Ерөнхий боловсролын сургууль, цэцэрлэгийн багш нар нэгдэн, цалингаа нэмүүлэх арга хэмжээ авахаар шийджээ.

Багш М.Мөнхтуяа “Одоогийн байдлаар багш нарын цалин маш бага, хаанаа ч хүрэхгүй байгааг нийгэм даяараа мэдэж байгаа шүү дээ. Бид зуны амралтын мөнгөө аваад, шууд цалингийн зээлэнд өгөөд таардаг нь үнэн. Багш нар маш их стресстэй, ямар ч амьдралын баталгаагүй амьдарч байна. Тийм учраас би сэтгэлийн бухимдлаа илэрхийлж багш нарын группт пост бичсэн. Бичсэн пост маань нийт багш нарт дохио өгч, жагсах хүртэл үйл ажиллагаанд нэгдэх эхлэл болсон юм. Миний санаа бодлыг дэмжиж, энэхүү цалин нэмэгдүүлэх жагсаалд нэгдэх хүсэлтэй арван мянган багш одоогоор нэгдээд байна. Түүнчлэн энэ удаад 15 хүний бүрэлдэхүүнтэйгээр Удирдах зөвлөлөө байгуулж, эхний ээлжинд нийслэл болон хөдөө орон нутгийн багш нарын гарын үсгийг цуглуулан, Засгийн газарт цалингийн хэмжээг хоёр дахин нэмэгдүүлэх шаардах бичиг хүргүүлэхээр болсон. Энэхүү шаардах бичигт ямар нэгэн хариу өгч, шийдвэртэй алхам хийхгүй бол дараагийн шатанд шилжинэ гэлээ.”

Засгийн газрын зүгээс энэхүү шаардлага болон багш нарын нийгмийн асуудалд анхаарч бодит алхмууд хийхгүй бол зохих зөвшөөрлийн дагуу тайван жагсаал хийхээр төлөвлөж байгаа юм байна. Түүнчлэн нийгэмд үнэн зөв мэдээлэл өгч, багш нарын өнөөгийн асуудлыг дэлгэж хэвлэлийн бага хурал ойрын хугацаанд зарлахаар болсон байна.

Тэрээр хэвлэлийн бага хурлын өдөр хараахан товлогдоогүй байгаа хэдий ч ойрын өдрүүдэд зарлана. Бид нарын хамгийн эхний эрх зөрчигдөж байгаа асуудал цалингийн асуудал л байна. Гар дээрээ 500 мянган төгрөг авч байгаа багш хүн өнөөдрийн энэ нийгэмд яаж амьдрах вэ. Захын үйлчлэгч энэ хэмжээний цалинг хангалттай авч байна шүү дээ.

Тэгэхэд ардын багш энэ цалинг авч, талыг нь цалингийн зээлэнд өгөхөөр үлдсэнээр нь амьдралаа яаж ч зохицуулах арга байхгүй шүү дээ. Хэрэв цалин нэмэхгүй бол багш нарын төлөөлөл талбай дээр тайван жагсаж Засгийн газарт сануулга өгнө. Тэгээд энэ асуудлыг авч хэлэлцээд цалин нэмэхгүй бол хичээл хаялт зарлана. Одоогийн байдлаар нөхцөл байдлаа үнэлээд хуралдаад явж байна” хэмээн мэдээлэв.

Зэсийн импортлогчоороо хамгийн том улс болох Хятад улсын нөлөөгөөр Нью-Йоркийн Комекс бирж дэх зэсийн худалдаалагдах үнэ гурав дахь улиралдаа тасралтгүй өссөөр байгаа тухай “Mining.com” мэдээлэв.

Ирэх есдүгээр сард биетээр хүргэгдэх зэсийн үнэ нэг тонн нь 6,494 ам.доллар болсон нь 2011 оны арван хоёрдугаар сарын дунд үеэс хойш хамгийн өндөр өсөлтөд тооцогдож байгаа юмсанж.

Хятадын боловсруулсан зэсийн импорт жилийн өмнөхөөс өнгөрсөн сарыг хүртэл 8.3 хувиар өссөн ч ачаа тээвэр энэ оны эхний долоон сард 26 хувиар буурч 2.62 сая тоннд хүрчээ. 

Түүнчлэн өнгөрсөн сард зэсийн баяжмалын далайн тээвэрлэлт өнгөрсөн жилийн мөн үеийн 2.2 хувийн өсөлтөөс нэг их өөрчлөгдөөгүй байгаа аж.

Монгол Улсын Ерөнхий сайд Ж.Эрдэнэбат БНХАУ-ын Гадаад хэргийн яамны туслах сайд Кун Шюаньёуг хүлээн авч уулзаж, Монгол Хятадын Гадаад хэргийн яам хоорондын гурав дахь удаагийн уулзалт амжилттай болж, хоёр орны харилцаа, хамтын ажиллагааны асуудлыг илүү өргөн хүрээнд хэлэлцсэн нь хоёр орны Иж бүрэн стратегийн түншлэлийн харилцааг хөгжүүлэхэд чухал түлхэц болж байгааг тэмдэглэлээ.

Өнгөрсөн тавдугаар сард Монгол Улсын Ерөнхий сайд БНХАУ-д айлчилж, Бээжин хотноо болсон “Бүс ба зам” олон улсын хамтын ажиллагааны дээд түвшний чуулга уулзалтад оролцсон. Айлчлалын үеэр БНХАУ-ын дарга Ши Жиньпин, Төрийн зөвлөлийн Ерөнхий сайд Ли Көчян нартай уулзаж, хоёр орны харилцаа, хамтын ажиллагааны талаар санал солилцсон нь хоёр улсын хооронд тогтоосон Иж бүрэн стратегийн түншлэлийн харилцааг бүх салбарт гүнзгийрүүлэн хөгжүүлэхэд чухал хувь нэмэр оруулсан гэж үзэж байна гэж Ерөнхий сайд хэллээ.

Энэ үеэр ярьж тохиролцсон асуудлуудыг ажил хэрэг болгох, ард түмэнд үр ашгийг нь хүртээх нь айлчлалын үр дүн болох учраас яригдсан асуудлуудыг цаг алдалгүй хэрэгжүүлэх нь бидний зорилт. Үүнд Гадаад хэргийн яамны туслах сайд Кун Шюаньёугийг дэмжлэг үзүүлэхийг хүслээ.

Гэр хорооллыг орон сууцжуулах төслийн хүрээнд Монголын талын ажлын хэсэг Бугат хотноо ажилласан. Одоо Бугатын ажлын хэсэг ойрын хугацаанд Монголд ирж, нөхцөл байдалтай танилцаад төслийг яаралтай эхлүүлэх хэрэгтэй байна гэдгийг Ерөнхий сайд тэмдэглэлээ.

Мөн Замын-Үүд, Эрээн боомтуудын нэвтрүүлэх хүчин чадлыг нэмэгдүүлэх, Гашуунсухайт-Ганцмод, Шивээхүрэн-Сэхээ, Ханги-Мандал зэрэг боомтыг олон улсын статустай болгоход анхаарал хандуулахыг Хятадын талаас хүссэн. Энэ асуудлыг холбогдох газруудад уламжилж, шийдвэрлүүлэх чиглэлээр анхаарал хандуулахыг Ерөнхий сайд хүслээ.

БНХАУ-ын Гадаад хэргийн яамны туслах сайд Кун Шюаньёу, Ерөнхий сайд Ж.Эрдэнэбатыг хүлээн авч уулзаж буйд талархал илэрхийлээд Ерөнхий сайдын айлчлалаар ярилцаж, тохиролцсон асуудлууд ажил хэрэг болох нь чухал. Эдгээр асуудлыг холбогдох байгууллага, хүмүүст уламжилж, анхаарч ажиллахаа хэлж байлаа гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Ерөнхийлөгч Х.Баттулга өчигдөр буюу 8-р сарын 10-ны Пүрэв гарагт МҮОНТР-д анхны  шууд ярилцлагад  орсон билээ. 

Ерөнхийлөгч Х.Баттулга нь 7-р сарын 10-нд Монгол улсын тав дахь ерөнхийлөгчөөр сонгогдсноос хойш хэвлэлийн мэдээллийн хэрэгсэлд анхны ярилцлагаа өглөө.

Ерөнхийлөгч Х.Баттулгын ярилцлагаас онцлох зарим яриаг нь хүргье.

-60 тэрбумын асуудлыг АТГ-т хоёр ч удаа дуудаж хэллээ. 3,000 гаруй хүний албан тушаалын асуудал яригдсан.

-Намуудын санхүүжилтийн асуудлыг хуульчилж нарийн болгоно.

-Бид Норвегийн хувилбарыг авчрах ёстой. Байгалийн баялгийг ард түмэн мэддэг байх нь зөв. Уул уурхайн бизнестэй хүмүүс Засгийн газарт ажилладаг эмгэнэлтэй явдал байна.

-Тэтгэврийн зээл гэдэг баталгаатай буюу хуульчлагдсан мөнгө. Эрсдэлгүй мөнгийг зээлэхэд яагаад банк 24 хувийн хүү аваад байдаг юм бэ. Цалингийн зээл яг адил. Үүний хүүг буулгах ёстой.

-Монгол банк өнөөдөр алтны нөөцөө мэдэхгүй байна.

-Дээрээ зарчим ярихгүй бол доороо зарчим ярих хэрэггүй. Аав ээж хоёр хэрэлдэж байвал хүүхдүүд нь ч хэрэлдэнэ.

-Ерөнхийлөгчийн гадаад айлчлал хоёр хөршөөсөө эхэлнэ. Хамгийн эхлээд ОХУ-ын Владивостокт 9-р сард  уулзалтад орно.

-Хоёр хөрштэйгээ нэн тэргүүнд гаалийн татварын асуудлыг ярина гэж бодож байгаа.

Ерөнхийлөгч Х.Баттулгын  МҮОНТР-д  өгсөн ярилцлагыг бүрэн эхээр нь хүргье.

Сонгинохайрхан дүүрэг Геологийн төв лабораторийн уулзварт байрлах Эрчим хүчний дулааны төв магистраль шугамын шинэчлэлт, их засвар, өргөтгөлийн ажлын хүрээнд энэ сарын 11-ний өдрийн 23:30 цагаас 13-ны өдрийн 07:00 цагийн хооронд үйлдвэрчний эвлэлийн гудамжны тээврийн хэрэгслийн хөдөлгөөнийг хязгаарлаж авто замын зорчих хэсгийг хаах болсон байна.

Иймд тус гудамж, замаар дайран өнгөрдөг нийтийн тээврийн үйлчилгээний дараах чиглэлүүдэд түр хугацаанд өөрчлөлт орно. Үүнд:

1. Ч:3 “Зүүн салаа-Халдвартын эмнэлэг”
2. Ч:6 “Толгойт-Нарны зам-Ботаник”
3. Ч:16 “Баруун салаа-Далангийн зам-10-р хороолол”
4. Ч:20а “Баянхошуу-3,4-р хороолол-Өнөр хороолол-Геологийн төв лаборатори”,
5. Ч:20б “Баянхошуу-Геологийн төв лаборатори-Өнөр хороолол-3,4-р хороолол”
6. Ч:22 “Шадивлан-Бөмбөгөр-Чингис СООСЭ-Далангийн зам”
7. Ч:38 “ХМК-Саппоро-3,4-р хороолол-Хайлааст”
8. Ч:44 “Нарангийн гол-ТЭЦ3-Дүнжингарав худалдааны төв”
9. Ч:45 “Ган хийц-ХМК-Зайсан”
10. Ч:46 “Улаан чулуут-Их наран-Вокзал”
11. Ч:57 “Улаан чулуут-Их наран-МУИС”
12. Ч:59 “ХМК-Офицеруудын ордон” чиглэлүүд Москвагийн гудамжаар

Хүнсчдийн гудамж-Толгойтын гудамжаар үйлчилнэ.

Иргэд та бүхэн зураглалын дагуу зорчилтоо төлөвлөж нийтийн тээврийн үйлчилгээг авна уу.

Үйлчилгээтэй холбоотой санал, хүсэлтийг 323176, 326352 дугаарын утсаар 24 цагийн турш хүлээн авч шуурхай шийдвэрлэнэ гэж нийслэлийн Тээврийн газраас мэдээллээ.

Эрхэм залуусаа, гурван охин хамтлаг 9 сарын 2-нд Үндэсний Соёл Амралтын Хүрээлэн дотор ХАР СУВД УСАН ОНГОЦ дээр орой 20:00 цагаас 23:00 цагийн хооронд  “Хэмнэл Зүрхэнд” тайлан тоглолтоо хийх юм байна шүү.

Уг тоглолтын тухай мэдээллийг 77070707 утсаар холбогдож дэлгэрэнгүй мэдэж болох гэнэ.

Зөвхөн монгол улс төдийгүй, дэлхийн томоохон хотууд агаарын бохирдолтой тэмцсээр байгаа билээ. Агаарын бохирдлын эсрэг хэрэгжүүлж буй бодлогоороо амжилт олсон орнууд хөгжлийн түүчийд явж байгаа хэмээн үнэлэгдэх болоод байгаа цаг үе.  Үүнд манай урд хөрш болох Хятад улс агаарын бохирдлын эсрэг авч хэрэгжүүлээд буй бодлого нь нилээн ухаалаг шийдэл байж чадсан бололтой.

Тэрхүү ухаалаг шийдэл нь цахилгаан машины хэрэглээг эрчимтэй нэмэгдүүлэх аж. Үүнтэй уялдуулан өдөрт 500 цахилгаан машин цэнэглэх хүчин чадалтай зогсоол нээсэн байна. Жолооч нар ухаалаг утсаараа төлбөрөө төлж, цэнэглэх 30 минутын хугацаанд амралтын өрөөнд тав тухтай амрангаа зурагт үзэх боломжтой юм байна. 2020 он гэхэд 900м радиус тутамд ийм цэнэглэх зогсоол барьж байгуулах төлөвлөгөөтэй байгаа юм байна.

“Д” аминдэм таны хүүхдэд ямар ашигтай вэ?

Хүний бие махбодын бодисын солилцоонд чухал үүрэгтэй олон янзын бодисууд байдаг бөгөөд эдгээрээс Д аминдэм ясны бүрэлдэхүүний үндсэн хэсэг болох кальци, фосфорыг цусанд зөв зохистой харьцаагаар тогтоон барьж байх үүрэгтэй. Мөн Д аминдэм нь хүний биеийн дархлаа, эсүүдийн үүсэл, өсөлт хөгжилд нөлөөлнө. Жирэмсэн эмэгтэй Д аминдэмийг хангалттай хэмжээгээр авснаар жирэмсний сүүлийн саруудад эхийн цусан дахь Д аминдэм цусаар дамжин урагт нөөцлөгддөг. Энэ нь төрсний дараа нэг сарын дотор нялх хүүхдийн хэрэгцээг хангахад зарцуулагддаг байна.

“Д” аминдэм дутахад:
• Бага насны хүүхдэд Д аминдэм дутсанаар сульдаа буюу рахит үүснэ.
• Насанд хүрсэн хүнд яс сийрэгжилт үүсэхээс гадна халдварын бус олон өвчнөөр өвчлөхөд хүргэх эрсдэлтэй байдаг аж.

Рахит өвчин хор уршигтай юу?

Зарим эцэг эхчүүд хүүхэд томрох үед Рахит өвчний үед илэрдэг хүүхдийн толгой томрох, хөл майга болох гэх мэт шинжүүд аяндаа алга болдог мэтээр тайвширч болохгүй. Рахит өвчин өөр бусад өвчинтэй хавсраагүй үедээ хүүхдийн амь насанд аюул учруулахгүй хэдий ч эцэстээ дараах хэд хэдэн хор уршигт хүргэнэ:

1. Энэ өвчний үед хүүхдийн ясны бүтэц алдагдаж, ясжих үйл ажиллагаа удааширч, биеийн эсэргүүцэл сулран өвчлөмтгий болно.
2. Бодисын солилцоонд гүнзгий хямрал гарч дотоод эрхтэн системийн үйл ажиллагаа алдагдана.
3. Рахитаар өвчилсөн хүүхдүүд бие бялдар, ой тогтоолт, оюун ухаан сэтгэхүйн хувьд үе тэнгийнхнээсээ хоцронги байдаг.
4. Биеийн гадаад үзэмжийг эвдэнэ.
5. Эмэгтэй хүүхэд насанд хүрэхэд аарцаг багатай болдог тул төрөхөд хүндрэл үүсч болзошгүй.
6. Насанд хүрэхэд яс сийрэгжих магадлал нэмэгддэг.

Жирэмсэн эмэгтэйд Д аминдэм дутагдвал хүүхэд төрөхдөө рахиттай төрнө. Үүнээс сэргийлэхийн тулд:

Зуны улиралд жирэмсний хугацаа таарч байгаа бол 7 хоногт 2-3 удаа 10-15 минутаар наран шарлага хийх хэрэгтэй. Энэ нь 10,000 нэгж Д аминдэмийг амаар уусантай тэнцэх хэмжээний аминдэмийг нарны гэрлийн нөлөөгөөр өөрийнхөө арьсанд үүсгэж авах боломжтой юм.

Хүйтэн сэрүүний улиралд жирэмсний хугацаа таарч байгаа бол Д аминдэм агуулсан хоол хүнс хэрэглэхээс гадна Д аминдэмийг эмчийн заавраар нэмэлтээр уух шаардлагатай юм байна шүү.

Монгол Улсын Засгийн газрын хуралдаанаар гол мөрнийг бохирдуулж, байгаль орчинд хохирол учруулж ашигт малтмалын олборлолт хийж байгаа иргэн, аж ахуйн нэгжүүдэд шалгалт явуулж зөрчлийг таслан зогсоож холбогдох арга хэмжээг авч хэрэгжүүлэхийг салбарын сайд, мэргэжлийн хяналтын байгууллагад үүрэг болгосон.

БОАЖ-ын сайд, Мэргэжлийн хяналтын Ерөнхий газрын дарга нар мэргэжлийн хяналтын байгууллагад үүрэг болгосон ажлынхаа удирдамжийг гарган БОАЖЯ, ЦЕГ, МХЕГ, Ашигт малтмал, газрын тосны газрын хамтарсан ажлын хэсэг Дархан-Уул аймгийн Шарын гол, Сэлэнгэ аймгийн Хүдэр, Ерөө сумдын нутагт ажиллаа.

Эдгээр сумдын нутаг дэвсгэрт үйл ажиллагаа явуулж байгаа 30 гаруй иргэн, ашигт малтмалын тусгай зөвшөөрөлтэй 10 орчим аж ахуйн нэгж, Бичил уурхайн 20 орчим нөхөрлөлд шалгалт хийж холбогдох зөрчлийг илрүүлсэн байна. Шалгалтын явцад Ашигт малтмалын тусгай зөвшөөрөл эзэмшигч аж ахуйн нэгжүүд урт нэртэй хуулиар хориглосон талбайн хасалт хийлгэж нөөцийн тодотгол хийлгээгүй, байгаль орчинд нөлөөлөх байдлын үнэлгээ хийлгэж батлуулаагүй, байгаль орчныг хамгаалах менежментийн төлөвлөгөө батлуулаагүй зэрэг зөрчлийг тогтоосон юм.

Үүний эсрэг Хуульд заасны дагуу арга хэмжээг газар дээр нь авч аж ахуй нэгжүүдийн үйл ажиллагааг зогсоох, техник тоног төхөөрөмжийг лацдаж хууль хяналтын байгууллагад шилжүүлэх арга хэмжээг ЦЕГ-ын мөрдөн байцаах албаны мөрдөгч нар холбогдох арга хэмжээг газар дээр нь авч хэрэгжүүлжээ.

Сэлэнгэ аймгийн Ерөө сумын Бугант тосгонд гэхэд 100 гаруй нөхөрлөл, аж ахуй нэгж үйл ажиллагаа явуулж ашигт малтмалын олборлолт хийдэг. Эдгээрээс ганцхан аж ахуй нэгж ашигт малтмалын тусгай зөвшөөрөлтэй, 7 аж ахуйн нэгж бичиг баримтын бүрдэл дутуу байсан юм. Үлдсэн тусгай зөвшөөрөлгүй, бичиг баримтын зөрчилтэй 70 орчим нь Бичил уурхай эрхэлдэг нөхөрлөл, 40 орчим нь хувиараа олборлолт хийдэг иргэд байдаг байна.

Мөн бичил уурхай эрхлэх асуудлаар Засгийн газрын 2017 оны 151 дүгээр тогтоолыг хэрэгжүүлэх талаар анхаарч ажиллахыг сумдын Засаг дарга нарт үүрэг даалгавар БОАЖ-ын сайдаас хүргүүлэхээр болсон байна.