“Талын салхи” олон улсын мото фестивалийг зургаа дахь удаагаа зохион байгуулна

НЗДТГ, Нийслэлийн Аялал жуулчлалын газар, Улаанбаатар чуулга, “Монголын чопперчин ахан дүүс” ТББ-тай хамтран мотоцикл сонирхогчдын дунд “Талын салхи” олон улсын мото фестивалийг  зургадугаар сарын 11-ний өдөр буюу бямба гарагт зохион байгуулна. Энэ удаагийн фестивалийг “Эрүүл хүн-Архигүй Монгол” уриан дор зохион байгуулах бөгөөд  21 аймгийн болон монгол туургатан улсуудын төлөөлөл 100 гаруй мотоцикл сонирхогчид  оролцох юм. “Талын салхи” наадам зохион байгуулагчид хэвлэлийн хурал хийж мэдээлэл өглөө. Хэвлэлийн бага хуралд Нийслэлийн Аялал жуулчлалын газрын дарга Д.Батсүх, Улаанбаатар театрын захирал Р.Мөнхсайхан, Монголын чопперчин ахан дүүс НҮТББ-ын тэргүүн Ш.Сүхбаяр, дэд ерөнхийлөгч Б.Бат-Ирээдүй нар оролцлоо.

УЛААНБААТАР БОЛ ЗАЛУУСЫН ХОТ, ЗАЛУУСЫН ХӨГЖЛИЙГ ДЭМЖИГЧ ХОТ ГЭДГИЙГ ИЛЭРХИЙЛЖ ЧАДДАГ

Хэвлэлийн хурлын эхэнд Нийслэлийн Аялал жуулчлалын газрын дарга Д.Батсүх хэлэхдээ “Талын салхи мото фестивалийг зургаа дахь удаагаа зохион байгуулах гэж байна. Энэхүү фестиваль  олон улсад нэр хүнд бүхий наадам болон танигдсан. Хөрш ОХУ, БНХАУ болон Англи, Франц, Энэтхэг улсаас мото спортынхон хүрэлцэн ирж байсан. Оролцогчид, аялагч, жуулчдад Улаанбаатар бол залуусын хот, залуусын хөгжлийг дэмжигч хот гэдгийг илэрхийлж чадсан. Энэ жилийн хувьд цар тахлыг даван туулсны дараах томоохон арга хэмжээ болж байгаагаараа онцлог. Бидэнд ирүүлсэн мэдээллээр ОХУ-аас олон багийн оролцогч манай хотыг чиглэн аян замдаа гарчхаад байна. Зарим нь хэдийнээ Дархан, Сэлэнгийн нутагт ирээд байгаа. Өмнө нь Тэрэлж, Цонжин болдогт зохион байгуулдаг байсан бол энэ жилийн фестиваль Сүхбаатарын талбайгаас эхэлнэ. Зургадугаар сарын 11-ний өглөө парад жагсаж, Сүхбаатарын талбайд орж ирнэ. 14:30 цагаас нээлтээ хийж, Нийслэлийн Засаг дарга үг хэлнэ. Энэ үеэр ховор нандин мотоциклийн үзэсгэлэн, үзүүлэх тоглолт, мотоцикл болон дагалдах хэрэгслийн худалдаа, хоол үйлчилгээ, циркийн үзүүлбэр, урлагийн тоглолт болно. Мөн мото клуб,  алдартай тамирчдыг танилцуулна.” гэлээ.

Монголын чопперчин ахан дүүс НҮТББ-ын тэргүүн Ш.Сүхбаяр:

– Талын салхи наадам өргөн дэлгэр зохион байгуулах хүлээлттэй байна. Гадаадын улс орны оролцогчдын тоо 100 гаруйд хүрч байна. Оролцогчид эхнээсээ өнөөдрөөс Улаанбаатарт ирнэ. мото фестивальд нийтдээ 35 мотоциклийн клуб, холбоод оролцоно гэлээ.

ТАЛЫН САЛХИ НААДМАА ЭНЭ ЖИЛ НИЙСЛЭЛЧҮҮДДЭЭ ЗОРИУЛЖ ХИЙНЭ

Улаанбаатар театрын захирал Р.Мөнхсайхан:

-Талын салхи наадмаа энэ жил нийслэлчүүддээ зориулж хийхээр төлөвлөсөн. Нээлтийн парадын дараагаас 21 цаг хүртэл наадам үргэлжилнэ. Нийтдээ 500 гаруй мотоциклчид оролцох төдийгүй тэдгээрээс маш онцгой, шилдэг 20 мотоциклийн үзэсгэлэн гарна. Ховор, нандин хүлгүүд байх болно. Талын салхийн тайзан дээр Никитон”, “Нисванис”, “Bulsara”, “Lemons” хамтлагууд болон  дуучин Наран, Отгоо нар зорин ирж дуулах бол залуу оддоос Morningstar, Roockie, Don dior, Wolfism, Limit king зэрэг уран бүтээлчид тоглоно.  Мөн үндэсний урлагийн “Хөсөгтөн”, “Онгод” хамтлагаас гадна “Улаанбаатар” театрын уран бүтээлчид энэ өдрийг чимэн, уран бүтээлээ толилууж, үдэш нь DJ шоу болно” хэмээн танилцуулав.

КЛУБИЙН ГИШҮҮН БИШ БАЙСАН Ч МОТОЦИКЛ СОНИРХОГЧ ТА БҮХЭН МААНЬ ХҮРЭЭД ИРЭЭРЭЙ

Монголын чопперчин ахан дүүс НҮТББ-ын  дэд ерөнхийлөгч Б.Бат-Ирээдүй:

-Монголын мотофиклчид маш олуулаа болж байна. Арваадхан жилийн өмнө бид  20-30-лаа цугладаг байсан бол 40-50 клубтэй болсон. Зөвхөн чопперийн клуб Улаанбаатарт 7-8, хөдөө орон нутагт хоёр клубтэй болсон байна. Чопперийн Cruiser ангиллын биш Cross, Bike, Offroad, Street мотоциклийн клубууд хөгжсөн байна. Нөгөөтээгүүр, энэ ташрамд дуулгахад иргэдийн дунд моточиклчид үдэш оройн цагаар мотоциклийн дуу чимээ гаргадаг гэсэн ойлголт байдаг. Гэтэл манай клуб болгон өөрсдийн лого тэмдэг бүхий хантааз өмсдөг. Ийм логотой хүмүүс хэзээ ч дэггүй, буруу үйл хийдэггүйг хэлье. Залуучууд маань болж өгвөл клубийн хамааралтай болж, хамтдаа хөгжвөл илүү гоё шүү. Аль нэг клубийн гишүүн биш байсан ч мотоцикл сонирхогч та бүхэн маань хүрээд ирээрэй гэсэн юм.

Талын салхи наадам нь мото спорт сонирхдог хүн бүрийн наадам бөгөөд 2019 онд нийтдээ 800 гаруй мото тамирчид оролцож байжээ.  “Цайны зам” олон улсын аялал жуулчлалын холбооны гишүүн болох ОХУ болон БНХАУ-аас 200 мото тамирчид, мөн Япон, Энэтхэг улсуудын төлөөлөл оролцож байсан түүхтэй сонирхолтой наадам юм. Тус наадмаар дамжуулан тусгай сонирхлын аялал жуулчлалыг хөгжүүлэх,  Монгол Улсыг олон улсад сурталчлах, жуулчдыг татах зорилготой юм. Зургаа дахь удаагаа зохион байгуулах гэж буй мото фестивальд өргөнөөр оролцохыг зохион байгуулагчид хүслээ.

“ТАЛЫН САЛХИ” ОЛОН УЛСЫН МОТО ФЕСТИВАЛИЙН ХӨТӨЛБӨР

2022 оны 06 дугаар сарын 09-ний өдөр                                          Улаанбаатар хот

НИЙСЛЭЛИЙН СУРГАЛТ, СУДАЛГАА ОЛОН НИЙТТЭЙ ХАРИЛЦАХ ГАЗАР