Засгийн газрын ээлжит хуралдаан 2024 оны есдүгээр сарын 25-нд болж дараах асуудлуудыг хэлэлцэн шийдвэрлэлээ.

“Эрдэнэс Тавантолгой”-н мэргэжлийн удирдлагыг олон улсын нээлттэй сонгон шалгаруулалтаар сонгоно
“Эрдэнэс Тавантолгой” ХК-ийн засаглалыг сайжруулах, үр ашиг, үнэ цэнийг нэмэгдүүлэхэд чиглэсэн Засгийн газрын шийдвэрийн төслийг боловсруулан хэлэлцүүлэх, мөн “Эрдэнэс Монгол” нэгдлийн хэмжээнд хэрэгжүүлж буй цогц реформын хүрээнд Нийтийн мэдээллийн ил тод байдлын тухай хуульд заасан мэдээллийг олон нийтэд нээлттэй болгох, их өгөгдөлд суурилсан мэдээллийн сан бүрдүүлж, түүнийг ашиглан оновчтой шийдвэр гаргах, компанийн удирдлага менежментийг сайжруулах чиглэлээр Ерөнхий сайд  Л.Оюун-Эрдэнэ Засгийн газрын 2024 оны есдүгээр сарын 18-ны хуралдаанаарүүрэг даалгавар өгсөн. Энэ дагуу Засгийн газрын тогтоолын төслийг өнөөдөр хэлэлцүүлэн дараах шийдвэрийг гаргалаа.
“Эрдэнэс Тавантолгой” ХК-ийн засаглалыг сайжруулах, үр ашиг, үнэ цэнийг нэмэгдүүлэх арга хэмжээг олон улсын туршлагад үндэслэн хэрэгжүүлэхийг Монгол Улсын сайд, ЗГХЭГ-ын дарга Н.Учрал, “Эрдэнэс Монгол” ХХК, “Эрдэнэс Тавантолгой” ХК-ийн Төлөөлөн удирдах зөвлөл, гүйцэтгэх удирдлагад даалгалаа.
-Тус компанийг олон улсын нээлттэй сонгон шалгаруулалтаар мэргэжлийн удирдлагын багаар удирдуулах чиглэлээр холбогдох ажлыг зохион байгуулж, үр дүнг танилцуулах,
-Мэргэжлийн удирдлагыг нээлттэй сонгон шалгаруулахад олон улсын байгууллагаас зөвлөх үйлчилгээ авах,
-“Эрдэнэс Тавантолгой” хувьцаат компанийн хувьцааны талаар авах зарим арга хэмжээний тухай ”Улсын Их Хурлын 2024 оны тогтоолд зааснаар “иргэдэд олгосон “Эрдэнэс Тавантолгой” ХК-ийн хувьцааг тус компанийн энгийн хувьцаанд бүртгэх”-ээр даалгасныг хэрэгжүүлэхтэй холбогдуулан иргэдэд санхүүгийн болон хөрөнгийн зах зээлийн талаарх мэдлэг,  боловсролыг нэмэгдүүлэхэд чиглэсэн сургалтын хөтөлбөр боловсруулан үндэсний хэмжээнд зохион байгуулахыг холбогдох албан тушаалтнуудад үүрэг болголоо.
 
Үндэсний баялгийн сангийн тухай хуулийг хэрэгжүүлэх зарим арга хэмжээний тухай Засгийн газрын тогтоолыг баталлаа
Засгийн газрын өнөөдрийн хуралдаанаар Үндэсний баялгийн сангийн тухай хуулийг хэрэгжүүлэх зарим арга хэмжээний тухай тогтоолын төслийг хэлэлцэн баталлаа.
Тус тогтоолоор,
-“Тодорхой ордыг стратегийн ач холбогдол бүхий ашигт малтмалын ордод хамааруулах тухай” Улсын Их Хурлын 2007 оны 27 дугаар тогтоолын 3 дахь заалтын хэрэгжилтийг хангах хүрээнд стратегийн ач холбогдол бүхий ашигт малтмалын ордын жагсаалтад өөрчлөлт оруулах санал боловсруулах,
-Мөн тогтоолын нэгдүгээр хавсралтад заасан стратегийн ач холбогдол бүхий ашигт малтмалын ордод хамаарч байгаа хил зааг нь тогтоогдоогүй ордуудын талбайн хил заагийг тогтоох саналыг боловсруулж, Засгийн газрын хуралдаанаар хэлэлцүүлж, шийдвэрлүүлэхийг Аж үйлдвэр, эрдэс баялгийн сайд Ц.Туваанд даалгалаа.
Үндэсний баялгийн сангийн тухай хууль, Ашигт малтмалын тухай хуулийн дагуу стратегийн ач холбогдол бүхий ашигт малтмалын орд, түүний үүсмэл ордыг ашиглаж байгаа хуулийн этгээдийн хувьцааны төрийн эзэмших хувь хэмжээг тогтоох талаар хэлэлцээ хийж, үр дүнг Засгийн газрын хуралдаанд танилцуулахыг Монгол Улсын сайд, Засгийн газрын Хэрэг эрхлэх газрын дарга Н.Учралд даалгав.
Монгол Улсын Үндсэн хууль, Үндэсний баялгийн сангийн тухай хууль, Ашигт малтмалын тухай хуульд орсон нэмэлт, өөрчлөлтийн хүрээнд стратегийн орд газрыг эргэлтэд оруулж, үр өгөөжийн дийлэнх нь ард түмэнд ногдож байх, тэдэнд тэгш, шударга хүртээх эрх зүйн зохицуулалтыг хэрэгжүүлэх шаардлага зайлшгүй үүсээд байна. Дээрх хууль тогтоомжийн хэрэгжилтийг хангах хүрээнд стратегийн ач холбогдол бүхий ашигт малтмалын ордын жагсаалтад өөрчлөлт оруулах саналыг боловсруулж, Засгийн газрын хуралдаанаар хэлэлцүүлэх нь зүйтэй гэж үзсэн байна.

Монгол Улсын зээлжих зэрэглэлийг нэмэгдүүлэх чиглэлээр төлөвлөгөө гаргаж ажиллахыг Ерөнхий сайд үүрэг болголоо
Улсын зээлжих зэрэглэлийн талаарх ерөнхий танилцуулга болон Фитч агентлаг 2024 оны Монгол Улсын Зээлжих зэрэглэлийн үнэлгээг “В+/Тогтвортой” болгон  нэмэгдүүлсэн талаар Сангийн сайд Б.Жавхлан Засгийн газрын гишүүдэд танилцууллаа. Танилцуулгатай холбогдуулан Монгол Улсын зээлжих зэрэглэлийг нэмэгдүүлэх чиглэлээр дунд хугацааны төлөвлөгөө гаргах, холбогдох ажлын хэсгийг байгуулж ажиллахыг Сангийн сайд Б.Жавхланд даалгалаа.
Сүүлийн жилүүдэд дэлхий нийтийг хамарсан Ковид-19 цар тахал, геополитикийн мөргөлдөөний улмаас үүссэн олон хүндрэлтэй нөхцөл байдлаас шалтгаалан дэлхийн 70 гаруй орны зээлжих зэрэглэл богино хугацаанд буурч, эргээд 50 гаруй орны зээлжих зэрэглэл нэмэгдсэн.
Хүнд сорилттой он жилүүдэд Засгийн газрын хэрэгжүүлсэн санхүү, төсвийн сахилга бат, өрийн удирдлагын оновчтой бодлогыг хэрэгжүүлсний үр дүнд зээлжих зэрэглэл бууруулахгүйгээр “В” зэрэглэлд тогтвортой хадгалж ирсэн, улмаар сүүлийн 10 жилд анх удаа зээлжих зэрэглэлээ сайжруулж “В+/Тогтвортой” түвшинд хүргэж чадлаа.

Товч мэдээ
·      “Монгол Улсын хөгжлийн 2025 оны төлөвлөгөө батлах тухай” Улсын Их Хурлын тогтоолын төслийг хэлэлцээд УИХ-д өргөн мэдүүлэхээр тогтов.
·      Хөгжлийн банкны үйл ажиллагаа нь холбогдох хууль тогтоомжид нийцэж байгаа эсэх талаар хяналт, шалгалт хийх үүрэг бүхий Ажлын хэсэг байгуулж, бүрэлдэхүүнийг баталлаа. Тус Ажлын хэсгийг Монгол Улсын Тэргүүн шадар сайд бөгөөд Эдийн засаг, хөгжлийн сайд Л.Гантөмөр ахална.
·      Хүсэлтийг нь үндэслэн Л.Бямбасүрэнг Эрүүл мэндийн даатгалын ерөнхий газрын даргын, С.Магнайсүрэнг Аж үйлдвэр, эрдэс баялгийн яамны Төрийн нарийн бичгийн даргын үүрэгт ажлаас нь тус тус чөлөөллөө.

Япон улсын Ното мужид энэ сарын 21-нд аадар бороо орсоны улмаас их хэмжээний үер бууж, долоон иргэн амь насаа алдаж, олон мянган иргэнийг нүүлгэн шилжүүлсэн байна.

Мөн 6000 гаруй айл, өрх тог цахилгаангүй болж, зам гүүр үерт автан, олон зуун байшин нуржээ.

Аврах ажиллагаанд дайчлагдан үүрэг гүйцэтгэж байсан зургаан алба хаагч нурангад дарагдан, ор сураггүй болсон байна.

Харин Важима хотод цагийн хугацаанд 121 мм хур тунадас орж, дээд хэмжээг тогтоосон бол Сүзү хотод мөн хугацаанд 84.5 мм хур тунадас орсон нь түүхэн дэх хамгийн дээд хэмжээг давсан тохиолдол болж бүртгэгджээ.

Эх сурвалж: ccn.com
Орчуулсан: Б.Гэрэлзаяа

Монгол Улсын Ерөнхийлөгч Ухнаагийн Хүрэлсүх НҮБ-ын Ерөнхий Ассамблейн 79 дүгээр чуулганы Ерөнхий санал шүүмжлэлд оролцох үеэрээ 2024 оны 9 дүгээр сарын 24-ний өдөр Испанийн Хаант Улсын Ерөнхий сайд Педро Санчез-ыг хүлээн авч уулзав.

Уулзалтын үеэр Ерөнхийлөгч Ухнаагийн Хүрэлсүх Монгол Улсын “гуравдагч хөрш” Европын Холбооны гишүүн, Испанийн Хаант Улстай харилцан ашигтай хамтын ажиллагааг бүхий л салбарт өргөжүүлэх хөгжүүлэх эрмэлзлээ илэрхийлэв.

Хоёр талын харилцааг эдийн засаг, худалдааны бодит агуулгаар баяжуулах, дээд түвшний айлчлал хэрэгжүүлэх замаар хамтын ажиллагааг идэвхжүүлэх боломжийн талаар талууд санал солилцов.

Ерөнхий сайд Педро Санчез Испанийн Хаант Улс, Монгол Улсын харилцаа, хамтын ажиллагааг бүхий л түвшинд өргөжүүлэн хөгжүүлэх, яриа, хэлэлцээг эрчимжүүлэх, дээд, өндөр түвшний айлчлалыг хэрэгжүүлэхийн төлөө байгаагаа илэрхийллээ.

Түүнчлэн Испанийн Хаант Улс нь Европын Холбооны гишүүн орны хувиар Европын Холбоо, Монгол Улсын харилцааг идэвхжүүлэхэд хувь нэмрээ оруулах, Европын Холбооны гишүүн орнуудтай Монгол Улсыг холбох гүүр болон ажиллахад бэлэн байгааг тэмдэглэв.

Талууд хоёр улсын НҮБ болон олон улсын байгууллагын хүрээн дэх уламжлалт хамтын ажиллагааг бэхжүүлэхээ нотоллоо.

Угаарын хий мэдрэгчийн хэвийн ажиллагааг тогтмол шалгахыг зөвлөж байна.

НҮБ-ын Ерөнхий Ассамблейн 79 дүгээр чуулганд оролцож буй Монгол Улсын Ерөнхийлөгч Ухнаагийн Хүрэлсүх 2024 оны 09 дүгээр сарын 24-ний өдөр Олон улсын улаан загалмай хороо (ОУУЗХ)-ны Ерөнхийлөгч Мирьяана Эггерийг хүлээн авч  уулзлаа.

Уулзалтын эхэнд Монгол Улсын Ерөнхийлөгч Ухнаагийн Хүрэлсүх олон улсын хүмүүнлэгийн эрх зүйн үндэс суурь болсон Женевийн конвенцын 75 жилийн ойг тохиолдуулан баяр хүргэж, дэлхий дахинаа өрнөж буй хурцадмал нөхцөл байдал, зэвсэгт мөргөлдөөн, байгалийн гамшгийн хүнд үед ОУУЗХ-ны манлайлал, шуурхай удирдлага, хамтын ажиллагаа, хүмүүнлэгийн тусламжийг бодитой, цаг алдалгүй хүргэх зорилт улам бүр чухал болж буйг онцлон хэлэв.

Уулзалтын үеэр талууд Монгол Улс, ОУУЗХ-ны хамтын ажиллагаа олон жилийн турш өргөжин бэхжиж, олон улсын хүмүүнлэгийн эрх зүйн ойлголт, ач холбогдлыг нэмэгдүүлэх, хүмүүнлэгийн тусламж үзүүлэх чиглэлээр хамтран ажиллаж ирснийг тэмдэглэлээ.

Мөн ОУУЗХ-ны хүмүүнлэгийн үйл ажиллагааг дэмжих зорилгоор Зүүн хойд Ази дахь хангамжийн агуулахыг Монгол Улсад байгуулах, хүмүүнлэгийн тусламжийн бүтээгдэхүүний багцыг нийлүүлэхэд цаашид хамтран ажиллах боломжийн талаар санал солилцов.

Монгол Улсын Ерөнхийлөгч Ухнаагийн Хүрэлсүх Улаанбаатар хотноо энэ оны 8 дугаар сарын 22-23-ны өдрүүдэд амжилттай зохион байгуулагдсан “Дэлхийн эмэгтэйчүүдийн чуулга уулзалт”-д ОУУЗХ-оос төлөөлөгч оролцсоныг тэмдэглэж, ОУУЗХ-ын Ерөнхийлөгч Мирьяана Эггерийг Монгол Улсад тааламжтай цагтаа айлчлахыг урив.

Өнөөдөр буюу есдүгээр сарын 25-нд дараах гурван байршилд зам засварлана. Тодруулбал,

• Циркийн уулзвараас Барс захын уулзвар хүртэлх авто замыг хэсэгчлэн хааж, шинэчилнэ.
  • Урд эгнээг есдүгээр сарын 25-ны 22:00 цагаас 26-ны өдрийн 22:00 цагийн хооронд хэсэгчлэн хааж, шинэчилнэ.
  • Хойд эгнээг есдүгээр сарын 26-ны 22:00 цагт хааж, 28-ны 06:00 цагт нээнэ.
• Офицеруудын ордны тойргоос “Цайз” захын уулзвар хүртэлх авто замыг хаан, засварлана.
  • Авто замын хөдөлгөөнийг есдүгээр сарын 25-ны 23:00 цагт хааж, 29-ний 06:00 цагт нээнэ.
• “Фүүд сити” орчмоос “Бритиш” сургууль хүртэлх авто замын урд эгнээг хааж, шинэчилнэ.
  • Урд эгнээг есдүгээр сарын 25-ны өдрийн 23:00 цагаас 29-ний өдрийн 06:00 цагийн хооронд хэсэгчлэн хааж, засварлана.

Зам засварын ажлын хүрээнд инженерийн шугам сүлжээний худгийн тагийг асфальт бетон хучилтын түвшинд тааруулах, хашлага солих, тэмдэг тэмдэглэгээ хийх зэрэг ажлыг гүйцэтгэнэ. Иймд иргэд, жолооч та бүхэн бусад замыг сонгон хөдөлгөөнд оролцоно уу.

НҮБ-ын Ерөнхий Ассамблейн 79 дүгээр чуулган 2024 оны 09 дүгээр сарын 24-ний Мягмар гарагт Нью-Йорк хот дахь НҮБ-ын Төв байранд эхлэв.

Монгол Улсын Ерөнхийлөгч Ухнаагийн Хүрэлсүхийг НҮБ-ын Төв байранд хүрэлцэн ирэхэд НҮБ-ын Ерөнхий нарийн бичгийн дарга Антонио Гутерреш нарын албан тушаалтнууд угтлаа.

НҮБ-ын Ерөнхий нарийн бичгийн дарга Антонио Гутерреш нээлтийн үеэр хэлсэн үгэндээ, өнөөгийн дэлхий ертөнц тогтвортой бус, тогтворгүй хөгжиж байгааг өөрчлөх шаардлагатайг онцоллоо. Мөн дэлхий даяар тулгамдаж буй нийтлэг сорилтуудыг шийдвэрлэх, даван туулах боломжтойг тэмдэглээд, дэлхий нийтийг энх тайванд уриаллаа.

НҮБ-ын Ерөнхий Ассамблейн 79 дүгээр чуулганы Ерөнхий санал шүүмжлэл “Хэнийг ч үл орхигдуулах: одоо болон ирээдүй хойч үеийнхний төлөө хамтдаа энх тайван, тогтвортой хөгжил, хүний ​​эрхэм чанарыг дээшлүүлэх нь” сэдвийн дор 09 дүгээр сарын 24-30-ны өдрүүдэд болно.

Чуулганы Ерөнхий санал шүүмжлэлд 88 улсын Төрийн тэргүүн, гурван улсын Дэд ерөнхийлөгч, 35 улсын Засгийн газрын тэргүүн, зургаан улсын Шадар сайд зэрэг дээд, өндөр түвшний төлөөлөгчид оролцож байна.

Монгол Улсын Ерөнхийлөгч Ухнаагийн Хүрэлсүх 09 дүгээр сарын 25-ны өдөр буюу Ерөнхий санал шүүмжлэлийн хоёр дахь өдөр олон улсын харилцааны тулгамдсан асуудлуудаар Монгол Улсын байр суурь, төр, засгаас хэрэгжүүлж буй гадаад бодлогын зорилт, тэргүүлэх чиглэл, нийгэм, эдийн засгийн байдал, тулгамдаж буй саад бэрхшээлийг даван туулах талаар хэрэгжүүлж буй бодлого, үйл ажиллагааг танилцуулж, үг хэлнэ.

Ерөнхий санал шүүмжлэлийн үеэр Бичил биетний тэсвэржилтийн асуудлаарх өндөр түвшний уулзалт, Цөмийн зэвсгийг бүрмөсөн устгах олон улсын өдрийг тохиолдуулан зохион байгуулах өндөр түвшний уулзалт, Хөгжиж буй орнуудын 77-гийн бүлгийн Сайд нарын уулзалт, Эвсэлд үл нэгдэх хөдөлгөөний Сайд нарын уулзалт, Далайд гарцгүй хөгжиж буй орнуудын Сайд нарын уулзалт зэрэг өндөр, дээд түвшний хурал, арга хэмжээг зохион байгуулах юм.

НҮБ-ын Ерөнхий Ассамблейн 79 дүгээр чуулганы Ерөнхий санал шүүмжлэлийн өмнө 09 дүгээр сарын 22-23-ны өдрүүдэд “Ирээдүйн асуудлаарх дээд түвшний уулзалт” амжилттай болж өндөрлөсөн.

Малчид, хадланчид, тариаланчдад зориулсан мэдээ:

  Ойрын 2 хоногт Алтайн салбар уулсаар салхитай, ихэнх нутгаар дулаан байна.

            2024 оны 09-р сарын 24-ний 20 цагаас 09-р сарын 25-ны 20 цаг хүртэлх

цаг агаарын урьдчилсан мэдээ:

Хур тунадас: Шөнөдөө нийт нутгаар багавтар үүлтэй, хур тунадас орохгүй. Өдөртөө нутгийн баруун хагаст үүлшиж, Увс нуурын хотгор, Хөвсгөлийн уулархаг нутаг, Тэс голын хөндийгөөр хур тунадас орно. Бусад нутгаар хур тунадас орохгүй.

Салхи: Нутгийн зүүн хэсгээр баруун хойноос, бусад нутгаар баруун өмнөөс секундэд 6-11 метр, Алтайн салбар уулсаар секундэд 14-16 метр хүрч ширүүснэ.

Агаарын температур: Шөнөдөө Дархадын хотгор, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Эг, Үүр, Туул, Тэрэлж, Хэрлэн, Онон голын хөндийгөөр -4…+1 градус, Их нууруудын хотгор, говийн бүс нутгийн өмнөд хэсгээр +7…+12 градус, бусад нутгаар +1…+6 градус, өдөртөө Дархадын хотгор, Хангай, Хөвсгөлийн уулархаг нутаг, Завхан голын эх, Хүрэнбэлчир орчмоор +9…+14 градус, Их нууруудын хотгор, Хангайн нурууны өвөр бэл, говийн бүс нутгийн баруун хэсэг, Орхон, Сэлэнгэ, Хараа, Ерөө голын хөндийгөөр +21…+26 градус, бусад нутгаар +15…+20 градус дулаан байна.

УЛААНБААТАР ХОТ ОРЧМООР: Шөнөдөө цэлмэг, өдөртөө багавтар үүлтэй. Бороо орохгүй. Салхи баруун өмнөөс секундэд 5-10 метр. Шөнөдөө Яармаг-Сонгины орчмоор 0…-2 градус хүйтэн, бусад хэсгээр +3…+5 градус, өдөртөө +18…+20 градус дулаан байна.

БАГАНУУР ОРЧМООР: Шөнөдөө цэлмэг, өдөртөө багавтар үүлтэй. Бороо орохгүй. Салхи баруун өмнөөс секундэд 7-12 метр. Шөнөдөө 0…-2 градус хүйтэн, өдөртөө +17…+19 градус дулаан байна.

ТЭРЭЛЖ ОРЧМООР: Шөнөдөө цэлмэг, өдөртөө багавтар үүлтэй. Бороо орохгүй. Салхи баруун өмнөөс секундэд 5-10 метр. Шөнөдөө -2…-4 градус, өдөртөө +16…+18 градус дулаан байна.

Энэ долоо хоногт дараах авто замуудын хөдөлгөөнийг хааж, шинэчилнэ. Ингэснээр нийт 11,4 км авто замыг шинэчлэх юм.

Есдүгээр сарын 24-ний өдөр

1. “Нийслэл хүрээ” өргөн чөлөөний авто замын хэсэгчилсэн засвар, шинэчлэлт (Тэмээтэй хөшөөнөөс зүүн тийш И-Март дэлгүүрийн уулзвар хүртэл)-ийн ажлыг есдүгээр сарын 24-ний 22:00 цагаас есдүгээр сарын 29-ний 06:00 цаг хүртэл зорчих хэсгийг нэг, нэг урсгалаар нь хэсэгчлэн хааж, асфальтбетон хучилтын ажлыг гүйцэтгэнэ. Шинэчлэх зам 1,6 км.
2. Чингэлтэйн өргөн чөлөөний авто замын хэсэгчилсэн засвар, шинэчлэлт (Долоон буудлын эцсээс Дамбын пост)-ийн ажлыг “Ди вай кэй би” ХХК есдүгээр сарын 24-ний өдрийн 23:00 цагаас есдүгээр сарын 27-ны өдрийн 06:00 цаг хүртэл хааж, асфальтбетон хучилтын ажлыг гүйцэтгэнэ.

Есдүгээр сарын 25-ны өдөр

1. Дандарбаатарын гудамжны авто замын засвар, шинэчлэлт (Офицеруудын ордны тойргоос Цайз захын уулзвар хүртэл)-ийн ажлыг есдүгээр сарын 25-ны өдрийн  23:00 цагаас есдүгээр сарын 27-ны өдрийн 06:00 цаг хүртэл хааж, асфальтбетон хучилт хийнэ.
2. Нарны замын хэсэгчилсэн засвар, шинэчлэлт (Циркийн уулзвараас Нарны гүүр хүртэл)-ийн ажлыг есдүгээр сарын 25-ны өдрийн 22:00 цагаас есдүгээр сарын 28-ны өдрийн 06:00 цаг хүртэл хааж, асфальтбетон хучилт хийнэ.
3. Наадамчдын авто замын хэсэгчилсэн засвар, шинэчлэлт (Фүүд ситигээс Бритиш сургуулийн автобусны буудал)-ийн ажлыг есдүгээр сарын 25-ны өдрийн 23:00 цагаас есдүгээр сарын 29-ний өдрийн 06:00 цаг хүртэл нэг урсгалыг хааж, асфальтбетон хучилт хийнэ.

Есдүгээр сарын 27-ны өдөр

1. Чингисийн өргөн чөлөө гудамжны авто замын хэсэгчилсэн засвар шинэчлэлт (Энхтайваны гүүрнээс тэмээтэй хөшөө хүртэл)-ийн ажлыг есдүгээр сарын 27-ны өдрийн 22:00 цагаас есдүгээр сарын 30-ны өдрийн 06:00 цаг хүртэл хааж, замыг шинэчилнэ.
2. Архивчдын гудамжны авто замын засвар, шинэчлэлт (Нисэхийн тойргоос- Нисэхийн хурдны зам хүртэлх хойноос урагш чиглэлийн баруун талын авто замын засвар, шинэчлэлтийн ажил )-ийн ажлыг есдүгээр сарын 27-ны өдрийн 22:00 цагаас есдүгээр сарын 30-ны өдрийн 06:00 цаг хүртэл баруун талын урсгалыг хааж, замыг шинэчилнэ.
3. Хувьсгалчдын гудамжны авто замын засвар, шинэчлэлт (7 дугаар хорооны уулзвараас Тасганы овооны уулзвар хүртэл )-ийн ажлыг есдүгээр сарын 27-ны өдрийн 23:00 цагаас есдүгээр сарын 30-ны өдрийн 06:00 цаг хүртэл хааж, асфальтбетон хучилт хийнэ.

Есдүгээр сарын 28-ны өдөр

1. Богд уулын арын авто замын хэсэгчилсэн засвар, шинэчлэлт (Баянзүрхийн хуучин гүүрнээс Налайхын авто зам хүртэл)-ийн ажлыг есдүгээр сарын 28-ны өдрийн 06:00 цагаас есдүгээр сарын 29-ний өдрийн 06:00 цаг хүртэл хааж, асфальтбетон хучилт хйинэ.

Есдүгээр сарын 29-ний өдөр

1. Хүннүгийн гудамжны авто замын засвар, шинэчлэлт (Хоум плазагийн уулзвараас Дүнжингарав худалдааны төвийн уулзвар хүртэл)-ийн ажлыг есдүгээр сарын 29-ний өдрийн 22:00 цагаас аравдугаар сарын 2-ны өдрийн 06:00 цаг хүртэл хааж, шинэчилнэ.

Есдүгээр сарын 30-ны өдөр

1. Богд уулын арын авто замын хэсэгчилсэн засвар, шинэчлэлт (Налайхын авто замаас Скай ресортын уулзвар хүртэл)-ийн ажлыг есдүгээр сарын 29-ний өдрийн 06:00 цагаас есдүгээр сарын 30-ны өдрийн 06:00 цаг хүртэл хааж, шинэчилнэ.

Монгол Улсын Их Хурлын тухай хуульд Улсын Их Хурлын дарга бүрэн эрхээ хэрэгжүүлэхэд нь зөвлөгөө өгөх, туслалцаа үзүүлэх чиг үүрэг бүхий ажлын албатай байна хэмээн заасан.

Энэхүү ажлын албанд Хууль зүйн бодлогын орон тооны болон орон тооны бус долоон зөвлөх ажиллаж байна. Хууль зүйн бодлогын зөвлөхүүдийг Улсын Их Хурлын гишүүн асан Ц.Мөнх-Оргил ахалж буй бөгөөд Н.Отгончимэг, Т.Алтангэрэл нарын туршлагатай хуульчид ажиллаж байна.

Монгол Улсын Их Хурлын даргын зөвлөхүүдийн талаарх мэдээллийг хүргэж байна.

МОНГОЛ УЛСЫН ИХ ХУРЛЫН ДАРГЫН АХЛАХ ЗӨВЛӨХ ЦЭНДИЙН МӨНХ-ОРГИЛ

ТӨГССӨН СУРГУУЛЬ, МЭРГЭЖИЛ

1982 онд Нийслэлийн 23 дугаар дунд сургууль

1988 онд ЗХУ, Москва хотын Олон улсын харилцааны дээд сургууль, олон улсын хуульч

АНУ, Харвардын их сургууль, хуулийн магистр

АЖИЛЛАСАН БАЙДАЛ

1988-1991 онд Гадаад явдлын яам, олон улсын байгууллагын хэлтэс, дипломат атташе

1991-1995 онд Монгол Улсаас НҮБ-ын дэргэд суух Байнгын төлөөлөгчийн газар, Дипломат гуравдугаар Нарийн бичгийн дарга

1996-1997 онд АНУ-ын Вашингтон Ди Си, хуулийн фирмд хуульч

1997-2000 онд “Мөнх-Оргил идэш Линч” ХХК хуулийн зөвлөх, компанийн гүйцэтгэх захирал

2000-2004 онд Хууль зүй, дотоод хэргийн дэд сайд

2004-2008 онд Монгол Улсын Их Хурлын гишүүн

2004-2006 онд Засгийн газрын гишүүн, Гадаад хэргийн сайд

2006-2007 онд Улсын Их Хурлын Хууль зүйн байнгын хорооны дарга

2007-2008 онд Засгийн газрын гишүүн, Хууль зүй, дотоод хэргийн сайд

2012-2013 онд МАН-ын Нарийн бичгийн дарга

2016-2020 онд Монгол Улсын Их Хурлын гишүүн

2016-2017 онд Монгол Улсын Засгийн газрын гишүүн, Гадаад харилцааны сайд

2020-2024 онд Монгол Улсын Их Хурлын гишүүн

ШАГНАЛ

Алтан гадас одон

Хөдөлмөрийн гавьяаны улаан тугийн одон

ГАДААД ХЭЛ

Англи, орос, франц

МОНГОЛ УЛСЫН ИХ ХУРЛЫН ДАРГЫН ЗӨВЛӨХ НАРАНЧУЛУУНЫ ОТГОНЧИМЭГ

ТӨГССӨН СУРГУУЛЬ, МЭРГЭЖИЛ

1994 онд Сэлэнгэ аймгийн Сайхан сум, Хөтөлийн 10 жилийн сургууль

1998 онд МУИС-ийн Хууль зүйн сургууль, эрх зүйч

1999 онд МУИС-ийн Хууль зүйн сургууль, магистр

2001 онд ОХУ-ын Уралын их сургууль, мэргэжил дээшлүүлэх курс

2007 онд ИБУИНХУ-ын Grafton College of Management Sciences, мэргэжил дээшлүүлэх курс

2012 онд ИБУИНХУ-ын King’s College London, хууль зүйн магистр

АЖИЛЛАСАН БАЙДАЛ

1998-2003 онд “Халх журам” хууль зүйн дээд сургууль, “Сүлд” коллеж, багш

2003-2005 онд Хууль зүйн үндэсний хүрээлэн, эрдэм шинжилгээний ажилтан

2005-2012 онд “Сүри Менежмент” ХХК, “ГКЭ” ХХК-ийн хуулийн асуудал эрхэлсэн захирал

2013-2015 онд УИХ-ын Тамгын газар, Нэгдүгээр орлогч (Хууль зүйн үйлчилгээ хариуцсан Нарийн бичгийн дарга)

2016 онд УИХ-ын Тамгын газар, “Иргэдийн оролцоотой хууль тогтоох ажиллагааг дэмжих нь” төслийн зохицуулагч

2017, 2019 онд Сангийн яам, “Чадавхыг бэхжүүлэх техникийн туслалцаа үзүүлэх” төслийн зөвлөх, “Эрүүл мэндийн санхүүжилтийг сайжруулах” төслийн зөвлөх

2020-2021 онд Улсын дээд шүүхийн Тамгын газар, Захиргааны хэргийн шүүн таслах ажиллагаа хариуцсан зөвлөх

2021 онд Улсын дээд шүүхийн дэргэдэх Шүүхийн сургалт, судалгаа, мэдээллийн хүрээлэнгийн захирал

2021-2024 онд Шүүхийн ерөнхий зөвлөлийн гишүүн

МОНГОЛ УЛСЫН ИХ ХУРЛЫН ДАРГЫН ЗӨВЛӨХ ТАЙВАНХҮҮГИЙН АЛТАНГЭРЭЛ

ТӨГССӨН СУРГУУЛЬ, МЭРГЭЖИЛ

1998 онд Хүмүүнлэгийн ухаан их сургууль

ХБНГУ-ын Бонны их сургууль болон Ханноверийн их сургууль Их Британийн Дюрэмын их сургуулийн хамтарсан хөтөлбөр

МУИС-ийн Хууль зүйн сургууль, сэтгүүлч, хуульч, хууль зүйн ухааны доктор, олон улсын арбитрч.

АЖИЛЛАСАН БАЙДАЛ

Вашингтон дахь Хөрөнгө оруулалтын маргаан шийдвэрлэх олон улсын төв, БНСУ-ын Арилжааны Арбитрын Зөвлөлийн болон Монголын олон улсын арбитрын арбитрч, олон улсын арбитрч, Монгол Улсын Засгийн газрыг төлөөлөн хэд хэдэн томоохон олон улсын хөрөнгө оруулалтын маргаанд оролцсон туршлагатай. Улс төр, нийгэм, хууль эрх зүй, яруу найраг, уран зохиолын сэдвээр хэд хэдэн ном, өгүүлэл, нийтлэл бичсэн тэрбээр “Боннын Алтангэрэл” хэмээх нэрээрээ олны танил болсон.

“ЛЕГИС” хууль зүйн сэтгүүлийг үүсгэн байгуулагч, эрхлэгч

2005-2007 онд Хууль зүй, дотоод хэргийн яам, Гадаад хамтын ажиллагааны хэлтсийн дарга

2007-2012 онд тус яамны Бодлогын хэрэгжилтийг зохицуулах газрын дарга

2013-2018 онд “Монгол Улс дахь шүүхийн чадавхыг бэхжүүлэх” төслийн хүрээнд Азийн хөгжлийн банк, Европын сэргээн босголтын банк, Олон улсын эрх зүйн хөгжлийн байгууллагад ахлах зөвлөх

“Оюуны Инноваци” ТББ-ын болон хуулийн технологийн компани болон “Легалдата” ХХК-ийн ТУЗ-ийн дарга

ГАДААД ХЭЛ

Англи, герман, орос

МОНГОЛ УЛСЫН ИХ ХУРЛЫН ДАРГЫН ЗӨВЛӨХ ДАШНЯМЫН ЗОЛЖАРГАЛ

ТӨГССӨН СУРГУУЛЬ, МЭРГЭЖИЛ

2001 онд МУИС-ийн Хууль зүйн сургууль, Олон улсын эрх зүйч

2004 онд АНУ-ын Оклахома хотын их сургууль, бизнесийн удирдлагын магистр

2018 онд АНУ-ын Харвардын хуулийн сургууль, хууль зүйн магистр

АЖИЛЛАСАН БАЙДАЛ

Монгол Улсын арилжааны банкнаас ажлын гараагаа эхэлж, НҮБ-ын Уур амьсгалын ногоон санд ахлах хуульчаар ажиллаж байсан. Тэрбээр одоо өмгөөллийн “Дашням Партнерс” ХХК (хуучнаар Ди Би энд Жи Ти Эс ХХК)-ийн гүйцэтгэх захирлаар ажиллаж байна. Д.Золжаргал нь санхүү, банк, эрчим хүч, уул уурхайн салбарын хөрөнгө оруулалт, бизнесийн эрхзүйгээр мэргэшсэн, туршлагатай хуульч юм.

МОНГОЛ УЛСЫН ИХ ХУРЛЫН ДАРГЫН ЗӨВЛӨХ БОДЬХҮҮ БАТЗАЯА

ТӨГССӨН СУРГУУЛЬ, МЭРГЭЖИЛ

1995 онд МУИС-ийн дэргэдэх Төрөлжсөн тусгай сургалттай сургууль

2001 онд Румын Улсын Вест их сургууль, эрх зүйч

2003 онд МУИС-ийн Хууль зүйн сургууль, магистр

АЖИЛЛАСАН БАЙДАЛ

2001- 2003 онд Brand Farrar Buxbaum LLP, хуульч

2003- 2004 онд “Монгол Өмгөөлөгч” ХХК-ийн үүсгэн байгуулагч, захирал

2004-2024 онд “Ананд Адвокатс” хуулийн фирмийн үүсгэн байгуулагч, партнер

2004-2024 онд өмгөөлөгч

2019-2024 онд Монголын Хуульчдын Холбооны Өмгөөллийн нөхөрлөлийн хөгжлийг дэмжих хорооны тэргүүн

2023-2024 онд Монголын Өмгөөлөгчдийн Холбооны Удирдах зөвлөлийн гишүүн

МОНГОЛ УЛСЫН ИХ ХУРЛЫН ДАРГЫН ЗӨВЛӨХ ЧИМЭДДОРЖИЙН УРАНГОО

ТӨГССӨН СУРГУУЛЬ, МЭРГЭЖИЛ

2010 онд БНСУ-ын Cөүлийн их сургууль, эрх зүйч

2019 онд АНУ-ын Жорж Вашингтоны их сургууль, олон улсын эрх зүй, магистр

АЖИЛЛАСАН БАЙДАЛ

2010-2012 онд БНСУ-ын “Ким Ж” хуулийн фирмд эрх зүйч

2013-2015 онд Үндэсний Аюулгүй байдлын зөвлөлийн Ажлын албаны шинжээч

2015-2017 онд “Дике” ХХК-ийн гүйцэтгэх захирал

2019-2023 онд АНУ-ын “Сисан” хуулийн фирмд эрх зүйч

ГАДААД ХЭЛ

Англи, солонгос

МОНГОЛ УЛСЫН ИХ ХУРЛЫН ДАРГЫН ЗӨВЛӨХ НЯМДОРЖИЙН БУЛГАНТАМИР

ТӨГССӨН СУРГУУЛЬ, МЭРГЭЖИЛ

2016 онд Нийслэлийн 52 дугаар дунд сургууль

2022 онд Отгонтэнгэр их сургуулийн Хууль зүйн сургууль, эрх зүйч, магистр

2022 онд АНУ-ын Harvard Kennedy School төрийн бодлого, нийгэм, эдийн засаг, гадаад бодлогын сертификат

АЖИЛЛАСАН БАЙДАЛ

2020-2022 онд Отгонтэнгэр их сургуулийн Хууль зүйн сургуулийн багш

2023-2024 онд “Шивээ-Овоо” ХК-ийн ТУЗ-ийн Нарийн бичгийн дарга

2023 онд Монголын Залуучуудын Холбооны Нарийн бичгийн дарга

2023 онд “НҮБ”-ын Нийгэмлэгийн Удирдах зөвлөлийн гишүүн

2024 онд “Эрдэнэс үйлдвэрлэл, технологийн парк” ХХК-ийн Олон нийттэй харилцах албаны дарга.

Улаанбаатар хот 2013-2023 он хүртэл гэр хорооллын газрыг дахин төлөвлөж, барилгажуулах төслийг хэрэгжүүлсэн. Үүний улмаас 640 өрх хохирсон байдаг. Дээрх хохирсон иргэдийн асуудлыг шийдвэрлэхийг хотын дарга Х.Нямбаатар үүрэг болгосон. Энэ хүрээнд өнгөрсөн дөрөвдүгээр сард 24 өрхийн асуудлыг шийдвэрлэж, орон сууцны түлхүүрийг хүлээлгэж өгсөн юм. Тэгвэл өнөөдөр НЗД-ын орлогч Л.Хосбаяр 26 өрхийн асуудлыг шийдвэрлэхээр хүлээн авч уулзаж, энэ онд багтааж хохирлыг барагдуулах, орон сууц эзэмшүүлэх эрхийг олгох талаарх шийдвэрийг танилцууллаа. Тодруулбал, Хан-Уул дүүргийн 8 дугаар хороо, Яармаг орчимд 11.5 болон 46.1 га газарт дахин төлөвлөлт хийхээр 4-9 жилийн өмнө газрыг чөлөөлсөн ч төсөл хэрэгжээгүй. Үүний улмаас 26 айл хохирсон байна.

Энэ үеэр Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр “Хан-Уул дүүргийн 8 дугаар хорооны 26 айл өрх сүүлийн 4-9 жилийн хугацаанд түрээсийн байр, хажуу өрөөнд амьдарч байсан. Үүнийг шийдвэрлэхээр хотын дарга Х.Нямбаатар Хан-Уул дүүргийн 8 дугаар хороо, Яармаг орчим “А”, “Б” хэсэгчилсэн талбайд төсөл хэрэгжүүлэх, гэрээ байгуулах эрх, төсөлд шаардагдах түр суурьшуулах зардал, холбогдох хөрөнгийн эх үүсвэр, төсөв тооцоог гарган ажиллахыг НОСК-д даалгасан. Энэ хүрээнд өнөөдөр газраа чөлөөлж, хохирсон хоёр байршлын 26 нэгж талбарын айл өрхийн асуудлыг шийдвэрлэснийг ийнхүү танилцуулж, санал солилцлоо” хэмээв.

Нийслэлийн Орон сууцны бодлогын газрын дарга Г.Ганхүү “Дээрх 26 өрх 2014 болон 2020 онд гэрээ хийж, газраа чөлөөлсөн. Тус байршилд хоёр төсөл хэрэгжих байсан ч компаниуд үйл ажиллагаагаа явуулж чадаагүйн улмаас төсөл хэрэгжих боломжгүй болж, иргэд 4-9 жилийн турш хохирсон байна. Бид удаа дараа тухайн иргэдтэй уулзаж, асуудлыг шийдвэрлэхээр ажил хэрэг болгож, өнөөдөр ийнхүү “Нийслэлийн Орон сууцны корпораци”-д шилжүүлэн, энэ онд багтааж хохирлыг барагдуулах, орон сууц эзэмшүүлэх эрхийг олгох талаар санал солилцлоо” гэсэн юм.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС