УИХ-ын гишүүд татвар нэмснийг сая мэдсэн мэт жүжиглэхээ болиоч

Шинэ оны анхны өдрөөс татвар нэмэгдсэн. Дээр доргүй цочирдов. Ард түмэн татварын дарамт дор нуруугаа бөгтийтэл зүтгэх нь тодорхой болсон. УИХ-ын хуралдаан дээр зарим гишүүн  түмнийг өрөвдөж байгаа мэт үг хэлсэн нь тийм ч сэтгэл хөдөлгөсөн дуугаралт болсонгүй. Татвар нэмэх тухай аль эрт яриад хэрэв нэмэхгүй бол Олон улсын валютын сан гэх байгууллага Монголыг минь “нэг нүдээр” харахгүй нь гээд Д.Эрдэнэбатын засгийн үед Чойжоо сайд зовлонгоо тоочоод байсан биз дээ. Харин одоо болохоор эрхэм гишүүд өчигдөр ийм шийдвэр гараад татвар нэмчихсэн юм шиг чухал царай үзүүлээд байх юм. Үнэндээ татвар 1 дүгээр сарын 1-нээс нэмэгдэнэ гээд сонин хэвлэл,сошиалаар өчнөөн шуугиад байсан даа. Гэтэл бүгд дүлий царайлаад дуугүй байсан биз дээ. Ниргэсэн хойно хашгирна гэдэг л болж байна. Ард түмнээ өрөвдөөд байгаа юм бол эрхэм гишүүд цалингаас хэд дахин илүү тусгай  хангамжаасаа татгалзаач. Манай УИХ-ын  гишүүдийн олонхи  нь хөрөнгө мөнгөтэй,чинээлэг бийлэгжүү хүмүүс. Тэдний амьдрал баян тансаг. Тэгсэн атлаа утсаар ярьсны төлбөр, машины бензин шатахуун, бичиг цаасны зардал гээд төрөөс шимэгчлэн амьдардаг. Цалин хэдийг авдгаа мэддэггүй, дансанд орсон цалингаа авдаггүй гишүүд ч олон байдаг. Тийм баян атлаа утасны төлбөрөө төрөөр төлүүлнэ гэдэг ичиж үхмээр санагдана. Манай улстөрчдөд ичих булчирхай байхгүй. Ер нь ичих булчирхайгүй болж байж улстөрч болдог юм биш үү. Албан ёсны мэдээллээр бол, УИХ-ын гишүүд сард утас, унааны мөнгө гэж 312.000 – 548.000 төгрөг авдаг гэжээ. Зарим эх сурвалжийн мэдээлснээр, 2 сард 22 төгрөгөөр утсаар ярьж,унаа унасан гишүүн цөөнгүй дуулдана. –ын гишүүдийн утасны ярианы төлбөрт төрөөс 34 тэрбум төгрөг төсөвлөдөг гэж сошиалаар мэдээлжээ. Тэгэхэд 55 тэрбумыг цуглуулах гэж ард түмний “шар мах”-тай нь хатаах хэрэг байдаг л юм байх даа. Утсаар үлгэр ярьж,оньсого таалцаж суудаггүй юм бол хэдэн зуун мянга,сая сая төгрөгөөр юу ярьдаг юм бол. Үнэгүй юманд нугасгүй болчихсон эрхмүүд утсандаа 1000 төгрөгөөр  нэгж хийчихээд түүнийгээ гамнан гамнан ярьдаг ард түмнээ “худлаа ярив” хамээн   шоолон инээлдэх үү. Тусгай хангамжаасаа татгалзаж чадахгүй байж ард түмнийг өрөвдөж байгаа мэт”матрын нулимс” мэлтэлзүүлэх хэрэггүй  шүү,эрхэм дээдэс минь. Ард түмэн тэнэг биш гэдгийг өдөр бүр санаж явцгаа.

Н.Дөл