдгийг илт харуулдаг. Манай жүжигчид чадварлаг сайн тоглодог. Гэхдээ киноныхоо зохиолыг хуубарлахгүй солонгос киноноос санаа авахгүй байх нь зөв юм.

Эх сурвалж: “Зууны мэдээ” сонин