Монгол Улсад жуулчин ангиллын визээр ирээд визийн хугацаа хэтрүүлэн, хууль бусаар оршин сууж байсан Бүгд Найрамдах Гана Улсын иргэнийг албадан гаргалаа. Тодруулбал, уг иргэн нь жуулчлах буюу K2 ангиллын цахим визээр 2024 онд Монгол Улсын хилээр нэвтэрсэн бөгөөд түр ирэгчийн визийн хугацаа хэтрүүлэн, хууль бусаар оршин сууж байсныг хяналт шалгалтаар илрүүлсэн байна.

Иймд холбогдох хууль тогтоомжийн дагуу торгох шийтгэл ногдуулж, хоёр жилийн хугацаанд Монгол Улсад дахин оруулахгүй байх хугацаа тогтоон албадан гаргав.

Гана улсын иргэдэд аялал жуулчлалын зорилгоор 30 хүртэл хоногийн хугацаатай аяллын цахим виз олгож байгаа хэдий ч визийн хугацаа хэтрүүлэх, ирсэн зорилгоосоо өөр үйл ажиллагаа явуулах зөрчлүүд сүүлийн жилүүдэд нэмэгдэж байна. Тухайлбал, 2025 онд Гана улсын нийт 10 иргэнийг албадан гаргасан бөгөөд тэдгээрийн дийлэнх нь түр ирэгчийн визийн хугацаа хэтрүүлсэн үндэслэлээр Монгол Улсаас албадан гаргагдсан байна.

Аргын тооллын 2 сарын 4. Лхагва (Буд) гараг (2026)
Өвлийн адаг шарагчин үхэр сарын билгийн 18, шарагчин тахиа, мэнгэ 1 цагаан, суудал уул, од бага морь-10, үхэх барилдлагат. Хутганы ир, бага хар өдөр.
Өдрийн нар ургах/шингэх цаг: 08:16-17:56.
Өдрийн сайн цаг: Туулай(05:40-07:40), морь(11:40-13:40), хонь(13:40-15:40), тахиа(17:40-19:40), хулгана(23:40-01:40), бар(03:40-05:40) болой.
Үс бүү засуул эд, малын гарлагатай тул муу цээрлэвэл зохилтой.
Хол газар явагсад баруун хойд зүгт мөрөө гаргавал зохистой.
Үхэр, тахиа, гахай, хулгана жилтнээ аливаа үйлийг хийхэд эерэг сайн. Харин туулай, могой, морь жилтнээ сөрөг муу.
Гахай, хулгана жилтний сүлд гараг, харин могой, морь жилтнээ харш гараг.
Хүний сүлд алга, бөгс, хасанд, гэрийн сүлд өрх, цонхонд орших болой.
Гал тахих, буяны үйл, газар хагалах, тариа ногоо тарих, малын үс, ноос хяргах, мал хөнгөлөх, хөрөнгө оруулахад сайн. Үс засуулах, дээл хувцас, гэр орны хэрэгсэл эсгэх, замд явах, эд, мал худалдан авах, үхэгсдийн үйлд муу.
Зурхайч Д. Цогтбаатар

Малчид, иргэд, тээвэрчдийн анхааралд:  

04-нд нутгийн хойд хэсгээр хүйтний эрч чангарч, ихэнх нутгаар салхи шуургатай байхыг анхааруулж байна.

2026 оны 02-р сарын 04-ны 08 цагаас 20 цаг хүртэлх 

цаг агаарын урьдчилсан мэдээ: 

  Ихэнх нутгаар үүлшинэ. Баруун аймгуудын нутгийн баруун болон хойд хэсэг, төв, зүүн аймгуудын нутгийн зарим газраар цас орж, цасан шуурга шуурна. Салхи ихэнх нутгаар баруун өмнөөс баруун хойш эргэж секундэд 5-10 метр, нутгийн зарим газраар секундэд 12-14 метр хүрч ширүүснэ. Дархадын хотгор, Завхан, Заг-Байдраг голын эх, Идэр, Тэс, Ерөө голын хөндийгөөр -23…-28 градус, Увс нуурын хотгор, Хангай, Хөвсгөл, Хэнтийн уулархаг нутаг, Эг, Үүр, Сэлэнгэ, Хараа, Туул, Тэрэлж, Хэрлэн голын хөндийгөөр -17…-22 градус, говийн бүс нутгийн өмнөд хэсгээр +1…-4 градус, Хангайн нурууны өвөр бэл болон говийн бүс нутгийн хойд хэсгээр -5…-10 градус, бусад нутгаар -11…-16 градус хүйтэн байна.

УЛААНБААТАР ХОТ ОРЧМООР: Үүл багасна, цас орохгүй. Салхи баруун хойноос секундэд 5-10 метр. Агаарын температур өмнөх өдрөөс 9 градусаар хүйтэрч -16…-18 градус хүйтэн байна.

БАГАНУУР ОРЧМООР: Үүл багасна. Цас орохгүй. Салхи баруун хойноос секундэд 5-10 метр. Агаарын температур өмнөх өдрөөс 5 градусаар хүйтэрч -16…-18 градус хүйтэн байна.

ТЭРЭЛЖ ОРЧМООР: Үүл багасна. Цас орохгүй. Салхи баруун хойноос секундэд 5-10 метр. Агаарын температур өмнөх өдрөөс 10 градусаар хүйтэрч -18…-20 градус хүйтэн байна.

Улаанбаатар хотын нийтийн эзэмшлийн гудамж, зам, талбай, гэр болон орон сууцны хорооллын цэвэрлэгээ үйлчилгээг сайжруулах, иргэдийн ая тухтай ажиллаж, амьдрах орчин, нөхцөлийг бүрдүүлэх зорилгоор сар шинийн баярыг угтсан бүх нийтийн их цэвэрлэгээг энэ сарын 10-15-ны өдрүүдэд зохион байгуулна.

Энэ талаар УБЗАА-ны Орчны бохирдол, хог хаягдлын удирдлагын хэлтсийн дарга Б.Мөнх-Эрдэнэ “Улаанбаатар хотын хэмжээнд жилд найман удаа их цэвэрлэгээг зохион байгуулж, хотын өнгө үзэмж, цэвэр цэмцгэр орчныг сайжруулахад анхаарч ажилладаг.   Энэ удаа сар шинийн баярын өмнө буюу энэ сарын 10-15-ны хооронд бүх нийтийн их цэвэрлэгээг зохион байгуулна. Ингэснээр сар шинийн баярын өдрүүдэд хот цэвэр цэмцгэр байх боломж бүрдэнэ. Мөн их цэвэрлэгээнээс гарсан хог хаягдлыг хариуцсан байгууллагууд шуурхай тээвэрлэж, дүүргүүдийн 300-500 орчим машин, техник бэлэн байдалд ажиллана. Түүнчлэн хог хаягдлыг цаг алдалгүй тээвэрлэх зорилгоор шөнийн уртасгасан тээвэрлэлт хийх чиглэлийг дүүргүүдэд өгч байна. Иймд дүүрэг, хороод, ААН байгууллага, иргэдийг бүх нийтийн их цэвэрлэгээнд идэвхтэй оролцохыг уриалж байна” гэв.

Залуу нас ямагт хийж бүтээх эрэл хүсэл, тэмүүлэл дүүрэн, их үйлсийн гараа байдаг. Энэчлэн  өмгөөллийн “Цогц өмгөөлөл” хууль зүйн фирмийн гүйцэтгэх захирал, Хуульч, өмгөөлөгч Отгонбаатарын Билгүүн   ИЗОУИС-ийн Хууль зүйн сургуульд элсэн суралцаж байх хугацаандаа буюу 2019 онд тус “эрдэм шинжилгээ, судалгааны ажлаар сургуулийнхаа ОНЫ ШИЛДЭГ ОЮУТАН” болж,  2021 онд  “ШИЛДГИЙН ШИЛДЭГ ТӨГСӨГЧ” болж төгссөн туйлын хичээнгүй,  байнга мэдлэг мэргэжлээ зузаатган өөрийгөө хөгжүүлж байдаг туйлын  идэвх зүтгэлтэй нэгэн билээ. Ингээд залуу өмгөөлөгч  О.Билгүүний яриаг уншигч танаа хүргэж байна.

-Алсын зорилго төлөвлөгөөтэй хүнийг амжилт тосч байдаг. Энэ зураг жимийн мөрийг оюутан байхаасаа эхлүүлж байсан танд сэтгэлийн гүнээс талархнам.

-Миний хувьд сургуулиа дүүргэсэн цагаасаа хойш өмгөөллийн салбарт ажиллаж, 2023 онд хуульчийн эрхээ авч, 2024 оноос нөхдийн хамтаар өмгөөллийн “Цогц өмгөөлөл” хууль зүйн фирмийг үүсгэн байгуулж, өнөөдрийг хүртэл гүйцэтгэх захирлаар, мөн 2025 оноос эхлэн Монголын Өмгөөлөгчдийн холбооны Өмгөөлөгчийн нийтэд тустай мэргэжлийн үйл ажиллагаа эрхэлсэн хорооны тэргүүнээр тус тус ажиллаж байна.

-Хуульч, өмгөөлөгчдийг  ажлын ур чадвар, туршлага, нэр хүндээрээ өөрөө өөрийнхөө амьдралыг бүтээж чаддаг мэргэжил гэж хардаг.

-Хуульчийн мэргэжлийн нэг гол онцлог нь цаг, минут тутам өөрийгөө хөгжүүлэх хэрэгцээ, шаардлага байдаг. Хэрэв зээ нэг минут, секунд хоцрох, овсгоо самбаа алдах л юм бол заргаа алдахаас эхлээд үйлчлүүлэгчдийнхээ эрх, ашгийг хохироож, хориулж, ялагдалд хүрдэг маш хариуцлагатай ажил.Тийм ч учраас миний хувьд үйлчлүүлэгчдийнхээ бизнесийн болон эрх зүйн ач холбогдол бүхий уулзалт, байцаалт, шүүх хуралдаан бүрт онцгойлон ач холбогдол өгч, тухайн хэрэг, маргааны хууль хэрэглээ, шүүхийн практик, онол, номыг тултал судалсны эцэст дүгнэлт гаргаж ажилладаг. Нөгөөтэйгүүр хуульчийнхаа үүднээс тал бүрийн мэдлэг, ойлголт, мэдээллийг цаг алдалгүй олж авахын тулд мэргэжлийн холбоодын болон хуулийн байгууллагуудын сургалт, семинар, хэлэлцүүлэгт тогтмол оролцож байхыг эрмэлзэж байна. Эдгээр нь мэдээ, мэдээллээс хоцрохгүй, шүүх хуралдаанд ялагдахгүй, цаашлаад үйлчлүүлэгчээ хохироохгүй байх гэсэн туйлын зорилго, сэтгэлтэй  минь шууд холбоотой.

-Энэ хугацаанд та хуулийн салбараас юуг олж харж байна вэ, залуу хүний нүдээр?

-Өнгөрсөн 5 жилийн хугацаанд хууль зүйн салбарт, тэр дундаа өмгөөллийн салбарт тасралтгүй ажиллалаа. Энэ хугацаанд Монгол Улсын хууль, эрх зүйн орчин, түүнд хандаж буй иргэдийн хандлага, сэтгэлгээг багагүй ойлгож, нийгэмд гарч буй төрөл бүрийн хэрэг, маргаан, тэдгээрийн гарах болсон шалтгаан, нөхцөлийг гүнзгий мэдэрч  үзлээ.

Үүнээс дүгнэхэд Монгол Улсын хууль, эрх зүйн орчин, энэ салбарт хэрэглэгдэж буй онол, ном нь Монгол хүний сэтгэлгээний уугуул төрх /менталитет/-тэй ер авцалдахгүй, яв цав нийцэж өгөхгүй байна. Энэ нь бид гадны буюу өрнийн соёлт улсуудаас хуулийг хуулбарлан тавьсантай шууд холбоотой  болов уу. Өөрөөр хэлбэл, бид өөрийн гэсэн ёс, зан заншил, соёл, философитой, түүнийгээ олон мянган жилийн түүхэнд уламжилж, хэрэгжүүлж ирсэн ард түмэн, тусгаар улс болохынхоо хувьд Монгол хүн, ардад тохирсон өөрийн гэсэн онол, номыг хэрэгжүүлж, хууль тогтоомждоо тусгаж хэрэглэх хэрэгцээ бий гэж харж байна.

– Таны хамгийн бардамнал, омогшил төрүүлсэн зүйл юу вэ?

Дээр дурдсанчлан иргэдээ орон байртай болгож, үйлчлүүлэгчээ цагаатгуулж, суллуулна гэдэг нь миний ажлын баяр баясал, омогшил болж байгаа юм. Хилсээр гүтгэгдэн олон жил, сар шалгагдаж, хоригдож туйлдаа хүрсэн, итгэл найдвараа алдсан үйлчлүүлэгчийнхээ гав гинжийг нь мулталж, Шүүх танхимаас суллаад аваад гарахад тэнгэрт нисэх шиг л тийм сайхан мэдрэмжийг төрүүлдэг.

Яг л тэр үед “энэ л миний хийх ёстой ажил байна, би л хийх ёстой юм байна” гэх итгэл найдвар, урам зориг улам их бадардаг.

“Миний бие  хэргээ шийдүүлж, заргаа авч, хүнээ суллуулчихаад яллаа гэж хэлэх дуртай. Зарим хуульчид маань “ялалт” гэхийг үгүйсгэдэг ч  би ялсан гэж бардам хэлмээр санагддаг. Хуульчид бид хүний амьдрал, хувь тавиланг шийддэг чухал мэргэжлийн эзэд шүү дээ.”

-Аливаа хүн хүссэн амжилтандаа хүрэхийн тулд яах ёстой гэж боддог вэ?

Ерөөсөө л тууштай байх хэрэгтэй. Нэгэн эрдэмтэй хүн хэлсэн байдагдаа “Амьдрал бол орой нь харагдахгүй уул өөд зогсолтгүй мацах юм” гэж, яг түүн шиг хүссэн амжилт, зорьсон зорилгынхоо төлөө зогсолтгүй тэмц, хэзээ ч битгий бууж өг. Энэ нь гарцаагүй таныг амжилтад хүргэх болно.

Өмгөөлөгч дан ганц хүний эрхийг бус хүнийг өмгөөлдөг. Хүнийг гэх өчүүхэн сэтгэл нь өмгөөлөл. Тэгэхээр эндээс бусдыг гэх сэтгэл, итгэл даах чадвар хамгийн чухал байгаа юм.

-Аливаа хэрэг маргааны асуудалдаа ямар зарчим баримталж, үйлчлүүлэгчидтэйгээ хэрхэн ямар журмаар ажилладаг вэ?

Аливаа хэрэг, маргаанд тууштай байх зарчмыг нэн түрүүнд баримталдаг. Үүнийхээ дараа буюу судалгаа, шинжилгээний эцэст зөрчигдсөн эрх, хууль ёсны ашиг сонирхлыг олж тогтоон, түүнийгээ мөн л хуулийн хүрээнд тууштай хамгаалахыг хичээдэг.

Энэ явцад төрийн буюу хүчний байгууллага, албан хаагчдаас маш их дарамт, шахалтууд ирдэг бөгөөд эдгээр хүндрэл, бэрхшээлийн эсрэг гагцхүү хүний эрхийг тууштай хамгаалах гэсэн чинхүү хүсэл эрмэлзэл, зарчим минь бамбай бас зэвсэг болж өгдөг.

Миний мэргэжил миний зэвсэг, мөн бүх ажлын минь “Б” төлөвлөгөө байдаг. Иймд үйлчлүүлэгчдэдээ мэдээ, мэдээллийг тогтмол өгч, хэрэг, маргаантай нь холбоотой мэдээллээр таслахгүй байх, мөн тэднээсээ байнга мэдээлэл сонсож, харилцан ярилцах журмаар ажилладаг.

 -2025 он танд ямар хөгжил дэвшлийг авчирсан буюу ямар он жил болж өнгөрөв. Үүнээс улбаатай цаашдын зорилго зорилтуудаасаа хуваалцахгүй юу?

2025 оны хувьд манай хуулийн фирм ам бүл нэмэгдэж 6 өмгөөлөгч, 1 хуульч, 2 туслах, нийт 9 мэргэжилтний бүрэлдэхүүнтэй болж бүрэлдэхүүнээ тэллээ. Энэ нь өмгөөллийн үйлчилгээг багаар, алдаа багатай гүйцэтгэх том давуу тал бөгөөд орчин цагт хууль зүйн туслалцаа, өмгөөллийн үйлчилгээг хүсэх иргэд, байгууллагуудын хэрэгцээ, шаардлагад нийцэж байгаа юм. Өөрөөр хэлбэл, хууль зүйн туслалцаа авахаар хандах ямар ч хүнд бид багаар үйлчилж, тал бүрийн эрсдэл, нөгөөтэйгүүр боломж, гарцыг санал болгох сайн талтай гэсэн үг юм.

Түүнчлэн миний бие эрүүгийн болон иргэний эрх зүйн чиглэлээр өмгөөллийн үйлчилгээ үзүүлдгийн хувьд 2025 онд орон сууц захиалаад луйвардуулсан 30 гаруй иргэд, захиалагчдыг орон байртай нь үлдээж, эрүүгийн хэрэгт хилсээр гүтгэгдэн шалгагдаж байсан 3 үйлчлүүлэгчээ цагаатгуулж, үндэслэлгүйгээр ял шийтгүүлж 2 сар гаруй хоригдсон байсан 1 үйлчлүүлэгчээ давж заалдах шатны шүүхийн танхимаас суллуулж, 2 үйлчлүүлэгчийнхээ хэргийн зүйлчлэлийг хөнгөрүүлэн өөрчлүүлж шийдвэрлүүллээ.

Эдгээрээс дүгнэхэд 2025 он салбартаа болон үйлчлүүлэгчдэдээ өөрийгөө бага ч атугай таниулж, мэдрүүлсэн үр дүнтэй сайхан жил болж өнгөрлөө. Өмгөөлөгч хүнд өдөр тутамд үүсдэг нэг шаналал нь “үйлчлүүлэгчээ хохироочих вий, заргаа алдах вий” гэх айдас байдаг. Харин энэхүү айдсыг шүүхэд заргаа авах, ялалт байгуулах үедээ л хэсэгхэн зуур мартаж чаддаг. Ирээдүйн зорилгын хувьд 10-30 жилийн хэтийн ерөнхий төлөвлөгөөгөө гаргасан. Энэ  хүрээнд жил бүрийн зорилтуудыг тавьсан байгаа. Тиймээс одоо хийж байгаа ажил, алхам бүр маань зорилт хангах, зорилгод хүрэхэд чиглэгдсэн. Зарим зорилгынхоо нууц бишээс нь дурдвал иргэн бүрийн хууль, эрх зүйн асуудалд хүрч ажиллаж чадах томоохон хууль зүйн фирмийг бүтээхийг зорьж байна. Нэг ёсондоо иргэнд тулгамдаж болох бүхий л асуудалд хууль зүйн цогц үйлчилгээг санал болгож, өөрийн салбар, нэгжүүдээрээ дамжуулан хүн бүрт хүрч чадах тийм байгууллага болохыг зорьж байгаа.

Д.Гэгээ

Эдийн засаг, хөгжлийн яамны дэргэдэх Хөрөнгө оруулагчдын эрх ашгийг хамгаалах төвд “Аялал жуулчлалын салбарын 7 хоног” арга хэмжээ нээлтээ хийлээ. Энэхүү арга хэмжээг аялал жуулчлалын салбарын гадаад, дотоодын хөрөнгө оруулагч, бизнес эрхлэгчдэд тулгамдаж буй асуудлыг тодорхойлж, шийдвэрлэх арга замын талаар хэлэлцүүлэх бөгөөд Засгийн газрын бодлогын хүрээнд аялал жуулчлалын салбар дахь хөрөнгө оруулалтын орчныг сайжруулах, хөрөнгө оруулагчдын хууль ёсны эрх ашгийг хамгаалах, төр-хувийн хэвшлийн хамтын ажиллагааг бэхжүүлэх зорилгоор зохион байгуулж байна.

Арга хэмжээний нээлтэд Соёл, спорт, аялал жуулчлал, залуучуудын яамны Төрийн нарийн бичгийн дарга Б.Бат-Эрдэнэ оролцож Монгол Улсын аялал жуулчлалын салбарын өнөөгийн байдал, Засгийн газраас хөрөнгө оруулалтыг дэмжих чиглэлд Аялал жуулчлалыг онцгойлон хөгжүүлэх бүсүүдийг бий болгож, тэдгээрийн менежментийн төлөвлөгөөг нэгдсэн зохион байгуулалт, төлөвлөлтэйгөөр хэрэгжүүлэх, улмаар хөрөнгө оруулагчдыг татах чиглэлд хамтран ажиллахаа илэрхийллээ.

Монгол Улсад хүний эрхийг хамгаалах үндэсний, хараат бус, бие даасан байгууллага үүсэн бий болсны 25 жилийн ой өнөөдөр тохиож байна. Улсын Их Хурал 2000 оны 12 дугаар сарын 07-ны өдөр Монгол Улсын Хүний эрхийн Үндэсний Комиссын тухай хуулийг баталж, Улсын Их Хурлын 2001 оны 02 дугаар сарын 02-ны өдрийн 01 дүгээр тогтоолоор Комиссын гурван гишүүн томилогдож, тангараг өргөснөөр энэ байгууллага үйл ажиллагаагаа эхэлсэн түүхтэй.

Нийт монголчуудын эрх, эрх чөлөөг хамгаалах, хангах Хүний эрхийн Үндэсний Комиссын үйл ажиллагааг улам идэвхжүүлэн бэхжүүлэх хэрэгцээ, шаардлагыг энэ түүхэн өдөр /2026.02.02/ хөндөн хэлэлцлээ.

Улсын Их Хурлын дарга Н.Учрал “Монгол Улсын Хүний эрхийн Үндэсний Комисс-25 жил” хүндэтгэлийн хурлыг нээж хэлсэн үгэндээ Шинэ Үндсэн хуулиа баталсан цагаас өнөөг хүртэлх хугацаанд үе үеийн парламент Монгол хүний эрх, эрх чөлөөг хангах, хамгаалах талаар бодлого шийдвэрээ тодорхойлон гаргаж, хууль тогтоомжийг боловсронгуй болгох чиглэлээр тууштай ажиллаж ирснийг тодотгосон. Тэрбээр, Хүний эрхийг хамгаалах үндэсний тогтолцоо бий болж, эрх зүйн зохих орчин бүрдсэн боловч өнөөдөр манай оронд хүний эрхийн хамгаалалт, баталгаажилт, хуулийн хэрэгжилттэй холбогдсон сорилтууд, шийдэл хүлээсэн олон асуудал байгааг нийгмээрээ мэдэрч байна. Улсын Их Хурал ХЭҮК-ын илтгэлийг жил бүр хэлэлцэж, тодорхой тогтоол, шийдвэрүүдийг баталж ирсэн. Энэ нь парламент хүний эрхийн асуудлыг нэг удаагийн хэлэлцүүлэг бус, байнгын анхаарлын төвд авч үзэх оролдлого хийж байгааг харуулж байна хэмээсэн. Гэхдээ бид энд бодит байдлыг ил тод, шулуухан үнэлэх ёстойг УИХ-ын дарга дурдаад Комиссын хараат бус байдал бол зөвхөн тус байгууллагын асуудал биш, харин парламентын өөрийнх нь ардчилсан чанарын баталгаа гэдгийг онцоллоо.

УИХ-ын дарга Н.Учрал, өнөөдөр бид хүний эрхийн асуудлыг өнгөрсөн цаг дээр ярьж болохгүй. Хүүхдийн эрх, эмзэг бүлгийн хамгаалал, тэгш хүртээмж, дижитал орчин дахь эрхийн баталгаа зэрэг асуудал бодит сорилт хэвээр байна. Хүүхдийн эрхийн асуудал Комиссын илтгэлүүдэд олонтоо хөндөгдөж ирсэн нь санамсаргүй тоо биш. Хүүхдийн эрх бол ирээдүйн тухай сайхан үг бус, төр өнөөдөр ямар чанартай бодлого хэрэгжүүлж байгааг хэмжих бодит шалгуур юм. Үүнд парламент, төрийн байгууллагууд илүү харилцан уялдаатай, илүү хариуцлагатай, илүү системтэй ажиллах шаардлагатай хэвээр байна гэсэн юм. Улсын Их Хурлын даргын хувьд энэ жилийг “Хүүхэд хамгааллын жил” болгон зарлаж, гэр бүл, эх нялхас, хүүхдийн эрх, ашиг сонирхлыг төрийн бодлогын төвд тавьж, Үндсэн хуулиар хүлээсэн үүргээ бодит ажил болгоход онцгойлон анхаарч байгааг энд онцлон тэмдэглэв. Мөн хүний эрх, эрх чөлөөг хязгаарласан, зөрчсөн, боомилсон хууль, журмын хүлээс чөдөр тушааг тайлах “Чөлөөлье” санаачилгыг төрийн бодлогын түвшинд хэрэгжүүлж эхэлсэн. Энэ нь хүний эрхийг хөгжлийн хөгжлийн суурь гэж үзэх парламентын шинэ хандлагын илэрхийлэл хэмээн тодотгоод, Хүний эрхийн Үндэсний Комиссын үе үеийн гишүүд, ажилтан, хүний эрхийн хамгаалагчид, иргэний нийгмийн бүх төлөөлөлд Монгол Улсын Их Хурлын нэрийн өмнөөс чин сэтгэлийн талархал илэрхийллээ.

Тус арга хэмжээнд УИХ-ын гишүүн, Хүний эрхийн дэд хорооны дарга С.Эрдэнэболд, УИХ-ын гишүүн Л.Энхнасан, Б.Мөнхсоёл, Х.Баасанжаргал, УИХ-ын Ерөнхий нарийн бичгийн дарга Л.Өлзийсайхан, Монгол Улс дахь Нэгдсэн Үндэстний Байгууллагын Суурин зохицуулагч Яап ван Хиердэн болон хүний эрхийн төр, иргэний нийгмийн байгууллагуудын төлөөлөл оролцов.

Энэхүү хурлаар цаашид улсын хөгжлийн бодлогод хүний эрхэд суурилсан хандлагыг нэвтрүүлэх, “Хэнийг ч үл орхих” засаглалыг хөгжүүлэх, хууль тогтоомжуудад хүний эрхийн үнэлгээг тогтмол хийж, бодит хэрэгжилтийг хангуулахад үндэсний тогтолцоог ажиллуулах шаардлагатай гэсэн байр суурийг төр, иргэний нийгмийн төлөөллүүд илэрхийлсэн юм. Түүнчлэн ХЭҮК-ын 25 жилийн хугацаанд хийж хэрэгжүүлсэн ажил үйлс, цаашид анхаарах тулгамдсан асуудлыг үе үеийн удирдлагууд танилцуулж, тайлагнаснаараа онцлог байлаа гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.