Туршилтын ажилтнуудынхаа хөдөлмөрийг шулахаа зогсоохыг Ерөнхий сайд хүсэв

Монгол Улсын шилдэг аж ахуйн нэгж шалгаруулах ёслол дээр Ерөнхий сайд Ж.Эрдэнэбат үг хэллээ. Тэрээр хэлсэн үгэндээ хувийн хэвшлийнхнээс нэг зүйлийг онцгойлон хүсэв. Хувийн хэвшлийн аль ч байгууллага шинээр ажилд орж байгаа залуусыг туршилтаар ажиллуулж байна гээд цалин хөлс өгөхгүй багагүй зовоодог болсныг Ерөнхий сайд анзаарчээ. “Сүүлийн үед нэг буруу жишиг тогтож газар авах янзтай болсон байна. Энэ нь хүнийг туршилтын хугацаа нэрийн дор цалингүй эсвэл бага цалингаар олон сараар ажиллуулж, жаахан бүдүүлгээр хэлбэл мөнгөний машин болгон хөдөлмөрийг нь шулж байна. Иймээс туршилтаар ажиллуулж байгаа хүмүүсээ жинхэлж, үндсэн ажилтан болгон үндсэн цалинг нь олгож байхыг хувийн хэвшлийнхнээсээ хүсье” гэсэн юм. Аль нэг байгууллагад ажилд ороод хэдэн сараар туршигдаад эцэст нь хөдөлмөрөө үнэгүй ашиглуулсаар ажлаасаа гарсан залуус, өнөөдөр туршилтын “туулай” хэвээр байгаа ажилтнуудад Ерөнхий сайдын үг ямархуу дулаан сонсогдож байгаа бол. Хэрэв Ерөнхий сайдынхаа үгийг ажил хэрэгч хүлээж авбал хувийн хэвшлийнхэн олон хүний талархлыг хүлээгээд барахгүй ашиг орлого нь нэмэгдэх нь лавтай.

Н.Намуун