Мөнгө дуудагч Б.Сарандаваа ерөнхийлөгчид өрсөлдөнө гэв үү

Хаврын хавсаргатай зэрэгцээд зарим хүний хий хуй хөдөлж байх шиг. Мөнгө дууддаг шидтэн Б.Сарандаваа Монгол Улсын Ерөнхийлөгчийн сонгуульд бэлдэж байгаа тухай яриа хуурай өвсний түймэр шиг тархах янзтай. Монгол аура” төвийн захирал Б.Сарандаваа гэх мөнгөтэй ярьдаг, далласан газар нь мөнгө эргэлддэг хүнийг ерөнхийлөгч болгочихвол монголчууд хүүе хаая гэхийн зуур өр зээлнээсээ салаад цэнгэлийн манлайд хүрэх ч юм шиг.

Улс даяар эдийн засгийн хямрал нүүрлэж,тоотой хэдэн баячуудаас бусад нь амьдрах гэж элэг дөрвөөрөө мөлхөж байхад мөнгө дууддаг хүн хэрэг болно гэж ухуулан сурталчлах багийнхан ч ажлаа хийгээд эхэлсэн бололтой. Б.Сарандаваа жил бүрийн сар шинийн баяр өнгөрөв үү, үгүй юу UB паласын том танхимд өөрийнхөө шүтэн бишрэгч сүсэгтэн олноо цуглуулан мөнгөний их даллага хийдэг. Энэ нь ч бараг уламжлал болчихсон зүйл. Гэхдээ яг хэдэн хүний халаас түнтийв,хичнээн хэмжээний мөнгөтэй болов гэдэг нууцын зэрэглэлтэй. “Алтан унжлагат” хэмээх гал тахиа жилийн мөнгө дуудах даллага мөн ч сүртэй болсон гэнэ билээ.

Том том түрийвчээр мөнгө даллагчид яг тэр хөөрлөөрөө Б.Сарандаваагаа ерөнхийлөгч болгочихвол яана вэ, таминь. Эрхбиш монголчуудын буян заяа мэднээ. Хөөрхий дөө, түрийвчээ сүртэй даллавал мөнгийг баруун солгойгүй цацаж амьдарна гэж мөрөөдсөн ядуу ард түмний зовлон гэж. Шинжлэх ухааны доктор хэмээн өөрийгөө өргөмжлөгч Б.Сарандаваа шинжлэх ухаанч биш аргаар амьдраад болоод байгаа юм чинь ерөнхийлөгчийн сонгуульд өрсөлдөж яагаад болохгүй гэж бодож явдаг байх нь. Уг нь мөнгийг тархиа ажиллуулж, гараа хөдөлгөж, хөлсөө урсгаж байж л олдог учиртай.

Гэтэл Б.Сарандаваагийн онолоор бол түрийвчээ дээш нь бүр дээш нь өргөөд чанга чанга хурайлаад дуудаад байвал тэнгэрээс мөнгө өөрөө л буугаад ирнэ ч гэх шиг. Ингэж лекцэлдэг хүн Монгол Улсыг түрийвчээрээ даллаад хөгжүүлнэ гээд зүтгээд байвал юу болох бол. Ер нь шинжлэх ухааны докторууд мөнгө даллачихдаг юм бол хямралаас аль эрт гарах байсан биш үү,Монгол Улсын эдийн засаг ингэтлээ хямрах байв уу. Б.Сарандавааг дагавал “сарны гэрэл” гэж шүтдэг, түрийвчээрээ даллавал мөнгө хуйлраад ирнэ гэж итгэдэг хүн Монголд хэдэн мянгаараа байна. Түүнийг л ерөнхийлөгч болгож балрав даа,Сарандаваагийн шавь нар аа.

Н.Намуун