Хөгжлийн бэрхшээлтэй ч би бусдаас өөр гэж шантарч хойш суугаагүй олон залууст үлгэр жишээ болж яваа зорилготой бүсгүй бол Буянжаргалын Болороо юм. Тэрээр “Ээжээрээ бахархдаг ээжийнхээ ачийг л хариулах юмсан” гэж ярьж байсан. Өнөөдөр түүний хувьд мөрөөдлийнх нь нэгээхэн хэсэг биелж ээж Буянжаргал нь МУ-ын ЕРӨНХИЙЛӨГЧ Ц.Элбэгдоржоос “Алтан гадас одон” гардан авсан тухайгаа тэрээр фейсбүүк хуудсандаа ийнхүү нийтэлжээ.
“Өнөөдөр амьдралын минь хамгийн сайхан өдрүүдийн нэг тохиож байна.
10 жилийн ширээнээсээ ажилчны эгнээнд шилжиж, 22-хон насандаа “Онцгой асаргаа шаардлагатай хүүхэд”-тэй болж, хүүхдээ хэвтрийн, 100% хүний асаргаанд байсан хүүхдээ хөл дээр нь босгож, Ебс, Муис-д эрүүл хүүхдүүдтэй хамт сургасан. Ээж нь яах вэ миний охин гэсээр бүхнээс татгалзаж, бүхнийг үрдээ зориулсан ээж минь өнөөдөр МУ-ын Ерөнхийлөгч Ц.Элбэгдоржоос “Алиан гадас одон” гардан авлаа.
Хоосон хоносон ч яахав хичээлдээ л яв гээд их сургуульд байхад хамаг байдгаа шавхаж өгөөд л үлддэг байсан цаг саяхан. Өвдсөн ч ажиллаж, миний охин гэсээр өдийг хүрсэн ээж минь өдийгөөс төдий хүртэл ганцаараа зүтгэснээ өнөөдөр үнэлүүллээ.
Өвчтэй охинтойгоо насаараа айлд амьдарсан ээжийгээ чадах бүхнээрээ баярлуулж, ачийг нь хариулах туйлын хүсэл минь өчүүхэн ч гэсэн биеллээ олж байна.
Нулимс урсаад л байдаг өдөр байна.” гэжээ.
С.Атарцэцэг