Хотын бүтээн байгуулалт, хүн амын өсөлт, хүмүүжил, боловсрол, ирээдүйн хөгжил, цэцэглэлтэд үнэт хувь нэмрээ оруулан буй эмэгтэйчүүдээ алдаршуулах, тэдний үйл хэргийг нийслэлийн иргэд, залуу хойч үедээ сурталчлан таниулах, төрөлх хот, эхчүүд, эмэгтэйчүүдээрээ бахархах сэтгэлгээг төлөвшүүлэхээр НЗДТГ-аас “Их хотын бүсгүйчүүд 2024” хүндэтгэлийн арга хэмжээг зохион байгууллаа.

Олон улсын эмэгтэйчүүдийн эрхийг хамгаалах өдрийг тохиолдуулан өдгөө тав дахь жилдээ болж буй энэхүү арга хэмжээний үеэр ажил үйлс, хөдөлмөр зүтгэлээрээ түүчээлэн, нийгэм, хойч үедээ үнэ цэн бүтээж буй салбар салбарын шилдэг эмэгтэйчүүдийг шалгаруулан урамшууллаа.

Тодруулбал:

• “Хүмүүнлэгийн салбарын шилдэг” номинацид Ц.Болормаа
• “Бизнесийн салбарын шилдэг” номинацид Л.Жавзмаа
• “Үйлчилгээний салбарын шилдэг ажилтан” номинацид Ө.Оюун-Эрдэнэ
• “Мөрдөстэй бүсгүй” номинацид Х.Баясгалан (Дэд Хурандаа)
• “Соёл, урлагийн салбарын шилдэг” номинацид Д.Отгонжаргал (Монгол Улсын Гавьяат Жүжигчин)
• “Эрүүл мэндийн салбарын шилдэг” номинацид Ц.Норов
• “Спортын салбарын шилдэг” номинацид Монголын 3х3 Сагсан бөмбөгийн эмэгтэй шигшээ багийн хамт олон
  • О.Хулан
  • М.Цэрэнлхам
  • Б.Ариунцэцэг
  • Ө.Индра
  • Ц.Болорцэцэг
  • Э.Нарангоо
• “Боловсролын салбарын шилдэг” номинацид Г.Мөнхзул
• “Алдарт эх” номинацид Ц.Ундрах нар тодорсон билээ.

Хүндэтгэлийн  арга хэмжээг Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч О.Номинчимэг нээн “НҮБ-аас энэ жил Олон Улсын эмэгтэйчүүдийн эрхийг хамгаалах өдрийг “Эмэгтэйчүүдэд хөрөнгө оруулж байж бид цаашид өсөлт хөгжлөө сайжруулна” уриан дор тэмдэглэж байна. Энэ ч утгаараа нийслэлийн зүгээс эмэгтэйчүүдийн эрхийг хамгаалах, эдийн засгийн чадавхыг нэмэгдүүлэхийн тулд хөдөлмөр эрхлэлтийг дэмжих, сургууль, цэцэрлэгийн цагийг хөдөлмөрийн цагтай уялдуулах бодлогыг хэрэгжүүлэх нь зүйтэй гэж үзэн, бодлогын түвшинд анхаарч ажиллаж буйг дуулгахад таатай байна” хэмээсэн юм.

Ажлын минь хамгийн гоё зүйл нь хотын иргэдийн цэвэр цэмцгэр байдлыг хангаж өгдөг явдал

“Их хотын бүсгүйчүүд 2024” арга хэмжээний үйлчилгээний салбарын шилдэг ажилтнаар шалгарсан Ө.Оюун-Эрдэнэ:

-Би 2014-2016 онд нийтлэг үйлчилгээний “Улаанбаатар нэгтгэл”-д зам талбайн үйлчлэгч,  2016 оноос одоог хүртэл “Хот тохижилтын газар” ОНӨААТҮГ-т зам талбайн үйлчлэгчээр ажиллаж байна. Ажлын минь хамгийн гоё зүйл нь хотын иргэдийн цэвэр цэмцгэр байдлыг хангаж өгдөг явдал. Гэхдээ залуустаа хандаж тамхины ишээ битгий ил задгай хаяж байгаарай, хогоо хогийн саванд хийж байгаарай гэж хэлмээр байна. Хэдий хог цэвэрлэж байгаа ч гэсэн биднийг хүндэтгэж байгаарай гэж хэлмээр байна.

Байгууллагынхаа ажилчдад зориулан гурван насны ангилал бүхий хүүхэд өнжүүлэх төвийг нээсэн

“Их хотын бүсгүйчүүд 2024” арга хэмжээний Бизнесийн салбарын шилдэг эмэгтэйгээр шалгарсан Л.Жавзмаа:

-Би “Имарт” дэлгүүрийн гүйцэтгэх захирлаар ажилладаг. Манай байгууллагын 70 гаруй хувь нь эмэгтэйчүүд. Энэхүү шагнал нь манай байгууллагын бүхий л эмэгтэйчүүдийг шагнаж байна гэж үзэж байна. Байгууллагын зүгээс ажилчдад зориулсан гурван насны ангилал бүхий хүүхэд өнжүүлэх төвийг нээж, 360 автомашины зогсоол, 3000 гаран метр квадрат талбай бүхий ногоон байгууламж, тусгай хэрэгцээт иргэд болон нярай хүүхэд хуурайлах өрөөнүүд, 1 сая ном бүхий номын сан гэх мэт үйлчилгээг хэрэглэгч үйлчлүүлэгчдэд нэг дороос хүргэн ажиллаж байна.

Сайн хүн болж хүмүүжихийн гол утга учир нь эцэг, эхийн хүмүүжил

“Их хотын бүсгүйчүүд 2024” арга хэмжээний Алдарт эх номинацид шалгарсан Ц.Ундрах:

-Би 2003, 2006, 2008, 2014 онуудад ихэр хүүхэд төрүүлэн өдгөө зургаан охин хоёр хүүтэй өнөр өтгөн айлын эзэгтэй болсон. Хүүхдүүд сайн хүн болж хүмүүжихийн гол утга учир нь эцэг, эхийн хүмүүжил гэж боддог. Би өөрөө сувилагч мэргэжилтэй болохоор олон сайхан хүүхдүүдтэй ажиллаж байсан. Тиймээс ийм сайхан хүүхдүүд надад заяажээ гэж бодож явдаг даа.

Төрсөн эгчийнхээ ачийг эх барьж авсан тэр мөч сэтгэлд хамгаас тод үлджээ

“Их хотын бүсгүйчүүд 2024” арга хэмжээний Эрүүл мэндийн салбарын шилдэг номинацид шалгарсан Ц.Норов:

-Би 32 жилийн турш эх баригч эмчээр ажиллахдаа 12,800 нярайг эх барьж, 40 гаруй нярайн эх баригч бэлдсэн байна. Төрсөн эгчийнхээ ачийг эх барьж авсан тэр мөч сэтгэлд хамгаас тод үлджээ.

Давхардсан тоогоор 7000 гаруй багш, туслах багшид сургалт явуулаад байна

“Их хотын бүсгүйчүүд 2024” арга хэмжээний Боловсролын салбарын шилдэг номинацид шалгарсан Г.Мөнхзул:

-Энэхүү шагнал нь ганцхан миний шагнал бус боловсролын салбарт гар нийлэн ажиллаж буй хүрээллийн минь хамтын шагнал юм. Би 26 жил боловсролын салбарт ажиллахдаа “Бага насны хүүхдийн хөгжмийн боловсрол”, “Бага насны хүүхэдтэй ажиллах ур чадвар”, Бага насны хүүхдийн хэл ярианы хөгжил, байгаль нийгмийн орчинтой танилцуулах арга зүй” сургалт, “Бага насны хүүхдийн хэл ярианы хөгжил” сэдэвт сургалтуудыг зохион байгуулж, давхардсан тоогоор 7000 гаруй багш, туслах багшид сургалт явуулаад байна.

Монгол Улсаа төлөөлөн дөрвөн тэмцээнд амжилттай оролцож, дэлхийн чансааны оноогоо ахиулсан

“Их хотын бүсгүйчүүд 2024” арга хэмжээний Спортын салбарын шилдэг номинацид шалгарсан Монголын Сагсан бөмбөгийн эмэгтэй шигшээ багийн хамт олон:

-Бид МСБХ-ны Үндэсний Дээд Лигийн 2023-2024 оны улиралд өөр өөр багаас тоглосон хэдий ч 2023 онд Монгол Улсаа төлөөлөн Монголын сагсан бөмбөгийн үндэсний шигшээ багт нэг хамт олон болж, NBA 3X Invitational Champion, HANGZHOU Asian Games, FIBA WOMEN’S SERIES буюу Эмэгтэйчүүдийн цуврал зэрэг дөрвөн тэмцээнд амжилттай оролцож, дэлхийн чансааны оноогоо ахиулсан билээ.

ШШГЕГ-ын эмэгтэй алба хаагчдад зориулан олон талт арга хэмжээг санаачлан зохион байгуулж байна

“Их хотын бүсгүйчүүд 2024” арга хэмжээний Мөрдөстэй бүсгүй номинацид шалгарсан дэд хурандаа Х.Баясгалан:

-Миний бие ШШГЕГ-ын эмэгтэйчүүдийн зөвлөлийн гишүүн бөгөөд Шүүхийн шийдвэр гүйцэтгэх байгууллагын эмэгтэй алба хаагчдын манлайлал, мэдлэг чадварыг дээшлүүлэх, тулгамдаж буй асуудлыг нь шийдвэрлэх чиглэлээр олон талт арга хэмжээг санаачлан зохион байгуулж ажиллахын зэрэгцээ эмэгтэй алба хаагчдын ажил албаны онцлог, идэвх, оролцоо, мэдлэг чадвар, амжилт бүтээл, авьяас, сонирхлыг сурталчлан таниулахад бодит хувь нэмэр оруулан ажилладагтаа баяртай байдаг.

2023 онд “Гэрийн тэжээвэр амьтны тухай” хуулийн төслийг батлуулсан

“Их хотын бүсгүйчүүд 2024” арга хэмжээний Хүмүүнлэг салбарын шилдэг номинацид шалгарсан “Азтай савар” ТББ-ын ТУЗ-ын гишүүн Ц.Болормаа:

-“Азтай савар” ТББ маань 2020 оноос эхлэн гэрийн тэжээвэр амьтантай хүмүүсийн хариуцлагыг нэмэгдүүлэх, гэрийн тэжээвэр амьтантай холбоотой аливаа асуудлын байгаль орчин, нийгэм, эдийн засагт нөлөөлөх сөрөг үр дагаврыг бууруулах зэрэг зорилгоор “Гэрийн тэжээвэр амьтны тухай” хуулийн төслийг санаачлан, 2023 онд батлуулсан хэмээн сэтгэгдлээ хуваалцсан юм.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Өвөлжилт, хаваржилтын нөхцөл байдал хүндэрсэнтэй хоблогдуулан малчдад туслах хандивын аянд Монгол Улсын Ерөнхий сайдын ажлын алба, ЗГХЭГ, Шадар сайдын ажлын алба, нийслэлийн авто Авто зам түгжрэлийг бууруулах Үндэсний хороо, Боомтын Сэргэлтийн Үндэсний хороо, Олимп, нийтийн биеийн тамир спортын Үндэсний хорооноос нэг өдрийн цалин болох 22 сая төгрөгийг хандивлалаа.

Мөн “”Монголын нотариатчдын танхим”-аас  4.7 сая төгрөг,  “Авто тээврийн үндэсний төвийн Авто тээвэрчдийн ахмадын хорооноос 3.170.000 төгрөгийг тус тус гардуулан өгсөн юм.

Малчдад туслах хандивын аянд 2024 оны 02 дугаар сарын 20-ны өдрөөс 03 дугаар сарын 06-ны өдрийн хооронд 45 иргэн, 109 аж ахуйн нэгж, байгууллагын 3.151.071.636.66 төгрөгийн мөнгөн хандив, 5 иргэн, 24 аж ахуйн нэгж, байгууллагын 805.148.600 төгрөгийн 71.898 ширхэг бараа, материалын хандив буюу нийт 3.956.220.236.66 төгрөгийн хандив, тусламж Улсын онцгой комисст цугласан.

 Өнөөдрийн байдлаар /2024.03.06/ 701.532.900 төгрөгийн 41.484 ширхэг бараа, материалыг 21 аймаг, нийслэлийн 2 дүүрэгт хуваарилан, өвөлжилт, хаваржилт хүндэрсэн малчдад хүргэх ажиллагаа үргэлжилж байна.

Монгол Улсын нийт хүн амын тоо 2023 оны эцсийн байдлаар 3 504 741 хүрснээс 51 хувь нь эмэгтэйчүүд байна.

Нийт эмэгтэйчүүдийн 50.7 хувь нь Улаанбаатар хотод, 49.3 хувь нь хөдөө, орон нутагт амьдарч байна.

Монгол эмэгтэйчүүдийн дундаж наслалт 76.7 бол анхны гэрлэлтийн дундаж нас 26.7 байна.

Эх сурвалж: Үндэсний Статистикийн Хороо

Малч­ид, иргэд, тээвэрчдэд зориулсан мэдээ:

07-ноос 09-нд ихэнх нутгаар өдөртөө дулаарна.

2024 оны 03-р сарын 06-ны 20 цагаас 03-р сарын 07-ны 20 цаг хүртэл

цаг агаарын урьдчилсан мэдээ:

Хур тунадас: Нутгийн зүүн хагаст солигдмол үүлтэй, бусад нутгаар багавтар үүлтэй. Шөнөдөө Дорноговийн зүүн, Сүхбаатар, Дорнодын өмнөд хэсгээр, өдөртөө Дорнодын зүүн хэсгээр ялимгүй цас орно. Бусад нутгаар цас орохгүй.

Салхи: Нутгийн баруун хагаст баруунаас, бусад нутгаар баруун хойноос секундэд 5-10 метр, өдөртөө зүүн аймгуудын нутгийн зүүн хэсгээр секундэд 12-14 метр хүрч ширүүснэ

Агаарын температур: Шөнөдөө Увс нуур болон Дархадын хотгор, Завхан голын эх, Тэс голын хөндийгөөр -31…-36 градус, Хангай, Хөвсгөл, Хэнтийн уулархаг нутаг, Идэр, Байдраг, Туул, Тэрэлж, Хэрлэн голын хөндийгөөр -25…-30 градус, Монгол-Алтайн уулархаг нутаг, Эг, Үүр, Орхон, Ерөө, Онон, Халх голын хөндийгөөр -19…-24 градус, Их нууруудын хотгор, говийн бүс нутгийн баруун өмнөд хэсгээр -9…-14 градус, бусад нутгаар -16…-21 градус, өдөртөө Увс нуурын хотгор, Тэс голын хөндийгөөр -15…-20 градус, Хөвсгөлийн уулархаг нутаг, Завхан голын эх, Хүрэнбэлчир орчим, Дарьгангын тал нутгаар -11…-16 градус, Хэнтийн уулархаг нутаг, Туул, Тэрэлж, Хэрлэн, Онон, Улз, Халх голын хөндийгөөр -5…-10 градус хүйтэн, Их нууруудын хотгор, говийн бүс нутгийн баруун өмнөд хэсгээр +1…+6 градус дулаан, бусад нутгаар -1…-6 градус хүйтэн байна.

УЛААНБААТАР ХОТ ОРЧМООР: Багавтар үүлтэй. Цас орохгүй. Салхи баруун хойноос секундэд 4-9 метр. Шөнөдөө Яармаг-Сонгины орчмоор -27…-29 градус, бусад хэсгээр -19…-21 градус, өдөртөө -4…-6 градус хүйтэн байна.

БАГАНУУР ОРЧМООР: Үүлшинэ. Цас орохгүй. Салхи баруун хойноос секундэд 5-10 метр. Шөнөдөө -27…-29 градус, өдөртөө -8…-10 градус хүйтэн байна.

ТЭРЭЛЖ ОРЧМООР: Үүлшинэ. Цас орохгүй. Салхи баруун хойноос секундэд 4-9 метр. Шөнөдөө -27…-29 градус, өдөртөө -5…-7 градус хүйтэн байна.

Засгийн газрын ээлжит хуралдаан 2023 оны гуравдугаар сарын 6-нд болж дараах асуудлуудыг хэлэлцэж, боловсролын салбартай холбоотой багц шийдвэрийг гаргалаа.

Дотоод, гадаадын суралцагчдад төрөөс санхүүгийн дэмжлэг үзүүлэх журмыг шинэчлэн баталлаа
Засгийн газрын өнөөдрийн хуралдаанаар дотоод гадаадын дээд боловсролын сургалтын байгууллагын суралцагчдад зээл, тэтгэлэг олгох, эргүүлэн төлүүлэх, буцалтгүй тусламж олгох, дэмжлэг үзүүлэх журам, Багш болон багш мэргэжлээр суралцагчдад тэтгэлэг олгох, төрийн болон орон нутгийн багш ажилтны нэг хүүхдийг тэргүүлэх, эрэлттэй мэргэжлээр суралцахад төрөөс дэмжлэг үзүүлэх, дотоод, гадаадын дээд боловсролын сургалтын байгууллагын суралцагчдад төрөөс санхүүгийн дэмжлэг үзүүлэх, “Төрийн болон орон нутгийн өмчийн цэцэрлэг, ерөнхий боловсролын сургууль, мэргэжлийн боловсролын сургууль, политехник коллежийн багш, ажилтанд мөнгөн тэтгэмж олгох” зэрэг журмууд батлагдлаа.
Журамд Монгол Улсын сум, хороо бүрээс элсэлтийн ерөнхий шалгалтаар шалгарсан болон олон улсын олимпиадад медальт байрт шалгарсан суралцагчид Монгол Улсын Ерөнхийлөгчийн тэтгэлэг, дотоодын сургуульд тэргүүлэх мэргэжлийн дэд бакалавр, бакалавр, магистр, докторын үндсэн хөтөлбөрөөр суралцагч, Монгол Улсын Засгийн газрын үйл ажиллагааны хөтөлбөрт тусгайлан заасан мэргэжлээр үндсэн хөтөлбөрт суралцагч, гадаадын дээд боловсролын сургалтын байгууллагад ахисан түвшний сургалтад суралцах төрийн албан хаагч, тэргүүлэх мэргэжлийн магистр, докторын үндсэн хөтөлбөрөөр суралцагч, техникийн боловсролын сургалтын байгууллагын олон улсын хөтөлбөрийг дотоодын сургуульд төгсөж, тухайн мэргэжлийн чиглэлээрээ гадаадын сургуулийн үндсэн хөтөлбөрт дэвшин суралцагчид Монгол Улсын Засгийн газрын тэтгэлэг олгохоор тус тус тусгажээ.
Мөн Засгийн газар хоорондын гэрээний дагуу Монгол Улсаас гадаад улсад, гадаад улсаас Монгол Улсад суралцах суралцагчид, Нийгмийн салбарын хүний нөөцийн хомсдолтой зарим эрэлттэй мэргэжлийн үндсэн хөтөлбөрөөр суралцагчид дотоодын дээд боловсролын сургалтын байгууллагын дэд бакалавр, бакалаврын үндсэн хөтөлбөрт тэтгэлэгтэй суралцахаар тусгасан байна.
Монгол Улсын Засгийн газраас багш мэргэжлээр суралцагч болон багшийн магистрын хөтөлбөрт суралцахад нь дэмжлэг үзүүлэх зохицуулалтыг журмаар шийдвэрлэв. Багш мэргэжлийг сонгон  тэтгэлэг авч суралцсан төгсөгч төрийн болон орон нутгийн өмчийн боловсролын сургалтын байгууллагад орон нутагт гурваас доошгүй эсхүл нийслэлд таваас доошгүй жил мэргэжлээрээ ажиллах нөхцөл шаардлага туссан нь хариуцлага төсвийн үр дүнг нэмэгдүүлэх, багшийн хэрэгцээг тогтвортой хангах онцлог заалтболов.
Боловсролын ерөнхий хуульд төрийн болон орон нутгийн сургуульд тасралтгүй 15 жил ажилласан багш, ажилтны нэг хүүхдийг тэргүүлэх, эрэлттэй мэргэжлээр төрийн өмчийн их дээд сургуульд суралцахад сургалтын төлбөрийг төрөөс хариуцахаар болов.
Боловсролын салбарын эрх зүйн орчны шинэчлэл, Монгол Улсын Засгийн газраас өгсөн чиглэлийн дагуу их, дээд сургуулийн суралцагчдад сургалтын тэтгэлэг, зээл олгох, эргэн төлүүлэх, дэмжлэг үзүүлэх, буцалтгүй тусламж олгох тогтолцоог боловсронгуй болгох, зээлийн сангийн үйл ажиллагааг шинэ түвшинд нээлттэй, ил тод сонгон шалгаруулалтыг зохион байгуулах зохицуулалтыг журмуудад тусгалаа.
Ингэснээр суралцагчийн сонгон шалгаруулалтын үйл ажиллагаанд хүний оролцоог багасгах,  цахимжуулах, шударга, ил тод, нээлттэй болох, олгосон зээл, тэтгэлэг, санхүүгийн дэмжлэгийн хэмжээг жил бүр үнэлж, дүгнэх, эргэн төлөлт хийх, дуусгавар болгох нөхцөлийг бүрдүүлнэ гэж үзэж байна.

Цэцэрлэг, ерөнхий боловсролын сургууль, мэргэжлийн боловсролын сургууль, политехник коллежийн багш, ажилтанд мөнгөн тэтгэмж олгох журам баталлаа
Төрийн болон орон нутгийн өмчийн цэцэрлэг, ерөнхий боловсролын сургууль, мэргэжлийн боловсролын сургууль, политехник коллежийн багш, ажилтанд мөнгөн тэтгэмж олгох журам баталлаа.
Боловсрол, шинжлэх ухааны салбарт  төрийн болон орон нутгийн өмчийн 1,799 сургалтын байгууллагад 95,032 төрийн албан хаагч ажиллаж байна. Үүнээс 1,279 байгууллагын 62,099 албан хаагч нь орон нутаг ажиллаж байна. Орон нутагт ажиллаж буй боловсрол сургалтын байгууллагын багш ажилтанд олгох мөнгөн тэтгэмжийг 2006 оноос Боловсролын тухай хуулинд орсон нэмэлт өөрчлөлтийн хүрээнд олгож эхэлсэн бөгөөд боловсролын Багц хуулинд тусгагдсан өөрчлөлттэй уялдуулан тэтгэмж олгохтой холбоотой харилцааг энэ журмаар зохицуулах юм.
Журам батлагдсанаар орон нутагт дахь боловсролын сургалтын байгууллагын төрийн үйлчилгээний албан хаагчид тогтвор суурьшилтай ажиллах нөхцөл бүрдэж амьдралын нөхцөл, чанараа дээшлүүлэх, нийгмийн баталгаагаар хангагдахад нь тодорхой санхүүгийн  дэмжлэг болно гэж үзэж байна.

Олон улсын PISA-2022 үнэлгээний Монгол Улсын үр дүн, бодлогын зөвлөмжийн хүрээнд зарим арга хэмжээг авч хэрэгжүүлнэ
Суралцагийн сурлагын амжилтыг үнэлэх олон улсын PISA-2022 үнэлгээний Монгол Улсын үр дүн, бодлогын зөвлөмжийн хүрээнд хэрэгжүүлэх зарим арга хэмжээний туай Засгийн газрын тогтоол гарлаа. Тогтоол батлагдаж, хэрэгжсэнээр,
·      Олон  улсад хүлээн зөвшөөрөгдсөн үнэлгээний аргачлалаар бүх түвшний боловсролын чанарыг үнэлүүлэх ажлыг зохион байгуулах, 2025 оны PISA үнэлгээнд бэлтгэх,
·      Цэцэрлэг, ерөнхий боловсролын сургуулийн суралцагчдын эх хэл болон унших суурь чадварыг сайжруулахад чиглэсэн зорилтод арга хэмжээ авах,
·      Сургуулийн дэд бүтэц, сургалтын орчин, хэрэглэгдэхүүн, цахим хэрэглэгдэхүүнээр хангах арга хэмжээ авах;
·      Хот, хөдөөгийн болон нийгэм, эдийн засгийн ялгаатай бүлгийн хоорондын боловсролын чанарын ялгааг багасгах арга хэмжээг хамтран хэрэгжүүлэх нөхцөл бүрдэнэ гэж үзэж байна.

Бөөрөлжүүтийн нүүрсний уурхайг түшиглэсэн 300 МВт-ын цахилгаан станцын төслийн барилга угсралтын ажил 50 хувьтай байна
Бөөрөлжүүтийн 300 MВт-ын цахилгаан станц, Багануур-Бөөрөлжүүтийн 200 кВ-ын цахилгаан дамжуулах агаарын шугамын төслийн хүрээнд Бөөрөлжүүт-Сэргэлэнгийн 220 кВ-ын цахилгаан дамжуулах агаарын шугам шинээр барьж байгуулах асуудлаар Цахилгаан эрчим хүч худалдах, худалдан авах тухай гэрээнд нэмэлт өөрчлөлт оруулан цогц байдлаар шийдвэрлэх талаар Төслийн хөрөнгө оруулагчтай хийсэн хэлцлийн үр дүнг Эрчим хүчний сайд Б.Чойжилсүрэн танилцууллаа.
Станцын жилд үйлдвэрлэх цахилгаан эрчим хүчний хэмжээг одоо байгаа 5500 цагаас 7096 цаг болгон нэмэгдүүлэх Бөөрөлжүүт-Сэргэлэн чиглэлийн 220 кВ-ын хоёр хэлхээт цахилгаан дамжуулах агаарын шугамыг барьж, цахилгаан станцын төсөлтэй цогц байдлаар хэрэгжүүлэн “Цахилгаан дамжуулах үндэсний сүлжээ” ТӨХК-д үнэ төлбөргүй шилжүүлэх асуудлаар “Диспетчерийн үндэсний  төв” ТӨХХК болон “Цэцэнс майнинг энд энержи” ХХК-ийн хооронд байгуулсан “Цахилгаан эрчим хүч худалдах, худалдан авах тухай” гэрээнд нэмэлт өөрчлөлт оруулахыг Эрчим хүчний яам, “Диспетчерийн үндэсний  төв”-ийн удирдлагад даалгалаа.
Монгол Улсын Засгийн газрын 2020-2024 оны үйл ажиллагааны хөтөлбөр, “Шинэ сэргэлтийн бодлого”-ын хүрээнд Төв аймгийн Баянжаргалан сумын нутаг дэвсгэрт Бөөрөлжүүтийн нүүрсний уурхайг түшиглэн 300 МВт-ын цахилгаан станц төслийг  “Цэцэнс майнинг энд энержи” ХХК хэрэгжүүлж буй. Барилга угсралтын ажил 50 хувьтай үргэлжилж байна. Төслийн эхний үе шатны 150 МВт-ын блокыг ирэх аравдугаар сард, хоёр дахь шатны 150 МВт-ын блокыг 2025 оны аравдугаар сард ашиглалтад оруулахаар төлөвлөж байна.

Зудын гамшигт нэрвэгдэж, хүндрэлтэй нөхцөл байдалд байгаа малчдад туслах хандивын аянд Сангийн яам болон харьяа байгууллагууд нэгдэж, нэг өдрийн цалин буюу нийт 138.730.918 төгрөгийг өнөөдөр УОК-т хүлээлгэн өглөө.

Хандивыг Сангийн яамны Төрийн нарийн бичгийн дарга Ж.Ганбат болон бусад төлөөлөл гардуулан өгсөн юм.

Энэ үеэр сүүлийн долоо хоногийн хугацаанд өвөлжилт хүндэрсэн 15 аймгийн 4222 малчин өрхөд түлээ түлш, 6766 айлд эрүүл мэндийн тусламж үйлчилгээ, 2010 өрхөд хоол хүнсний тусламж, 62722 өрхөд өвс, 69866 өрхөд малын тэжээл хүргэх ажлыг зохион байгуулж  байгаа талаарх мэдээллийг УОК-ын Шуурхай штабаас танилцууллаа.

Олон улсын эмэгтэйчүүдийн эрхийг хамгаалах өдөрт зориулсан Анир поп оркестр болон уран бүтээлчдийн хамтарсан шилдэг уран бүтээлийн “Баярлалаа ээжээ” баярын тусгай хөтөлбөрт тоглолт гуравдугаар сарын 8-нд ганцхан удаа зохион байгуулагдаж байна.

Тоглолтод: МУГЖ Л.Болдбаатар, МУГЖ Ч.Мөнх-Эрдэнэ, СТА Л.Чулуунбаатар, СТА П.Идэржавхлан, СТА Н.Ундрал, СТА Л.Нарангэрэл, Нюанс хамтлаг, Увертюра хамтлаг анир поп оркестр оролцоно.

 Ерөнхий зохион байгуулагч: Анир саунд рекордс

Тоглолт: Соёлын төв өргөөнд 15 цагт ганцхан удаа

Тасалбарын үнэ:Партер-50.000 төгрөг Бель-этаж-30.000 төгрөг

Дэлгэрэнгүй мэдээллийг: 80709933

Тасалбарыг www.ticket.mn болон СТӨ-ийн билетийн кассаас худалдан аваарай. Та хайртай ээж, хайртай хань, хайртай бүсгүйгээ баярлуулаарай.

Хөгжлийн бэрхшээлтэй хүний эрхийг хангах нийслэлийн салбар зөвлөл хуралдаж, 2023 онд хэрэгжүүлсэн арга хэмжээг танилцуулан, 2024 оны үйл ажиллагааны төлөвлөгөөг хэлэлцлээ. Хуралд нийслэлийн нутгийн захиргааны 13 байгууллага, төрийн бус байгууллагын төлөөллүүд оролцов.

2023 онд тус зөвлөлөөс хөгжлийн бэрхшээлтэй хүний эрхийг хангах чиглэлээр 25 арга хэмжээг төлөвлөн, 97.2 хувийн биелэлттэйгээр хэрэгжүүлсэн байна. Тухайлбал, хөгжлийн бэрхшээлтэй иргэдийн эрхийг хамгаалах чиглэлээр үйл ажиллагаа эрхэлдэг төрийн бус байгууллагуудтай уулзалт, хэлэлцүүлэг зохион байгуулан, санал солилцож, тулгамдсан асуудлуудыг шийдвэрлэсэн. Монголын хараагүйчүүдийн үндэсний холбооны гаднах талбайг тохижуулж, хөгжлийн бэрхшээлийн талаарх ойлголт, мэдлэгийг нэмэгдүүлэх чиглэлээр 88 удаагийн сургалт зохион  байгуулан, 7171 албан хаагчийг хамруулжээ. Мөн хөгжлийн бэрхшээлтэй иргэдийн өрхийн үйлдвэрлэлийг дэмжих, үйлдвэрлэсэн бүтээгдэхүүнийг борлуулахад дэмжлэг үзүүлэх үзэсгэлэн худалдааг есөн удаа зохион байгуулж, нийт 120 иргэн оролцон, 50.3 сая төгрөгийн борлуулалт хийсэн байна. Түүнчлэн төрөлжсөн асрамж, халамжийн 27 төвд амьдардаг хөгжлийн бэрхшээлтэй 240 хүүхдийг оношилгоо, хэл яриа заслын хичээлд хамруулсан юм.

Харин 2024 оны төлөвлөгөөг боловсруулахдаа нийслэлийн нутгийн захиргааны 15 байгууллагаас санал авч, дөрвөн зорилтын хүрээнд 27 арга хэмжээг төлөвлөжээ. Тухайлбал, аж ахуйн нэгж, байгууллагууд гадна орчноо хөгжлийн бэрхшээлтэй иргэнд ээлтэй болгон шинэчлэх, боловсролд тэгш хамруулах, үр дүнг сурталчлах, хөдөлмөрийн насны иргэдийг бэрхшээлийн онцлогт тохирсон ажлын байранд зуучлах, хөдөлмөрийн аюулгүй байдлын сургалт зохион байгуулах зэрэг арга хэмжээг төлөвлөөд байна.

Хуралд оролцсон холбоо, төрийн бус байгууллагуудын төлөөллүүдийн зүгээс дохионы хэлмэрчийн хүртээмжийг нэмэгдүүлэх, гамшгийн үед хөгжлийн бэрхшээлтэй иргэнд сэрэмжлүүлэх, хамгаалах цогц төлөвлөгөөг боловсруулах, нийтийн эзэмшлийн гудамж талбай, орчны хөгжлийн бэрхшээлтэй иргэнд ээлтэй, хүртээмжтэй байдлыг нэмэгдүүлэх зэрэг саналыг хэлж байв. Ийнхүү тэдний саналыг тусган, Хөгжлийн бэрхшээлтэй хүний эрхийг хангах нийслэлийн салбар зөвлөлийн 2024 оны үйл ажиллагааны төлөвлөгөөг баталлаа.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС