Төгөлдөр хуурч Б.Чинбат “Хязгааргүйн цаана” тоглолтоороо ард түмэндээ бэлэг барина

Монголын ард түмний бахархалт хүмүүн, төгөлдөр хуурч, МУСТА Б.Чинбат хэдхэн сарын өмнө Солонгос Улсад элэгний хүндхэн хагалгаанд хайрт ханийнхаа хамт орж, амжилттай болж түмэн олноо баярлуулсан билээ.

Удаан хугацааны эмчилгээний дараа эх орондоо ирсэн тэрээр коронавирусийн улмаас гэр бүлийн хамт энэ өдрүүдэд тусгаарлалтад байгаа. Тэгвэл өөртэйгээ адилхан тусгаарлалтад байгаа элэг нэгт ахан дүүстээ болон монголчууддаа зориулж, 2018 оны 09 дүгээр сарын 21,22,23-нд “Corporate Convention Centre”-ийн концертын танхимд хийж байсан “Хязгааргүйн цаана” тоглолтоо өнөөдөр буюу 5 дугаар сарын 2-ны 13:20 минутад Улаанбаатар телевизээр шууд дамжуулахаар болжээ.

Түүний ээлжит гайхамшигт тоглолтонд өөрийнх нь зохиосон шинэ, шилдэг дуу, хөгжмийн бүтээлүүдээс гадна хөгжмийн найруулагчаар ажилласан олон дуунууд тоглогдсон бөгөөд Монголын сонгодог болон ардын урлагийн дуучид, бүжигчид, үндэсний язгуур урлагийн хөгжимчид, рок поп урлагийн шилдэг хамтлаг, дуучид, хөгжимчид оролцож нэгэн тансаг үдшийг үзэгчдэд бэлэглэсэн билээ.

Энэ дашрамд дэлхийн олон улсад тархаж монгол улсад бүртгэгдээд байгаа коронавирустэй улс даяараа, ард түмнээрээ тэмцэж буй энэ хүнд цаг үед өөрийн гайхамшигт уран бүтээлийн тоглолтоороо ард түмэндээ бэлэг барьж буй МУСТА Б.Чинбат танд чин сэтгэлийн талархал илэрхийлье.