Мэргэжлийн хяналтын байгууллагаас “хүн амьдрах боломжгүй” гэж дүгнэсэн Хан-Уул дүүргийн 2, 3-р хорооны нутаг дэвсгэр дэх “Нэхмэлийн шар” гэгддэг 1, 2, 5, 6, 7, 10, 11, 16, 3, 4, 8, 9-р байрыг дахин төлөвлөж, барилгажуулах шийдвэрийг 2014 онд гаргасан ч өнөөдрийг хүртэл төсөл хэрэгжүүлэх компани тодорхой болоогүйгээс иргэд хана, таазнаасаа суулт өгч, цуурсан байрандаа эрсдэлтэй нөхцөлд амьдарсаар байгаа юм. Энэ асуудлаар УИХ-ын гишүүн, Өргөдлийн байнгын хорооны дарга Д.Сарангэрэл Нийслэлийн Засаг даргын Дэд бүтцийн хөгжлийн асуудал хариуцсан орлогч П.Баярхүүтэй уулзаж цаашид хэрхэн шийдвэрлэх боломжтой талаар санал солилцлоо. Уулзалтад тухайн байрны оршин суугчид болон төсөл хэрэгжүүлэхээр шалгарсан компаний удирдлагууд оролцож байр сууриа илэрхийллээ.

700 гаруйхан оршин суугчтай Францын Фландрес хэмээх нэгэн жижиг хотын сургууль монгол гэрт хичээллэх анги нээжээ. Энэхүү гэрийн нийт өртөг нь 70 мянган евро болсон аж.

2016-2017 оны хичээлийн шинэ жилийн нээлт өнөөдөр орон даяар эхэлж байна. Зуны зугаатай буюу амралтын урт өдрүүд дуусч, ийнхүү эрдэм номдоо шамдан суралцах их үйлсийн гараагаа эхлүүлэх өдрүүд айлчлан ирж байгаа нь энэ. 95 жилийн түүхтэй Батлан хамгаалах их сургуулийн шинэ хичээлийн жилийн нээлтийн ажиллагаанд УИХ, Засгийн газрын гишүүн, Батлан хамгаалахын сайд Б.Бат-Эрдэнэ, БХЯ-ны ТЗУГ-ын дарга, хошууч генерал З.Болдбаатар, БХИС-ийн захирал, хошууч генерал Я.Чойжамц тэргүүтэй БХЯ, ЗХЖШ-ын удирдлагууд болон оюутан залуусын ар гэрийн төлөөлөл оролцлоо. Энэ жил улсын хэмжээнд 100 их, дээд сургууль, коллежид 164.5 мянган оюутан суралцагч элссэнээс Батлан хамгаалах их сургуульд мянга гаруй оюутан хичээлийн шинэ жилээ эхлүүлж байна.

  УИХ-ын гишүүн, Засгийн газрын гишүүн Батлан хамгаалахын сайд Б.Бат-Эрдэнэ тус сургуулийн шинэ хичээлийн жилийн нээлтийн ажиллагаанд хэлсэн үгэндээ “95 жилийн түүхт ойгоо тэмдэглэж байгаа тус сургууль нь Батлан хамгаалах Зэвсэгт хүчинд чадварлаг мэргэжлийн боловсон хүчнийг бэлтгэх үндсэн чиг үүргээ энэ урт хугацааны туршид хэлбэрэлтгүй биелүүлж ирсэн. Ард иргэд, өсвөр үе, залуучуудад эх оронч, үндэсний үзэл, бие бялдарын өв тэгш хүмүүжил төлөвшүүлэхэд БХИС-ын үүрэг оролцоо маш чухал гэдгийг энэ дашрамд тэмдэглэж хэлмээр байна. Энэ чиглэлийн аливаа бүтээлч ажил, санал, санаачлагыг миний бие Батлан хамгаалахын сайдын хувьд байнга дэмжин ажиллах болно. Та бүхэн БХИС-д суралцах хугацаандаа цэргийн хэргийн болон иргэний боловсрол эзэмшиж, өөрийн мэдлэгийн санд асар их мэдээлэл хуримтлуулж, дадлага, ур чадвараа ахиулж, бие бялдар-сэтгэл зүйн өндөр бэлтгэлтэй болсоноор Батлан хамгаалах салбар, Зэвсэгт хүчний өөрчлөлт, шинэчлэлтийн хөдөлгөгч гол хүч нь болох юм. Мөн БХИС бол цэрэг эрсийн сургууль бие бялдарын хөгжилд онцгой анхааран эрүүл чийрэг монгол иргэний үлгэр дуурайлал байх ёстой гэдгийг анхааран суралцаарай. Энэ тал дээр ЗХЖШ, БХИС-ийн удирдлагын зүгээс анхаарч ажиллах болно. Эдгээрийн зэрэгцээ Оюутан залуучууд та бүхэн суралцах хугацаандаа мэргэжлээ сайтар эзэмшиж, ёс суртахууны зөв төлөвшилтэй, бие бялдарын өндөр хөгжилтэй болж, гадаад хэлийг сайтар эзэмшин, техник технологи, компьютер мэдээлэл, инновацийг судалж өөрийн болгон суралцах хэрэгтэй гэдгийг захиад Их Жанжин Д.Сүхбаатарын нэрээр овоглосон их сургуулийнхаа нэр хүндийг өндөрт өргөж Монгол цэргийн алдар нэрийг улс нийгэмдээ төдийгүй дэлхий дахинаа алдар цуугаа дуурсгана гэдэгт би итгэл төгс байна” гэдгээ илэрхийллээ.

Мөн нээлтийн ажиллагааны үеэр 2016-2017 оны сургуулийн жилд БХИС- д элсэн суралцагчдыг төлөөлж Аюулгүй байдлын сургуулийн 1-р дамжааны оюутан Ням-Осорын Болд нийт оюутнуудаа төлөөлөн үг хэллээ. Тэрээр хэлсэн үгэндээ “Эх орныхоо гэрэлт ирээдүй, эрдмийн эзэд болсон эрхэм хүндэт оюутан, сонсогч сурагчид болон сурган хүмүүжүүлэгч, судлаач эрдэмтэн багш нартаа хичээлийн шинэ жилийн баярын мэнд дэвшүүлж эрдэм оюуны ариун үйлст тань өндөр амжилт хүсэн ерөөе. Батлан хамгаалах их сургууль нь боловсрол шинжлэх ухаан, технологийн хөгжлийг тэргүүлэн манлайлагч мэргэжилтнүүдийг бэлтгэдэг Монгол Улсын үндэсний ууган их сургуулийн нэг билээ. Би Хөвсгөл аймгийн Тариалан сумын дунд сургуулийг төгсч, өөрийн бодол хүсэл, багын мөрөөдөлдөө хөтлөгдөн тус сургуульд эх орныхоо өнцөг булан бүрээс ирсэн үеийн олон нөхөдтэйгээ мөр зэрэгцэн суралцах болсондоо баяртай байна. Монголын зэвсэгт хүчин өнө эртнээсээ морьт цэргээс моторжсон хүлгийг эзэмшсэн түүхэн уламжлал, дайчин замналтай эрэлхэг охид хөвгүүдээрээ бахархаж явдаг гэж би ойлгодог. Эгэл жирийн малчны хүү би өнөөдөр тус сургуульд суралцсанаар тэрхүү моторжсон хүлгийг эзэмших болсондоо сэтгэл хөдлөн чин сэтгэлээсээ баярлаж байна. Би ийм бахархам түүхт, баялаг уламжлалтай их сургуульд элсэн орсондоо туйлын их баяртай байгаа бөгөөд сургууль хамт олныхоо итгэлийг хүлээн сонгосон мэргэжлээрээ хичээнгүйлэн суралцаж “Манлайлагч” оюутан байх болно” гэлээ.

2016-2017 оны хичээлийн шинэ жил эхэллээ. Өнөөдөр өглөө  Хан-Уул дүүргийн 15 дугаар сургуулийн нээлтийн ажил боллоо. Хичээлийн шинэ жилийн нээлтийн ажиллагаанд  тус сургуулийн Эцэг, эхчүүдийн зөвлөлийн дарга, дүүргийн ИТХ-ын дарга  Д.Батбилэг, 15 дугаар сургуулийн захирал Ө.Шүрэнцэцэг, сургуулийн багш нар болон  сурагч, тэдний эцэг эхчүүд оролцлоо.

Дашрамд дурдахад, энэ жил  Хан-Уул дүүргийн 15, 32-р сургууль хамт  хичээллэх юм байна.

Хүүхэд багачууддаа хичээлийн шинэ жилийн баярын мэнд хүргэе.

Нийслэлийн Хан-Уул дүүргийн “Буянт-Ухаа” цогцолбор сургуулийн хичээлийн шинэ жилийн нээлтийн ёслол боллоо.

Нээлтийн арга хэмжээнд Монгол улсын Ерөнхий сайд Ж.Эрдэнэбат, Боловсрол, соёл, шинжлэх ухаан, спортын дэд сайд Ё.Отгонбаяр, Нийслэлийн Засаг даргын орлогч Ж.Батбаясгалан, Хан-Уул дүүргийн Боловсролын хэлтсийн дарга С.Эрдэнэчимэг, тус сургуулийн захирал н.Болормаа нар болон ахмад багш нар, сурагчид, ард иргэд оролцлоо. Нээлтийн арга хэмжээг тус сургуулийн захирал н.Болормаа нээж  хэлсэн үгэндээ “2015-2016 оны хичээлийн жилд Буянт-Ухаа” цогцолбор сургууль нь БСШУЯ-ны “Боловсролын шинэчлэлийг манлайлагч шилдэг сургууль”-аар шалгарсан. Олон сурагчид маань бахдам амжилт үзүүлж, сурлага, урлаг спортоороо улсдаа тэргүүлсэн. Нийслэлийн ажил мэргэжлийн аварга багшаар олон багш нар маань шалгарч “Саятан багш”-ийн болзол хангасан байна. Их ажлын төлөө зорилго нэгтэй ажиллаж, эх орноо улам их хөгжүүлэх болно.” хэмээлээ. Үүний дараа Монгол улсын  Ерөнхий сайд Ж.Эрдэнэбат эрдмийн өргөөнд цугласан хүүхэд багачууд, багш сурган хүмүүжүүлэгч, эцэг, эхчүүдэд хичээлийн шинэ жилийн баярын мэнд хүргэлээ. Ерөнхий сайд хуучнаар Ажилчны районы долдугаар сургууль гэж байх үед нь тус сургуульд нэгдүгээр ангид элсэн орж, А үсэг заалгаж байснаа дурсч төрөлх сургуулийнхаа эрдмийн баярт оролцож байгаадаа баяртай байгаагаа уламжиллаа.

“Өнөөдөр сургууль, цэцэрлэгийн хүрэлцээ хангамж туйлын хүнд байна. Тухайлбал, миний ирсэн “Буянт-Ухаа” цогцолбор сургууль л гэхэд гурван ээлжээр хичээллэдэг. Гурван ээлжээр хичээлдэг ийм сургуулиудыг хоёр ээлжтэй болгох, 2-6 насны бүх хүүхдийг сургуулийн өмнөх боловсролд хамруулах нь манай Засгийн газрын нэг зорилго. Энэ зорилтоо хэрэгжүүлэхийн төлөө Монгол Улсын Засгийн газар хичээж ажиллана гэдгээ эрдмийн баярын энэ өдөр та бүхэндээ амлаж байна” гэж  Ерөнхий сайд Ж.Эрдэнэбат хэллээ

Тус сургуульд 2016-2017 оны хичээлийн жилд 62 бүлэгт 2400 сурагч суралцахаас нэгдүгээр ангийн долоон бүлэгт 303 зургаан настан элсэн орж байна.

2016-2017 оны хичээлийн шинэ жил эхэллээ. Өнөөдөр өглөө  Хан-Уул дүүргийн 15 дугаар сургуулийн нээлтийн ажил боллоо. Хичлээийн шинэ жилийн нээлтийн ажиллагаанд  тус сургуулийн Эцэг, эхчүүдийн зөвлөлийн дарга, дүүргийн ИТХ-ын дарга  Д.Батбилэг, 15 дугаар сургуулийн захирал Ө.Шүрэнцэцэг, сургуулийн багш нар болон  сурагч, тэдний эцэг эхчүүд оролцлоо.

Дашрамд дурдахад, энэ жил  Хан-Уул дүүргийн 15, 32-р сургууль хамт  хичээллэх юм байна.

Хүүхэд багачууддаа хичээлийн шинэ жилийн баярын мэнд хүргэе.

Хан-Уул дүүргийн 14-р хороонд шинээр баригдсан 59 дүгээр сургууль, 116 дугаар цэцэрлэгийн нээлтийн арга хэмжээ өнөөдөр боллоо. Тус сургуулийн нээлтэнд УИХ-ын гишүүн Л.Энх-Амгалан, Нийслэлийн Засаг даргын орлогч Ш.Анхмаа, Нийслэлийн хөрөнгө оруулалтын газрын дарга н.Ариунбаяр, Хан-Уул дүүргийн Засаг дарга Ж.Ганхуяг, Хан-Уул дүүргийн Засаг даргын орлогч н.Анхбаяр Хан-Уул дүүргийн Нийгмийн хөгжлийн хэлтсийн дарга Б.Булган, Боловсролын хэлстийн дарга С.Эрдэнэчимэг болон бусад төлөөлөгчид оролцлоо.

Нээлтийн арга хэмжээг Нийслэлийн Засаг даргын орлогч Ш.Анхмаа нээж хэлсэн үгэндээ “Сургууль цэцэрлэгийн асуудал бол улсын нэн тэргүүний асуудал байдаг.: Өнөөдөр бид сургууль цэцэрлэгийн хүртээмж муу байгааг мэднэ. Харин ийм үед тус сургууль, цэцэрлэгийн цогцолбор ашиглалтад орж, нээлтээ хийж байгаад баярлаж байна. Нийт сурагчид маань зөв, шударга сайн боловсролтой иргэн болж төлөвшихийн өлзийтэй ерөөлийг өргөн дэвшүүлье. Нийт багш, сурагчиддаа хичээлийн шинэ жилийн мэнд хүргэе.” хэмээлээ. Нийслэлийн хөрөнгө оруулалтын газрын захиалгаар баригдсан тус сургууль, цэцэрлэгийн цогцолбор нь 120 хүүхдийн цэцэрлэгийн насны хүүхэд, 180 хүүхдийн бага ангийн хүүхдүүдийг хүлээн авах хүчин чадалтай юм байна.

Хан-Уул дүүргийн Засаг дарга Ж.Ганхуяг “Манай Хан-Уул дүүргийн Өлзийт хороолол маань ирээдүйд 60 орчим мянган хүн амтай, эрчимжсэн мал аж ахуй хөгжсөн бүс нутаг болон хөгжинө. Тэр ажлын эхлэлийг бид өнөөдөр харж байна. Сая УИХ-ын гишүүн Л.Энх-Амгаланд сурагчдын автобусны асуудалд анхаарлаа хандуулаач гэсэн хүсэлтийг тавихад улсын төсөвт оруулна гэж амалсан. Удахгүй манай сургууль автобустай болох нь. Сургуулийн нээлт гэдэг бол хүүхэд багачуудын хувьд их том баяр байдаг. Хүүхдүүд минь энэ сайхан шинэ сургуульдаа ихийг сурч сайн хүн болоорой гэж хүсэн ерөөе” хэмээлээ.

Нийслэлд өчигдөр/2016.08.31/ хоёр газарт хуурамч мөнгөн тэмдэгт илэрсэн дуудлага цагдаагийн байгууллагад иржээ. Тухайлбал, өчигдөр 16.30 цагийн орчимд Голомт банкинд гүйлгээ хийх гэж байсан 35 настай Б гэх эмэгтэйн 60 мянган төгрөгнөөс хуурамч 20 мянгатын дэвсгэрт илэрсэн байна.

Мөн өчигдөр 13.04 цагийн орчимд Төрийн банкинд гүйлгээнд хуурамч 100 юань илэрчээ.

Одоогоор дээрх хоёр тохиолдлыг Баянгол, Хан-Уул дүүргийн хэлтсүүдэд шалгаж эхэлжээ.

“Спасская башня” олон улсын цэргийн хөгжмийн наадам энэ жил 9 дэх удаагаа ОХУ-д зохиогдож байгаа бөгөөд өнгөрсөн хугацаанд дэлхийн 47 орны 140 цэргийн хөгжмийн хамтлаг оролцоод байна. Москва хотноо 2016 оны 08 дугаар сарын 27-ноос 09 дүгээр сарын 04-ний өдрүүдэд зохиогдож байгаа энэхүү наадамд

Монгол Улсын Зэвсэгт хүчний Үлгэр жишээ үлээвэр найрал хөгжмийн бүрэлдэхүүн анх удаагаа оролцож байна. Наадамд оролцож байгаа орнуудын хөгжмийн хамтлагууд “Улаан талбай” дээр орой бүр тоглолт үзүүлж байна.

8 дугаар сарын 28-ны ням гаригт Улаан талбайд болсон тоглолтыг Элчин сайд Б.Дэлгэрмаа үзэж сонирхов. Монгол Улсын цэргийн найрал хөгжимчид Улаан талбайд цог жавхлантай орж ирэхэд Кремлийн албан ёсны “дуу хоолой” болох нэвтрүүлэгч “Монгол Улсаас ОХУ-д суугаа Онц бөгөөд Бүрэн эрхт Элчин сайд Банзрагчийн Дэлгэрмаа өөрийн орны хөгжимчдийг дэмжихээр хүрэлцэн ирээд байна” гэж зарласан нь Монгол Улсын нэр төрийг өндөрт өргөсөн үйл явдал болов.

Энэ үдэш МУСТА, Цэргийн дуу бүжгийн эрдмийн чуулгын гоцлол дуучин, Гнессиныхны нэрэмжит хөгжмийн академийн магистр Ч.Бадрал талбай дээр гарч монголын хөгжимчидтэйгээ хамт дуулсан нь хуран цугларсан 10000 үзэгчдийн сэтгэлийг ихэд хөдөлгөв. Энэ жил тус наадамд Монгол, Орос, Хятад, Япон, Казахстан, Австри, Беларусь, Грек, Итали, Швейцарь, Финлянд, Израиль улсын хөгжимчид оролцож авьяас чадвараа үзүүлж байна.

   Өнгөрсөн долоо хоногт Сингапур Улсад Зика вирусын халдвар дахин гарсан нь тогтоогдож, өнөөдрийн байдлаар тус вирусын нийт 56 тохиолдол илрээд байна.Сингапурын Эрүүл мэндийн яамнаас иргэдэд зориулсан зөвлөмж гаргаж, Сингапурын зүүн хэсэгт байрлах оршин суугчдын дунд үзлэг, шинжилгээ явуулж, Зика вирусын төстэй шинж тэмдэг илэрсэн өвчтөнүүдийн мэдээллийг цуглуулах, дахин шинжилгээнд хамруулах, орон сууцанд шумуулны устгал явуулах, гудамж талбайд утаа тавих зэрэг арга хэмжээнүүдийг авч эхэлжээ.

 Иймд манай иргэд, ялангуяа жирэмсэн эмэгтэйчүүд онц шаардлагагүй бол Сингапур Улсад зорчихгүй байх, иргэд зорчихдоо шумууланд хазуулахаас урьдчилан сэргийлж, сонор сэрэмжтэй байхыг сэрэмжлүүлж байна.

                        ГХЯ-НЫ КОНСУЛЫН ГАЗАР                2016 оны 8 дугаар сарын 30

2016-2017 оны хичээлийн шинэ жил өнөөдрөөс эхлэж байна .Өдрөөс эхлэн авто замд ойр байрлалтай Ерөнхий боловсролын сургуулийн орчимд  “SCHOOL POLICE” эргүүл ажиллаж эхэлнэ. Гарч болзошгүй зам тээврийн осол хэрэг, гэмтлээс урьдчилан сэргийлэх, хөдөлгөөний аюулгүй байдлыг хангах зорилгоор туслах ажилтан, олон нийтийн цагдаа нар ажиллаж, сурагчдын аюулгүй байдлыг хангана.

Иймд жолооч та бүхнийг оюутан, сурагчдаа хүндэтгэн замын хөдөлгөөнд соёлтой оролцохыг Замын цагдаагийн газраас уриалж байна.

Өнөөдрийн байдлаар малын гоц халдварт шүлхий өвчин Төв аймгийн Баян, Баянжаргалан сум, Говьсүмбэр аймгийн Сүмбэр сумын нутгуудад гараад байна.

Үүнтэй холбогдуулан нийслэлийн Засаг дарга бөгөөд Улаанбаатар хотын Захирагч С.Батболд уг өвчинтэй тэмцэх, түүнээс урдьчилан сэргийлэх талаар яаралтай арга хэмжээ авч ажиллахыг үүрэг болгон А/628 захирамжийг энэ сарын 30-нд гаргасан.

Тэгвэл тус захирамжийн биелэлт хэрэгжилттэй танилцахаар өчигдөр /наймдугаар сарын 31-нд/ нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан, Нийслэлийн мал эмнэлгийн дарга А.Нарантуяа, НЗДТГ-ын Хяналт шинжилгээ, үнэлгээний хэлтсийн дарга Х.Гантулга болон бусад холбогдох албаны хүмүүс Мал амьтан тэдгээрийн гаралтай бүтээгдэхүүний шилжилт хөдөлгөөнд тавих хяналт, нийслэлийн нутаг дэвсгэрт нэвтэрч байгаа авто замуудын АТШБ товчоодын дэргэдэх ариутгал халдваргүйжүүлэлтийн цэгүүдэд ажиллалаа.Тухайлбал, Сонгинохайрхан дүүргийн Баруун Турууны АТШБ товчооны хяналтын цэг, Сонгино хайрхан дүүргийн Эмээлтийн АТШБ товчооны хяналтын цэг, Хан-Уул дүүргийн Нисэх-Био АТШБ товчооны хяналтын цэг, Яармаг-Өлзийтийн АТШБ товчооны хяналтын цэг, Багахангай дүүргийн АТШБ хяналтын цэгийн товчооны үйл ажиллагаатай танилцсан юм.

Энэ үеэр нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан цаашид авч хэрэгжүүлэх арга хэмжээний тухай зөвлөмж өгч, шаардлагатай асуудлуудыг газар дээр нь шийдвэрлэн ажиллалаа.

Мөн нэн даруй хэрэгтэй байгаа чиг үүргийн байгуулллагуудын хүн хүчний асуудал, хяналтын постуудад ажиллаж байгаа ажилчдын цалин хөлс, өдрийн хоол унааны зардал болон отрын малчдын малыг вакцинжуулах ажлыг яаралтай дуусгах, мөн шаардлагатай газруудад нэмэлтээр хяналтын цэг байгуулж ажиллуулах, хөдөлгөөнт эргүүлийг нэмэлтээр гаргаж ажиллуулах зэрэг асуудлуудыг яаралтай шийдэж өгөхийг холбогдох албаны хүмүүст үүрэг болгосон юм.

Дашрамд дурдахад, гоц халдварын бүс нутгаас нийслэл рүү зорчиж байгаа болон дайран өнгөрөх авто машинаар малын гоц халдварт шүлхий өвчин газар аван халдварлах боломжтой байдаг. Иймд нийслэлийг тойрсон АТШБ товчоодын дэргэдэх ариутгал халдваргүйжүүлэлтийн цэгүүд ажиллуулж байгаа бөгөөд иргэд, жолооч та бүхэн авто машинаа заавал халдваргүйжүүлэх нь зүйтэй юм. Мөн гоц халдварт өвчин шүлхий бүрэн усттал илэрсэн байгаа голомтоос мал, малын гаралтай бүтээгдэхүүн зөөвөрлөн авч явахгүй байх хэрэгтэй гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

2016-2017 оны хичээлийн шинэ жил эхэллээ. Өнөөдөр өглөө 08 цагт Хан-Уул дүүргийн 18 дугаар сургуулийн нээлтийн ажил болж өнгөрлөлөө.Нээлтийн ажиллагаанд  дүүргийн засаг дарга Ж.Ганхуяг, 18 дугаар сургуулийн захирал Х.Чинбат, сургуулийн багш нар болон  сурагч, тэдний эцэг эхчүүд оролцлоо.Нээлтийн арга хэмжээний үеэр тус сургуулийн авъяслаг сургачид урлагийн тоглолт үзүүлсэн юм.Хүүхэд багачууддаа хичээлийн шинэ жилийн баярын мэнд хүргэе.

Монгол улсын хөгжлийн түлхүүр болсон боловсролын салбарын багш,  сурган хүмүүжүүлэгч, оюутан, сурагч бяцхан дүү нартаа 2016-2017 оны хичээлийн шинэ жилийн мэнд дэвшүүлье.

Хан-Уул дүүргийн боловсролын салбар цаг үетэйгээ өрсөлдөн өргөн далайцтай хөгжиж, боловсролын бодлогоо амжилттай хэрэгжүүлэн ажиллаж байна. Боловсролын шинэчлэлийн хүрээнд бага,  сургуулийн өмнөх боловсрол, суурь боловсролын сургалтын цөм хөтөлбөрийг амжилттай хэрэгжүүлээд явж байна. Харин ахлах ангийн  хөтөлбөрийг 2016-2017 оны хичээлийн шинэ жилд хэрэгжүүлэхээр сургууль, цэцэрлэгийн удирдлагууд, багш, мэргэжилтнүүд идэвхтэй ажиллаж байна.

2016-2017 оны хичээлийн жилд Хан-Уул дүүрэгт төрийн өмчийн 19,  төрийн бус өмчийн 13 сургуульд  23500 сурагч суралцаж байна. Энэ жил 1 дүгээр ангид 2933 хүүхэд шинээр элсэн ороод байна. Мөн энэ хичээлийн жилд шинээр төрийн өмчийн 243 дугаар цэцэрлэг, төрийн бус өмчийн 10 цэцэрлэг үйл ажиллагаагаа эхлүүлж, 14 дүгээр  хороонд Бага сургууль- цэцэрлэгийн цогцолбор ашиглалтад орж хүүхэд, багачуудаа хүлээн авахад бэлэн болоод байгааг дуулгахад таатай байна. Өнөөдөр Хан-Уул дүүрэгт төрийн өмчийн 28, төрийн бус өмчийн 75 цэцэрлэгт 13000 хүүхэд хүмүүжиж байна.

Хан-Уул дүүрэг 2015-2016 онд “Хүүхдэд ээлтэй Хан-Уул” хөтөлбөрийг хүрээнд “Хүүхэд хөгжил”, “Хүүхэд хамгаалал” гэсэн 2 чиглэлээр 1,5 тэрбум төгрөгийн нийт 62 төсөл, хөтөлбөрийг амжилттай хэрэгжүүлсэн байна.

Дүүргийнхээ боловсролын байгууллагын багш, сурган хүмүүжүүлэгчиддээ ажил үйлсийн арвин амжилт, сурагч, бяцхан дүү нартаа сурлага хөдөлмөрийн өндөр амжилтыг хүсэн ерөөе.  Хүүхэд бүрийг сурган хүмүүжүүлэх ариун үйлст өндөр амжилт хүсье.

ХАН-УУЛ ДҮҮРГИЙН ЗАСАГ ДАРГА Ж.ГАНХУЯГ