Аргын тооллын 6 сарын 22. Даваа (Сумьяа) гараг (2026)
Зуны дунд хөх морь сарын шинийн 8, жил өдөр улаагчин туулай, мэнгэ 7 улаан, суудал хий, од тугчин-12, үл зохилдох барилдлагат. Хутганы ир өдөр.
Өдрийн нар ургах/шингэх цаг: 04:53-20:55.-Өдрийн сайн цаг: Туулай(05:40-07:40), морь(11:40-13:40), хонь(13:40-15:40), тахиа(17:40-19:40), хулгана(23:40-01:40), бар(03:40-05:40) болой.
Үс засуулахад нас уртасна маш сайн. Харин тахиа, луу жилтнээ муу цээрлэвэл зохилтой.
Хол газар явагсад хойд зүгт мөрөө гаргавал зохистой.
Хонь, гахай, туулай, нохой жилтнээ аливаа үйлийг хийхэд эерэг сайн. Харин тахиа жилтнээ сөрөг муу.
Нохой жилтний сүлд гараг.
Хүний сүлд бөөр, хөмхийд, гэрийн сүлд өрх, цонхонд орших болой.
Үс засуулах, даллага авах, дуган, шүтээн босгох, равнайлах, мал хөнгөлөх, мал гаргах, ан гөрөө хийх, ад зэтгэрийг номхтгоход сайн. Замд гарах, эд, мал худалдан авах, газар тариалангийн үйл, бэрийн үйл, малын үс, ноос хяргах, хувцас эсгэхэд муу.
Зурхайч Д. Цогтбаатар

Малчид, иргэд, тээвэрчдийн анхааралд:

22-нд нутгийн хойд хэсгээр бороо, уулаараа нойтон цас орж, нутгийн зүүн хагаст салхитай, сэрүүхэн байхыг анхааруулж байна.

2026 оны 06-р сарын 22-ны 08 цагаас 20 цаг хүртэлх

цаг агаарын урьдчилсан мэдээ:

Нутгийн баруун хэсгээр солигдмол үүлтэй, бусад нутгаар үүлэрхэг. Баруун, төв болон зүүн аймгуудын нутгийн зарим газраар бороо, уулаараа нойтон цас орно.

Салхи ихэнх нутгаар баруун хойноос секундэд 5-10 метр, говь, тал, хээрийн нутгаар секундэд 13-15 метр хүрч ширүүснэ.

Дархадын хотгор, Хэнтийн уулархаг нутаг, Туул, Тэрэлж, Хэрлэн голын хөндийгөөр +9…+14 градус, Их нууруудын хотгор, Алтайн өвөр говиор +27…+32 градус, Алтай, Хангай, Хөвсгөлийн уулархаг нутаг, говийн бүс нутгийн баруун хэсгээр +21…+26 градус, бусад нутгаар +15…+20 градус дулаан байна.

УЛААНБААТАР ХОТ ОРЧМООР: Үүлэрхэг. Бага зэргийн бороо орно. Салхи баруун хойноос секундэд 5-10 метр. Бага зэрэг дулаарч +12…+14 градус дулаан байна.

БАГАНУУР ОРЧМООР: Үүлэрхэг. Бага зэргийн бороо орно. Салхи баруун хойноос секундэд 6-11 метр. Бага зэрэг дулаарч +12…+14 градус дулаан байна.

ТЭРЭЛЖ ОРЧМООР: Үүлэрхэг. Шөнөдөө бороо орохгүй. Өдөртөө бага зэргийн бороо орно. Салхи баруун хойноос секундэд 3-8 метр. Бага зэрэг дулаарч +10…+12 градус дулаан байна.

Сүхбаатар дүүргийн 9 дүгээр хороо, Баянбүрдийн тойргийн зүүн хойно Ногоон нуур орчимд нийслэлийн Засаг дарга бөгөөд Улаанбаатар хотын Захирагч Б.Пүрэвдагва болон холбогдох албаныхан өнөөдөр ажиллалаа. Тус байршилд 5.5 га газарт ногоон байгууламж бүхий цэцэрлэгт хүрээлэн байгуулж, бүх насны хүүхдэд зориулсан тоглоомын талбай барих юм. Энэ хүрээнд нийт 85 нэгж талбарыг чөлөөлөхөөс өнөөдрийн байдлаар газар чөлөөлөх ажлын явц 84.7 хувьтай үргэлжилж байна.

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Ногоон нуурт баригдах цэцэрлэгт хүрээлэн 133 автомашины зогсоолтой, бүх насны хүүхдэд зориулсан тоглоомын талбай, явган болон дугуйн замтай байна. Мөн ногоон нуурын байгалийнх нь тогтцыг эвдэхгүйгээр хиймэл нуур үүсгэн тохижуулна. Тохижилтын ажилд ХААН банктай хамтран ажиллахаар хэлэлцэж байна. Нийслэлээс нийтийн эзэмшлийн талбай, ногоон байгууламжийг нэмэгдүүлж, хэд хэдэн байршилд газар чөлөөлнө. Тухайлбал, Баянгол дүүргийн хойд энгэр буюу СОТ-ын ногоон байрны ард 10 га газар чөлөөлж, ногоон байгууламж бүхий цэцэрлэгт хүрээлэн байгуулахаар төлөвлөж байна. Жуковын хөшөөний арын 6000 ам метр газрын зөвшөөрлийг цуцалж, цэцэрлэгт хүрээлэн байгуулна. Хотод хүн амын нягтаршил ихтэй газарт дахин орон сууцны барилга бариулахгүй. Хотын төвд дахиж барилга, газрын “А” зөвшөөрөл олгохгүй. Харин орон сууцны бодлогыг гэр хорооллын бүсэд хэрэгжүүлж, барилгын ажилд дотоодын аж ахуйн нэгжээ оролцуулдаг байхаар дэмжинэ. Иргэдийн амьдрах орчныг сайжруулж, хүндээ ээлтэй хотыг төлөвлөх нь зүйтэй” гэлээ.

Нийслэлийн Ерөнхий архитектор Б.Батцолмон “Ногоон нуур орчимд хэрэгжиж буй “1008 айл” орон сууцны төслийн дэргэд 960 хүүхдийн хүчин чадалтай сургууль барихаар барилгын ажил явагдаж байна. Өмнө нь энд Үндэсний урлагийн их театр барихаар төлөвлөж байсан. Мөн тухайн байршилд 3.4 га газрыг чөлөөлж, үндэсний томоохон компани “АПУ”-тай хамтарч, 6000 хүний суудалтай “UB Arena” спортын ордон байгуулна” гэв.

Нийслэлийн Газар зохион байгуулалтын албаны дарга Г.Мөнхбаатар “Ногоон нуурын баруун талд Чингэлтэй дүүргийн 9 дүгээр хороонд хамаарах 114 нэгж талбарыг автомашины зогсоол болгож, чөлөөлөхөөр 2026 оны газар зохион байгуулалтын төлөвлөгөөнд тусгасан. Нийт 7.1 га газар чөлөөлнө. Өнөөдрийн байдлаар нийслэлээс гаргасан үнэлгээг зөвшөөрсөн 31 нэгж талбарын эзэмшигч, зөвшилцөх шатанд 54 нэгж талбарын эзэмшигчтэй хэлэлцээр үргэлжилж байна. Энэ онд газар чөлөөлөлт бүрэн дуусна” гэлээ.

Монгол Улсын Ерөнхий сайд Н.Учрал Монгол Улсын гавьяат багш С.Шаарийбууг Төрийн ордонд /2026.06.19/ хүлээн авч уулзаж, Засгийн газрын шийдвэрээр гурван өрөө орон сууцны батламж гардуулан өгөв.

Ерөнхий сайд  “Таны алдсан бүхнийг нөхөж чадахгүй ч амьдралд тань тус дэм болохыг хүслээ. Монгол төр таны өмнө үүргээ санаж, Сонгинохайрхан дүүргийн IX хороонд байрлах “Ногоон орон сууц” төслийн орон сууцанд гурван өрөө байр гардуулж байна. Та өнөөдөр байрандаа орж болно. Монгол төр таны зовлонг бүрэн нимгэлж чадахгүй ч таныг ганцааранг нь үлдээхгүй, хамт байгаа. Засгийн газар иргэнийхээ төлөө, үнэнийг тогтоолгохын төлөө хичээн ажиллана” гэлээ.

Малайзад амь насаа алдсан охиныхоо төлөө, хэргийг үнэн шударгаар шийдвэрлүүлэх гэж 20 жил зүтгэхдээ, хоёр өрөө байраа зарж аав хүний ёсоор бүхий л боломжоороо хичээсээр ирсэн. Одоо ч үнэн мөнийг нь тогтоолгохын төлөө явж байна.  Айлын зуслангийн зуны байшинд олон жил амьдарсан. Ганц өвөл ч гэсэн тухтай байхсан гэж боддог байлаа. Гашуун нулимсаа залгиж явсан. Баярын нулимсаа ил гаргах өдөр ирдэг юм байна хэмээн гавьяат багш С.Шаарийбуу сэтгэгдлээ хуваалцлаа.

Уулзалтын дараа тэрбээр гурван өрөө байрандаа очиж, хүлээн авлаа.

Малчид, иргэд, тээвэрчдийн анхааралд:

21-нд Хэнтийн уулархаг нутгаар үргэлжилсэн хүйтэн бороо, уулаараа нойтон цас орж, Хангайн уулархаг нутгаар дуу цахилгаантай аадар бороо орж, нутгийн зүүн хагаст салхи шуургатай байхыг анхааруулж байна.

2026 оны 06-р сарын 21-ний 08 цагаас 20 цаг хүртэлх

цаг агаарын урьдчилсан мэдээ:

Нутгийн баруун хэсгээр солигдмол үүлтэй, бусад нутгаар үүлэрхэг. Төв болон зүүн аймгуудын нутгийн зарим газраар бороо, Хэнтийн уулархаг нутгаар үргэлжилсэн хүйтэн бороо, уулаараа нойтон цас орно. Салхи ихэнх нутгаар баруун хойноос секундэд 5-10 метр, говь, тал, хээрийн нутгаар секундэд 13-15 метр хүрч ширүүснэ. Дархадын хотгор, Хэнтийн уулархаг нутаг, Туул, Тэрэлж, Хэрлэн, Онон, Улз голын хөндийгөөр +5…+10 градус, Их нууруудын хотгор, Алтайн өвөр говиор +24…+29 градус, Алтай, Хангай, Хөвсгөлийн уулархаг нутаг, говийн бүс нутгийн өмнөд хэсгээр +18…+23 градус, бусад нутгаар +11…+16 градус дулаан байна.

УЛААНБААТАР ХОТ ОРЧМООР: Үүлэрхэг. Бороо, уулаараа нойтон цас орно. Салхи баруун хойноос секундэд 6-11 метр. +7…+9 градус дулаан байна.

БАГАНУУР ОРЧМООР: Үүлэрхэг. Ялимгүй хур тунадас орно. Салхи баруун хойноос секундэд 6-11 метр. +8…+10 градус дулаан байна.

ТЭРЭЛЖ ОРЧМООР: Үүлэрхэг. Ялимгүй хур тунадас орно. Салхи баруун хойноос секундэд 6-11 метр. +5…+7 градус дулаан байна.

Монгол Улсын Ерөнхийлөгч Ухнаагийн Хүрэлсүх цахим хөгжил, инновац, харилцаа холбооны салбарын ажилтан, албан хаагчидтай уулзлаа.

Ерөнхийлөгч, эх орныхоо өнцөг булан бүрт харилцаа холбоо, мэдээллийн технологийн дэвшилтэт технологи нэвтрүүлж, мэдлэг оюунд тулгуурласан цахим үндэстнийг цогцлоон хөгжүүлэх үйлсийн төлөө хүчин зүтгэж байгаа бүх хүнд талархал илэрхийллээ.

Цаашид төрийн үйлчилгээг цахимжуулан, иргэдэд илүү хүртээмжтэй, ил тод, түргэн шуурхай хүргэж, улс орныхоо нийгэм, эдийн засгийн хөгжилд улам их хувь нэмэр оруулахыг салбарын хамт олонд хүсэн ерөөлөө.

Тэрбээр төрийн тэргүүнээр сонгогдсоноосоо хойш хийсэн ажил, хэрэгжүүлж байгаа үндэсний хөдөлгөөн, хөтөлбөрийн явц, гадаад харилцаа, улс орны нийгэм, эдийн засгийн байдал зэргийн талаар товч танилцууллаа.

Салбарын яам төрийн үйлчилгээг иргэдэд хүртээмжтэй, ил тод, шуурхай хүргэхийн тулд:

• Цахим засаглалыг бэхжүүлэх,
• Харилцаа холбооны дэд бүтцийг өргөжүүлэх,
• Өндөр хурдны интернэтийн хүртээмжийг нэмэгдүүлэх,
• 5G технологи нэвтрүүлэх,
• Кибер аюулгүй байдлыг бэхжүүлэх
• Инновац, технологид суурилсан эдийн засгийг хөгжүүлэх,
• Хувийн хэвшил болон олон улсын байгууллагуудтай идэвхтэй хамтрахад анхаарч байна.

Нийгмийн сүлжээнд хүүхдийн аюулгүй байдлыг хангах тухай, Өгөгдлийн тухай анхдагч хуулийн төсөл боловсруулж, нээлттэй хэлэлцүүлж эхэлжээ.

Төсөл батлагдсанаар цахим орчинд хүүхдийг хамгаалах, өгөгдлийг эдийн засгийн эргэлтэд оруулах, байгальд ээлтэй Ногоон дата төвүүд байгуулах зэрэг боломж бүрдэх юм.

Ерөнхийлөгч У.Хүрэлсүх Харилцаа холбоо, мэдээллийн технологийн салбарын Ахмадын нэгдсэн холбооны дарга Намсрайн Төмөрхүү, “Монголын цахилгаан холбоо” ХК-ийн Техник, технологийн ашиглалтын газрын Техникийн үйлчилгээний албаны дамжуулах байгууламжийн тасгийн инженер, Монгол Улсын зөвлөх инженер Цэрэнбатын Баасанхүү нарт Гавьяат холбоочин цол хүртээлээ.

Мөн нэр бүхий эрхмүүдийг төрийн дээд одон, медалиар шагналаа.