Монгол Улсын зарим иргэн хууль эрхзүйн мэдлэггүй, амар хялбар аргаар мөнгө олох гэсэн хүсэлдээ хөтлөгдөн БНХАУ-аас хар тамхи, мансууруулах бодисыг улсын хилээр нэвтрүүлэхээр завдсан, тээвэрлэсэн гэмт хэрэгт холбогдоод байна. Он гарсаар эхний таван сарын байдлаар 19-26 насны зургаан иргэн энэ төрлийн хэрэгт холбогдсон. Нэг нь 15 жилийн хорих ял авч, бусдынх нь мөрдөн байцаалт үргэлжилж байна. Өнгөрсөн онд гэхэд 37 иргэн холбогдон шалгагдсанаас 19-25 насны 14, 26-35 насны 18, 36-аас дээш насны таван иргэн байна.

Тиймээс эцэг эхчүүд үр хүүхдээ БНХАУ-д зорчих үед гэмт хэргийн хохирогч болохоос урьдчилан сэргийлэх, ялангуяа санаатайгаар хар тамхи мансууруулах бодис улсын хилээр хууль бусаар нэвтрүүлэх, тээвэрлэх, зарж борлуулах, олж авах, хадгалах гэмт хэрэг үйлдэхээс сэргийлэх хэрэгтэйг цагдаагийн байгууллагаас анхаарууллаа.

“АПУ” ХК нь ХУД-ийн Засаг даргатай “Хамтран ажиллах санамж бичиг” байгуулсны дүнд жил бүр Туул голыг цэвэрлэх үйл ажиллагааг амжилттай зохион байгуулдаг билээ.

2016 оны 05-р сарын 20-ны өдөр АПУ ХК нь 300 гаруй хүний бүрэлдэхүүнтэйгээр Зайсангийн гүүрнээс Яармагийн гүүр хүртэлх 2.8 км газарт Туул голын ай сав газрыг цэвэрлэлээ.

Тус цэвэрлэгээгээр гарсан 9,05 тонн хог хаягдлыг 8 рейсээр ачиж тээвэрлэн цэвэрлэгээний ажилд ХУД-ийн ТҮТ ОНӨААТҮГ хамтран ажиллалаа.

Нийгмийн хариуцлагаа ухамсарлан байгаль орчноо хамгаалах үйлсэд нэгдсэн АПУ ХК-н хамт олонд талархсанаа илэрхийлье.

Хан-Уул дүүргийн Тохижилт Үйлчилгээний Төв ОНӨААТҮГ

Латин Америкийн зарим оронд тархаад байгаа Зика вирусийн халдвар авсан нь тогтоогдсон дөрөв дэх тохиолдол гарсаныг ОХУ-ын Мэргэжлийн хяналтын Улсын эрүүл ахуйн ерөнхий эмч Анна Попова нотолсон гэж INTERFAX.RU мэдээллээ.

“Дөрөв дэх тохиолдол баталгаажлаа. Энэ удаагийн халдвар авсан иргэн Доминикан улсаас ирсэн” Анна Попова сэтгүүлчдэд ярьсан байна.

Халдвар авсан эрэгтэй Доминикан улсад амраад иржээ. ОХУ-ын хилээр орж ирсэнээс хойш дөрөв хоногийн дараа өвчтөн эмнэлэгт хандсан байна. Тэр болтол өвчтөнд ямар нэг шинж тэмдэг мэдэгдээгүй аж.”Тиймээс халдвар авах магадлалтай улс оронд байсан бүх хүн өөрийн эрүүл мэндэд онцгой анхаарал хандуулж, анзаарч байхыг хүсч байна” гэж ерөнхий эмч зөвлөжээ.

АНУ-ын Өмнөд Каролина мужийн захирагч Никки Хали үр хөндөлт хийхийг хориглосон хуулийн төсөлд гарын үсэг зурсан талаар “www.telegraph.co.uk” мэдээллээ.

Никки “Хойч үеэ хамгаалах арга” гэж хэлжээ. Уг хууль 20 долоо хоногийн дараа хүчин төгөлдөр хэрэгжиж эхлэх гэнэ. АНУ-ын 13 мужид үр хөндөлт хийхийг хуулиараа хориглосон билээ.Өмнөд Каролинагийн эмч нар зөвшөөрөлгүйгээр үр хөндөлт хийсэн тохиолдолд таван жил хүртэлх хорих ял авч, 10 мянган ам.доллароор торгуулахыг Никки сануулжээ. Мөн тусгай албаны ажилчид мужид үйл ажиллагаагаа явуулж буй эмэгтэйчүүдийн эмнэлэгт шалгалт явуулахаар болсон байна.

Өмнөд Каролина мужийн Анагаах ухааны их сургуулийн захирал Чарлестон Корир “Хүчингийн хэрэг, цус холилдох, насанд хүрээгүй үедээ жирэмсэн болсон ч дээрх хууль хүчин төгөлдөр хэрэгжих болно. Энэ бол буруу. Олон мянган охин хүсээгүй жирэмсэлтийн золиос болж байна” хэмээн мэдэгджээ.

“Монгол цэргийн жавхаа-2016” уралдааны шилдгүүд энэ сарын 28-нд тодорно. Нийслэлийн Засаг даргын Тамгын газар, Батлан хамгаалах яам, Зэвсэгт хүчний жанжин штаб, Хил хамгаалах Ерөнхий газартай хамтран Улаанбаатар цэргийн хүрээнд байрлах Зэвсэгт хүчний анги болон төрийн цэргийн бусад байгууллагуудын тэргүүний тохижилттой, жагсаалч анги, байгууллага шалгаруулах энэ уралдаан дөрөв дэх жилдээ болох гэж байна.

Энэ бямба гаригт болох “Монгол цэргийн жавхаа-2016” уралдааны төгсгөлийн шатны шалгаруулалт, шагнал гардуулах ёслолын ажиллагаа 11.30 цагаас албан ёсоор эхэлнэ. Уралдааны хоёрдугаар шатанд шалгарсан анги байгууллага энэ цаг хугацаанд бэлэн жагссан байх бол 11.40 цагт Батлан хамгаалахын сайд Ц.Цолмонд ЗХЖШ-ын орлогч дарга, Улаанбаатар цэргийн хүрээний дарга, хошууч генерал Р.Сүхбат бүрэлдэхүүн бэлэн жагссан тухай илтгэл өгч, Батлан хамгаалахын сайд цэргийн алба хаагчидтай мэндчилнэ. Үүний дараа Нийслэлийн Засаг дарга Э.Бат-Үүл болон Батлан хамгаалахын сайд Ц.Цолмон нар үг хэлж, уралдааны дүнг танилцуулж, цэргийн ёслолын жагсаал, зэвсэг техникийн үзэсгэлэн болно. Харин үдэш нь Чингисийн талбайд ЦДБЭЧ-ын тоглолт, “Хурд” хамтлагийн тоглолт, ёслолын буудлага болохоор төлөвлөжээ.

Дашрамд сонирхуулахад, “Монгол цэргийн жавхаа-2016” уралдааны эцсийн шалгаруулалт, шалгарсан ангиудын үзүүлэлх тоглолт, шагнал гардуулах ёслолын ажиллагаа, үдшийн цэнгүүн болох гэж байгаатай холбогдуулан 11:00-14:00, 21:00-23:00 цаг хүртэл Чингисийн талбайн баруун талын замыг хаах юм байна. Мөн Чингисийн талбайн урд талын авто машины зогсоолыг 08:00-23:00 цаг хүртэл хааж, Амарын гудамж, Хангарьд ордны баруун тал, Улсын Драмын Эрдмийн театр, Тагнуулын ерөнхий газар, Спортын ордны урд зогсоолуудыг иргэдэд үнэ төлбөргүй ашиглуулах юм байна.

Ардын зэвсэгт хүчний ерөнхий зөвлөлөөс Өмнөд Солонгосын эрх баригчдад хандан хоёр улсын цэргийн асуудлаар дипломат хэлэлцээр хийхийг энэ сарын 24-нд уриалжээ. БНАСАУ-ын Цахилгаан мэдээний төв агентлагийн мэдээлснээр, Пхеньяны саналыг Өмнөд Солонгосын эрх баригчид хүлээн зөвшөөрөөгүй байна. Эх сурвалжид дурдсанаар хоёр тал дипломат хэлэлцээр хийх Умард Солонгосын саналд Өмнөд Солонгос хэд хэдэн удаа татгалзсан хариу өгч байжээ. Умард Солонгосын Батлан хамгаалах яамны Ардын зэвсэгт хүчний ерөнхий зөвлөлөөс өнгөрсөн мягмар гаригт Сөүлийн талд мэдэгдэл илгээж, хоёр улсын харилцааны томоохон саад болох батлан хамгаалах салбарын асуудлыг дипломат аргаар шийдвэрлэх, цэргийн зөрчил сөргөлдөөнийг намжаах хүсэлт гаргасан аж.

БНАСАУ-ын Цахилгаан мэдээний төв агентлагийн мэдээнд“Умард Солонгосын тал энэ байр сууриа бат баримтлах ба ирэх сарын эхээр БНСУ-д дахин санал хүргүүлнэ. Хоёр талын батлан хамгаалах салбарт тулгарч буй одоогийн асуудлыг шийдвэрлэхийг Пхеньян туйлаас хүсч байна” гэж тэмдэглэсэн байна. Харин Өмнөд Солонгосын хэвлэл мэдээллийн агентлагуудад дурдсанаар, БНАСАУ цөмийн зэвсгээ орхисон нөхцөлд хоёр улс Солонгосын хойгийн батлан хамгаалах салбарын талаар хэлэлцээр хийнэ гэсэн байна. БНСУ-ын эрх баригчид“Умардууд Солонгосын хойгийг энх тайван байлгахыг хүсч байгаа бол цөмийн зэвсгийн хөтөлбөрөө орхих хэрэгтэй” гэсэн байр сууриа хатуу баримтлахаа мэдэгджээ. Үүний зэрэгцээ БНСУ-ын Ерөнхийлөгч Пак Гын Хэ Умард Солонгостой нөхөрсөг харилцаатай улсын Төрийн тэргүүнүүдтэй уулзахдаа баллистик пуужин болон Умард Солонгосын цөмийн хөтөлбөрийг эсэргүүцэхийг уриалах болсон байна. Тухайлбал, энэ сарын эхээр Иранд айлчлахдаа Умард Солонгосын эсрэг авсан НҮБ-ын хориг арга хэмжээг хэрэгжүүлэхэд туслахыг хүсчээ. Мөн Кени, Уганда, Этиоп, Франц улсад энэ сарын сүүлээр хийх айлчлалынхаа хөтөлбөрт цөмийн асуудлыг багтаажээ.

Отгонтэнгэр хайрхан уул нь Хангайн нурууны ноён оргил бөгөөд түүний орчны уулсыг оролцуулсан 955км2 талбайг хамруулан 1992 оноос дархлан хамгаалж байгаа билээ. Энэ гайхалтай уулын ноён оргил нь далайн түвшнээс дээш 4008м өндөр өргөгдсөн бөгөөд түүний 3752м-ээс дээш хэсэг нь мөнх цастай байдаг.  Энэхүү уулын Отгонтэнгэр хайрхан гэж нэрлэгдэх болсон тухай нэгэн домог бий. Та бүхэндээ тэрхүү домгийг сонирхуулъя.           Домогт өгүүлснээр 1227 онд Чингис хаан Тангуд улсыг дайлаар мордох үедээ тэнгэрт хальж, тэр газраас Их хааны төрөлх нутаг руу нь зөөсөн тухай “Монголын Нууц Товчоо”-нд дурдсан байдаг. Эзэн Богд Чингис хааны шарилыг ачсан хасаг тэрэг Алтайн нурууг даван Бурхан Халдун ууланд ирэх замдаа газрын холд шарилыг муутгахгүйн тулд Отгонтэнгэр уулын мөнх цасанд хөлдөөж хадгалсан бөгөөд тэнгэрт хальсан их хааныхаа шарилыг агуулж байсан уулаа сүсэглэн хүндэтгэж “Отгонтэнгэр” гэж нэрлэсэн гэсэн байдаг. “Отгон” гэдэг үгийн утга нь хамгийн сүүлчийнх гэсэн үг. Монголчууд эртнээс бага хүүгээ отгон хөвүүн гэж нэрлэдэг учиртай. “Тэнгэр” гэдэг үг нь тэнгэрийн хүү тэнгэртээ халилаа гэсэн утгатай болно. Энэ нь Монголчууд эзэн Богд Чингис хааныг мөнх тэнгэрийн хөвүүн гэж боддог байсантай холбоотой гэнэ.

Өнөөдөр ихэнх нутгаар дулаарч, салхи шуургатай байна.

УЛААНБААТАР ХОТ: Үүлшинэ. Хур тунадас орохгүй. Салхи баруунаас секундэд 5-10 метр, өдөртөө зарим үед секундэд 12-14 метр хүрч ширүүснэ. Шөнөдөө 0 градус орчим, өдөртөө 20-22 градус дулаан байна.

БАРУУН АЙМГУУДЫН НУТГААР: Солигдмол үүлтэй. Хур тунадас орохгүй. Салхи баруун өмнөөс секундэд 5-10 метр, өдөртөө Алтайн уулсаар секундэд 12-14 метр хүрч ширүүснэ. Алтай, Хангайн уулархаг нутгаар шөнөдөө 2 градус хүйтнээс 3 градус дулаан, өдөртөө 11-16 градус, Алтайн өвөр говиор шөнөдөө 5-10 градус, өдөртөө 22-27 градус, бусад нутгаар шөнөдөө 2-7 градус, өдөртөө 19-24 градус дулаан байна.

ТӨВИЙН АЙМГУУДЫН НУТГААР: Солигдмол үүлтэй. Хур тунадас орохгүй. Салхи баруунаас секундэд 6-11 метр, өдөртөө зарим газраар секундэд 12-14 метр хүрч ширүүснэ. Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр шөнөдөө 4 градус хүйтнээс 1 градус дулаан, өдөртөө 12-17 градус, бусад нутгаар шөнөдөө 0-5 градус, өдөртөө 19-24 градус дулаан байна.

ЗҮҮН АЙМГУУДЫН НУТГААР: Солигдмол үүлтэй. Бороо орохгүй. Салхи баруунаас секундэд 5-10 метр, зарим газраар секундэд 12-14 метр хүрч шороон шуурга шуурна. Шөнөдөө 3 градус хүйтнээс 2 градус дулаан, өдөртөө 17-22 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Хур тунадас орохгүй. Салхи баруунаас секундэд 7-12 метр. Шөнөдөө 0-2 градус, өдөртөө 20-22 градус дулаан байна.

ГОВИЙН АЙМГУУДЫН НУТГААР: Солигдмол үүлтэй. Бороо орохгүй. Салхи баруунаас секундэд 5-10 метр, өдөртөө зарим газраар секундэд 12-14 метр хүрч шороон шуурга шуурна. Шөнөдөө 1-6 градус,  өдөртөө 21-26 градус дулаан байна.

Колумбын Цагдаагийн газрын удирдлага авлигатай тэмцэх зорилгоор өнгөрсөн 80 хоногийн хугацаанд цагдаагийн 1400 гаруй албан хаагчийг ажлаас нь халсан байна. Энэ тухай тус улсын хууль сахиулах байгууллагын томоохон албан тушаалтан мэдэгдлээ Генерал Хорхе Эрнандо Ньето өнгөрсөн хоёрдугаар сард 180 мянга орчим албан хаагчтай Колумбын Үндэсний цагдаагийн газрын дарга болсноос хойш өдөрт 18 орчим ажилтныг халж байгаа аж. Тэрбээр авлигатай тэмцэх зорилгоор тэднийг ажлаас нь халсан гэж мэдэгджээ. Үндэсний цагдаагийн хүчний томоохон албан тушаалтнууд биеэ үнэлэгчдийн сүлжээтэй холбогдсон талаар шуугиан дэгдээд байгаа энэ үед тус байгууллага олон нийтийн дунд нэр хүндээ сэргээхийг оролдож байгаа юм.

Хан-Уул дүүргийн Онцгой байдлын хэлтсээс дүүргийн 3 дугаар хорооны нутаг дэвсгэрт үйл ажиллагаа явуулдаг Гэгээн далай ХХК-ий ТВ5 телевизийн 2 дугаар давхарт гал түймэр гарсан сэдвээр Гал түймэр унтраах тактикийн сургуулийг амжилттай зохион байгууллаа. Сургалтаар гамшигт нэрвэгдсэн хүмүүст эмнэлгийн анхан шатны тусламж үзүүлэх, утаат орчноос аврах ажиллагаа явуулах зэрэг дадлага сургуулийг зохион байгуулсан бөгөөд тус сургуульд Онцгой байдлын хэлтсээс 20 алба хаагч, TВ5 телевизээс 50 ажилтан хамрагдсан байна.

“Эрүүл мэндийн даатгалын мэдээллийн нэгдсэн цахим сангийн дүрэм” болон “Эрүүл мэндийн даатгалын цахим картын загвар, түүнд хадгалагдах мэдээлэл, хэрэглэх журам”-ыг баталлаа. Эрүүл мэндийн даатгалын мэдээллийн цахим сан нь даатгуулагчийн үндсэн мэдээлэл, эрүүл мэндийн тусламж, үйлчилгээний мэдээлэл болон эрүүл мэндийн даатгалын сангийн орлого, зарлагын мэдээллээс бүрдэхээр дүрэмд тусгасан байна.

Цахим картын санах ой бүхий чипэнд даатгуулагчийн эрүүл мэндийн ерөнхий мэдээлэл болох цусны бүлэг, харшилдаг эм, тариа, төлсөн шимтгэлийн хэмжээ, эрүүл мэндийн байгууллагаар үйлчлүүлсэн эсэх болон даатгалын сангаас хариуцсан төлбөрийн мэдээлэл агуулагдана.

Эрүүл мэндийн даатгалын цахим картын журамд картын загвар, түүнд хадгалах мэдээлэл, картыг олгох, хүчингүй болгох, эрүүл мэндийн даатгалын харилцаанд оролцогч талууд цахим картыг үйл ажиллагаандаа хэрхэн ашиглах талаар тусгасан.

Эрүүл мэндийн даатгалын цахим карт, системийг нэвтрүүлснээр даатгалын болон эмнэлгийн байгууллага хооронд үйлчилгээний төлбөрийг богино хугацаанд шилжүүлэхэд шаардлагатай мэдээллийн сан бий болгож, даатгуулагч төлсөн шимтгэл, авсан тусламж, үйлчилгээний төлбөртөө хяналт тавих нөхцөл бүрдэнэ гэж үзжээ.

Нийслэлийн Сонгуулийн Хорооны гишүүд хуралдаж “Тусгаар тогтнол, эв нэгдэл” болон “Эх орончдын нэгдсэн эвсэл”-ээс нэр дэвшигчдийг  Нийслэлийн Иргэдийн Төлөөлөгчдийн Хурлын 2016 оны сонгуульд бүртгэхээр шийдвэрлэжээ. Энэ талаар тус хорооны Ц.Отгонбагана тэргүүтэй гишүүд мэдээлэл хийлээ.Нийслэлийн сонгуулийн хороо НИТХ-ын сонгуульд оролцох хүсэлтээ ирүүлсэн ИЗНН, МСДН-аас гадна хоёр эвслийг бүртгэхээс татгалзсан. Уг шийдвэрийг эсэргүүцэн “Нэгдсэн Монгол эвсэл”-ийн тэргүүн УИХ-ын гишүүн Г.Уянга тэргүүтэй хүмүүс Нийслэлийн  сонгуулийн хороонд шийдвэрээ эргэн харж, эвслээс нэр дэвшигчдийг бүртгэхийг хүссэн өргөдөл хүргүүлээд байсан юм. Нийслэлийн сонгуулийн хороо өргөдөл гомдлыг хүлээн авч хуульд заасан хугацаанд  шийдвэрээ өөрчилжээ

Энэ талаар НСХ-ны гишүүн Ц.Отгонбагана “Орон нутгийн хурлын сонгуульд улс төрийн намууд эвсэж орох эрхтэй эсэх, эвслээс нэр дэвшигчдийг Сонгуулийн тухай хуулийн 157 дугаар зүйлд заасны дагуу бүртгэж болох эсэх нь тодорхойгүй байгаа тул тайлбар, тодруулга авахаар УИХ-ын Төрийн байгуулалтын болон Хууль зүйн байнгын хороо, Сонгуулийн ерөнхий хороо, Улсын Дээд Шүүхэд албан бичиг явуулсан. УИХ-ын Тамгын газрын архив дахь Сонгуулийн тухай хууль хэлэлцсэн хурлын тэмдэглэлтэй танилцсан.УИХ-ын Төрийн байгуулалтын байнгын хорооноос  энэ сарын 19-ний өдөр, Сонгуулийн ерөнхий хорооны энэ сарын 20-ны өдөр албан бичгээр зөвлөмж ирүүлсэн. Улмаар Сонгуулийн тухай хуулийн 41 дүгээр зүйлийн 41.3-т орон нутгийн сонгуульд эвсэл орж болох асуудлыг нээлттэй орхисон байх тул Нийслэлийн сонгуулийн хороо хуралдаж Үндсэн хуульд нийцүүлэн иргэдийн сонгогдох эрхийг хангаж НИТХ-ын 2016 оны сонгуульд Тусгаар тогтнол, эв нэгдэл болон Эх орончдын нэгдсэн эвслээс нэр дэвшигчдийг бүртгэх шийдвэрийг энэ сарын 22-ны өдөр гаргалаа” хэмээв.

Эх орончдын нэгдсэн эвслээс нийт 5 нэр дэвшигч НСХ-нд материалаа ирүүлснээс 4-ыг нь бүртгэгдсэн байна. Тус эвслийн нэр дэвшигч С.Рэнчинпагмыг эвслээс нэр дэвшүүлсэн тогтоолын хавсралтад түүнийг нэр дэвшүүлсэн тухай мэдээлэл байхгүй байсан гэдэг үндэслэлээр НСХ-ноос хасжээ. Харин Тусгаар тогтнол эв нэгдэл эвслээс нийт 32 нэр дэвшигчийн материал ирүүлснээс 27 нэр дэвшигчийг бүртгэж 5 нэр дэвшигчийг бүртгэхээс татгалзсан байна. Тодруулбал, хуульд заасан насанд хүрээгүй 1, бичиг баримтын бүрдэл дутуу 2, баримт бичгээ ирүүлээгүй 2 нэр дэвшигч байжээ.  Улмаар нийт 37 нэр дэвшигч материалаа ирүүлснээс 31 нэр дэвшигчийг НСХ бүртгэжээ.

Түүнчлэн бие даан нэр дэвшигч 19 иргэнээс өргөдөл ирүүлжээ. Өргөдлийг авч магадлан шалгаж шийдвэрлэсэн байна. Улмаар БЗД-ийн 10-р тойрогт бие даан нэр дэвшигч У.Даваажав, БЗД-ийн 9-р тойрогт нэр дэвшигч Ө.Мөнхбат, ЧД-ийн 42-р тойрогт нэр дэвшигч С.Энхбаяр, Налайх дүүргийн 45-р тойрогт нэр дэвшигч А.Туяабаатар нарыг НИТХ-ын сонгуульд нэр дэвшигчээр бүртгэн шийдвэрлэжээ. Харин бусад нэр дэвшигчийн хувьд хуульд заасан шаардлагыг хангаагүй гэдэг үндэслэлээр бүртгэх үндэслэлгүй хэмээсэн байна.

Дээрхи шийдвэр нь Нийслэлийн Сонгуулийн Хорооны эцсийн шийдвэр гэдгийг гишүүд хэлж байна. Хэрэв гомдол гаргах тохиолдолд Захиргааны хэргийн шүүхэд хандах учиртайг хэллээ.

“Засгийн газрын 2016.05.23-ны хуралдаанаас гаргасан шийдвэр” –

Хэрэглэгч үйлчилгээ авч байгаа үүрэн телефоны оператор компаниа солих тохиолдолд ашиглаж байгаа дугаараа өөрчлөхгүйгээр үргэлжлүүлэн ашиглах боломжийг олгодог “Дугаартайгаа шилжих үйлчилгээ”-г нэвтрүүлэх зорилгоор үйлчилгээний нэгдсэн төв байгуулах, ашиглалт, үйлчилгээг нь  хэрэгжүүлэхэд Харилцаа Холбооны Зохицуулах Хорооны дүрмийг шинэчлэх шаардлагатай болсон тул уг дүрмийг шинэчлэн баталлаа.

Дугаартайгаа шилжих үйлчилгээний төвийг  одоо ажиллаж байгаа радио давтамжийн хяналт, зохицуулалтын төвийн суурь дээр өөрчлөн байгуулж, дугаартайгаа шилжих үйлчилгээ, радио долгионы хяналт, контентийн зохицуулалт, радио, телевизийн өргөн нэвтрүүлгийн хяналт, мониторингийн үйл ажиллагааг нэгтгэн зохион байгуулахаар дүрэмд тусгасан байна.

“Дугаартайгаа шилжих үйлчилгээ”-г эрхлэх нэгдсэн төвийг байгуулахад улсын төсвөөс хөрөнгө зардал гарахгүй. Харин Харилцаа Холбооны Зохицуулах Хороо өөрийн дотоод зардлаас зохицуулан ажиллахаар болжээ.

Эх сурвалж: Засгийн газрын Хэвлэл мэдээлэл, олон нийттэй харилцах алба