“Ардын нам-Ард түмэндээ” аян Өвөрхангай аймагт үргэлжилж байна

Улс орон даяар өрнөж буй “Ардын нам-Ард түмэндээ” аяны хүрээнд Хууль зүй, дотоод хэргийн дэд сайд Д.Мөнх-Эрдэнээр ахлуулсан Монгол Ардын намын Удирдах зөвлөлийн баг энэ сарын 23-29-нд Өвөрхангай аймагт ажиллаж байна.

Монгол Улсын Засгийн газрын бодлого шийдвэр болон “Ардын нам-Ард түмэндээ” аяны зорилго чиглэлийн талаар дэлгэрэнгүй мэдээллийг намын гишүүд, иргэд, сонгогчдод танилцуулж, тэдний өмнө тулгарч буй асуудал бэрхшээлтэй газар дээр нь танилцан ажиллаж буй тус уулзалт, арга хэмжээ өчигдөр /2026.06.23/ Өвөрхангай аймгийн Төгрөг суманд боллоо.

Уулзалтыг Хууль зүй, дотоод хэргийн дэд сайд Д.Мөнх-Эрдэнэ нээж, Засгийн газраас хэрэгжүүлж буй “Чөлөөлье” аяны хүрээнд “Эрх чөлөөний дөрвөн зам, дөрвөн чөлөөлөлт” хөтөлбөрийн хэрэгжилт түүний хүрээнд төрөөс малчдын нийгмийн баталгааг хангах, ард иргэдийн амьдралын чанарыг дээшлүүлэхэд чиглэн хэрэгжүүлж буй онцлог ажлуудын талаар мэдээлэл хүргэлээ.

Ерөнхий сайд Н.Учралын дэвшүүлэн хэрэгжүүлж буй “Чөлөөлье” аяны хүрээнд нийгмийн бүхий л салбарт дарамт, саад бэрхшээл учруулж байсан давхардсан хяналт шалгалтыг болиулж, аж ахуйн нэгжүүдийг хяналт шалгалтын дарамтаас салгах, эрчим хүч, нефтийн тогтвортой, найдвартай байдлыг хангах, эрдэс баялгийн томоохон нөөцөд тулгуурласан аж үйлдвэрлэлийг хөгжүүлэх зэрэгт чиглэсэн нэн чухал төсөл хөтөлбөрүүд хэрхэн хэрэгжиж байгааг танилцуулан оролцогчдын сонирхсон асуултад хариулав.

Мөн Монгол Ардын намын даргын дэвшүүлж буй гишүүн төвтэй E4 стратеги, E-nam 3.0 платформыг Төгрөг сумын намын гишүүд, дэмжигчдэд танилцуулж санал, хүсэлтийг сонсож ажиллалаа.

Уулзалтын хүрээнд Өвөрхангай аймгийн Төгрөг сумын иргэн, өндөр настан П.Гүнгээбуу, намын гишүүн Ц.Оюунгэрэл, ахмад багш Д.Одончимэг, Их ус 2-р багийн малчин Г.Балжинням нарынд зочилж, хөдөөгийн иргэдийн өмнө тулгарч буй асуудал бэрхшээлд төрөөс авах арга хэмжээг хэрхэн ойртуулах, бодлого шийдвэрт тусгуулах, бодит амьдрал дээр хэрэгжүүлэх талаарх санал сэтгэгдлийг сонсон, УИХ-д өргөн баригдах холбогдох хууль тогтоомжуудад хэрхэн нийцүүлэх нь зүйтэй талаар санал солилцлоо.

Уулзалтад аймгийн Засаг даргын зөвлөх И.Доржсүрэн, аймгийн ИТХ-ын төлөөлөгч Д.Цэвэлсүрэн, Төгрөг сумын Их Ус 2-р багийн Засаг дарга Х.Лхагва нар оролцов.

Орон даяар өрнөж буй “Ардын нам- Ард түмэндээ” аян Өвөрхангай аймгийн Хайрхандулаан суманд үргэлжилж байна.